Wb/nia/Moze III/27

I. Amakhoita ba gamabu'ula li na niha ba na urifö ba na omo ba na benua

1 Ba humede Yehowa khö Moze, imane: 2 Hede ba Ndraono Gizeraeli, ba ömane khöra:

Na so zanörö amabu'ula li khö Yehowa, ba na niha, dali watönia, 3 ba fatö ndra matua si dua wulu fakhe, irege önö ngafulu, ba lima wulu rufia ba zaga ni'amoni'ö andrö; 4 ba na ira alawe, ba tölu ngafulu rufia watönia.

5 Ba na si melima fakhe, irugi dua wulu fakhe, ba fatö nono matua, ba dua wulu rufia ba fatö nono alawe, ba fulu rufia.

6 Ba na si sara waŵa, irugi melima fakhe, ba fatö nono matua, ba lima rufia, ba fatö nono alawe, ba tölu rufia.

7 Ba na si önö ngafulu fakhe ba na si töra, ba fatö ndra matua, ba felelima rufia, ba fatö ndra alawe, ba fulu rufia.

8 Ba na no abölö numana niha si manö, na tebai itörö watö andrö, ba la'ohe khö gere, ba yamufatö mbölinia ere; yamufaigi ere, ha wa'ebua zi tola ibe'e samabu'u andrö.

9 Ba na urifö, si tola labe'e sumange Yehowa, ba ni'amoni'ö laŵa'ö fefu nibe'e khö Yehowa. 10 Lö tola ifalalini ba lö tola isalahini, wame'e si sökhi salahi zi lö sökhi, ba ma si lö sökhi salahi zi sökhi; ba na ifalalini zui gurifö andrö, ba faoma ni'amoni'ö. 11 Ba na urifö salakha, si tebai labe'e sumange Yehowa, ba ndramu'ohe khö gere. 12 Ba yamufatö mbölinia ere, na si sökhi, ba na sambö fa'asökhi; ba ba watö andrö, niŵa'ö gere, ahono. 13 Ba na edona isanu, ba sambua ni'olima watö andrö inönö.

14 Ba na so zi amoni'ö khö Yehowa omonia, ba yamufatö mbölinia ere, na si sökhi, ba na sambö fa'asökhi, ba fatö niŵa'ö gere mbölinia. 15 Ba na edöna ifuli isanu nomonia si amoni'ö ya'ia mege, ba sambua ni'olima watönia andrö inönö, ba khönia sa'ae.

16 Ba na so zi amoni'ö khö Yehowa benua, föfö gondröita namania mege, ba ba watönia, ba balazi ha uga lauru tanömö; si 25 lauru tanömö, ba 50 rufia watönia.

17 Na ba ndröfi wa'owua-wua dödö andrö i'otarai we'amoni'ö benuania andrö, ba fatönia itörö. 18 Ba na no aefa ndröfi wa'owua-wua dödö na i'amoni'ö, ba yamu'erai khönia mböli ere, balazi ha me uga fakhe na, irugi ndröfi wa'owua-wua dödö dania, ba lasöbi dania ndrohu-ndrohu ba watönia andrö.

19 Ba na edöna zui isanu mbenua andrö si amoni'ö ya'ia, ba sambua ni'olima watönia andrö inönö; ba lö tebulö wa khönia. 20 Ba na lö isanu mbenua andrö, ba na i'amawa zui ba niha bö'ö, ba tebai tefuli tesanu; 21 benua andrö, na aefa dania, na döfi wa'owua-wua dödö andrö, ba ni'amoni'ö khö Yehowa laŵa'ö, si mane benua nilakha'ö; okhöta gere sa'ae ia.

22 Ba na so zi amoni'ö khö Yehowa benua ni'ölinia, si tenga föfö mbenua ondröita namania mege, ba yamu'erai khönia ere, 23 he wisa fatönia, irege döfi wa'owua-wua dödö andrö, ba fatö da'ö, ba na luo da'ö ibe'e, ame'ela ni'amoni'ö khö Yehowa. 24 Ba na döfi wa'owua-wua dödö, ba mangawuli ba ni'olinia ya'ia mbenua andrö, ba zokhö ya'ia mege ondröita namania. 25 Fefu watö, ba saga ni'amoni'ö mbalazi; si samba sekeli [rufia] ba 20 gera.

II. He lawisa ba zi a'a ba wa'atumbu ba ba nibe'e salakha

26 Ba si a'a nono gurifö, si möi khö Yehowa, me no si a'a, ba lö tola la'amoni'ö; he saŵi, ba he biri-biri — khö Yehowa ia sa'ae. 27 Ba na urifö salakha, ba nihöli, balazi watö, ba sambua ni'olima mböli inönö; ba na lö lasanu, ba ni'amawa, balazi watö.

28 Ba ba nilakha'ö, ni'amoni'ö niha khö Yehowa, wolakha'ö ya'ia, nituyu ba zi so khönia fefu, he niha, ba he urifö, ba he benua, ondröita mege, ba lö'ö manö tola la'amawa ba lö tola lasanu; fefu nilakha'ö ba no ni'amoni'ö sibai khö Yehowa. 29 Na so ha niha, niha nilakha'ö, ba lö tola lasanu, nibunu sa'ae.

III. Khö Yehowa zi sambua ni'ofulu andrö, hadia ia

30