Wb/nia/Moze III/16
I. Baŵa wangatulö. Möi ba ni'amoni'ö gere sebua
[edit | edit source]1 Ba humede Yehowa khö Moze, me no mate ndraono Ga'aroni andrö; me no la'ondrasi Yehowa, si mate ira.[1] 2 Ba imane Yehowa khö Moze:
Ŵa'ö khö ga'au A'aroni, böi yamöi manö ba ni'amoni'ö, barö mba'a-ba'a andrö, föna lagö-lagö andrö, ba dete dawöla — fa böi mate ia! Me ba lawuo andrö u'oroma'ö ndra'odo, yaŵa lagö-lagö andrö.[2] 3 Awena tola möi bakha ba ni'amoni'ö Ga'aroni, na ibe'e nono zaŵi si matua, sumange fameta horö ba biri-biri si matua, sumange nitunu. 4 Kameza tarafali ni'amoni'ö i'obaru, ba saraeŵa tarafali mbalu-balu zaila ia, ba böbö talu tarafali i'amöbö talu ba bala högö tarafali ibe'e ba högönia. Nukha ni'amoni'ö da'ö — i'onukha na no aefa mondri ia.
II. Fangatulö ere awö zato
[edit | edit source]5 Ba ba zato Ndraono Gizeraeli, ba dua geu ihalö nambi si matua, sumange fameta horö, ba sageu mbiri-biri si matua, sumange nitunu. 6 Ba A'aroni, ba i'ohe nono zaŵi andrö, sumange fameta horö tana khönia, fameta zalania ba sala moroi yomo khöra. 7 Ba awena dania ibe'e föna Lowalangi nambi si matua andrö si dua geu ba zinga mbawandruhö nose wama'ele'ö.
8 Ba ilau dahö-dahö A'aroni ba nambi andrö: sambua dahö-dahö khö Yehowa ba sambua khö Azazeli (Afökha). 9 Ba i'ohe nambi andrö, si göna khö Yehowa, A'aroni, ba i'asiwai sumange fameta horö. 10 Ba si sageu andrö, si göna khö Azazeli, ba labe'e auri, föna Yehowa, ena'ö lafatörö khönia nilau ba wameta sala, ba ena'ö lafofanö khö Azazeli, ba danö si mate.[3]
11 Ba yamuhalö nono zaŵi, sumange fameta horö tana khönia, ba wameta salania ba sala moroi yomo khöra, ba yamutaba nono zaŵi andrö fameta zala, khönia. 12 Ba yamuhalö zamba gali mbo galitö ba naha wame'e sumange, föna Yehowa, awö nitunu samohua, ni'ohama, sandra'u, ba yamu'ohe bakha, barö mba'a-ba'a andrö. 13 Ba ilau ba galitö zamohua andrö, föna Yehowa, ena'ö iba'a lagö-lagö andrö yaŵa zura goroisa simbo zamohua andrö, fa böi mate Ga'aroni. 14 Ba ihalö ma'ifu ndro nono zaŵi andrö ba ibe'e fanefe dete lagö-lagö andrö, tanö föna, turunia; ba föna lagö-lagö, ba mewitu itefe do andrö ösa, turunia.[4] 15 Awena dania itaba nambi si matua andrö sumange fameta horö ba zato, ba donia, ba i'ohe bakha barö mba'a-ba'a, ba ilau si mane mege ba ndro nono zaŵi andrö, ibe'e fanefe lagö-lagö andrö ba föna lagö-lagö misa itefe, 16 wameta sala ba ni'amoni'ö andrö, börö wa'ara'iö Ndraono Gizeraeli ba lalöra andrö, si no molalö ira, ba si manö göi ilau ba nose wama'ele'ö, nifa'anö ba khöra, ba hunö wa'ara'iöra.
17 Ba lö tola so niha ba nose wama'ele'ö, na möi ia bakha, ba wolau nilau ba wameta sala, ba ni'amoni'ö andrö, irege ifuli möi baero. Si manö wametania salania ba sala moroi yomo khöra ba sala zato Ndraono Gizeraeli fefu.
18 Awena dania möi ia baero, ba zinga naha wame'e sumange, föna Yehowa, ba wameta sala ba da'ö; ihalö ma'ifu ndro nono zaŵi andrö ba do nambi ma'ifu ba igule'ö ba dandru naha wame'e sumange, fasui, 19 ba mewitu itefe naha wame'e sumange do andrö, turunia, wangehao ya'ia ba fe'amoni'ö ya'ia, börö wa'ara'iö Ndraono Gizeraeli andrö.
III. Biri-biri si matua, foloitö
[edit | edit source]20 Ba na no imanö, wangasiwai fameta sala ba ni'amoni'ö andrö ba ba nose wama'ele'ö ba ba naha wame'e sumange, ba i'ohe ba da'ö nambi si matua andrö, sauri; 21 ba itufa högö nambi andrö sauri A'aroni tangania ma'adua ba i'ombakha'ö yaŵania zala Ndraono Gizeraeli fefu, awö lalö fefu, solalö ira heza, ba ihare'ö ba högö nambi andrö, ba ifa'ohe'ö ba danö si mate nambi, ba niha, si no ihönagö ba da'ö. 22 Ba ba hulunia i'ohe misa ba danö saröu golalöŵara fefu nambi si matua andrö, ba ba danö si mate ladudu ia.
23 Ba möi bakha Ga'aroni ba nose wama'ele'ö, iheta nukha tarafali andrö, nukhania me möi ia ba ni'amoni'ö, ba ibe'e tou ba da'ö. 24 Ba mondri ia ba naha ni'amoni'ö ba ifuli i'onukha nukhania; awena möi ia baero, ba wangasiwai sumange nitunu khönia ba sumange nitunu ba niha sat, ba wameta salania ba sala zato. 25 Ba tawö zumange fameta horö andrö, ba itunu ba naha wame'e sumange.
26 Ba solohe baero nambi si matua andrö khö Azazeli, ba ibabago nukhania ba mondri, awena tola ifuli ia ba golombaseŵa. 27 Ba ono zaŵi andrö, ba nambi si matua sumange fameta horö, ni'ohe bakha do, ba wolau nilau ba wameta sala, ba ni'amoni'ö, ba ni'ohe baero golombaseŵa, ba uli ba ösi ba tai, ba nitunu.[5] 28 Ba sanunu ya'ia, ba ibabago nukhania ba mondri, awena tola ifuli ia ba golombaseŵa.
IV. Fangohonogöi baŵa da'ö
[edit | edit source]29 Ba da'ö huku ba khömi, götö-götö wa'ara: ba mbaŵa si fitu, ba zi mewulu, ba mifakao ami, ba lö tola mihalö holöŵö, hadia ia, he niha ba danö, ba he si fatewu, si so ba ngaimi.[6] 30 Na baŵa da'ö sa lafaigi khömi wameta zala, ba wangehao ya'ami; horömi fefu niheta föna Yehowa. 31 Baŵa salösu lö mohalöŵö ami ia khömi ba mifakao ami; huku si lö mamalö-malö khömi da'ö. 32 Ere zolau fameta horö andrö, nibayoini ba nifo'ösi tanga, ena'ö ihalö halöŵö gere, fangali namania; ba i'onukha nukha tarafali andrö, nukha ni'amoni'ö,[7] 33 ba iheta zala ba wondrege ni'amoni'ö andrö; ba sala ba nose wama'ele'ö ba ba naha wame'e sumange, ba iheta; ba ba gere ba ba zato fefu ifaigi wameta zala.
34 Ba huku ba khömi da'ö, götö-götö wa'ara dania, wa samuza zi döfi lafaigi ba Ndraono Gizeraeli wameta horöra fefu. Ba la'o'ö niŵa'ö Yehowa khö Moze.
Famotokhi ba gahe
[edit | edit source]Fabaliŵa lala
[edit source]Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö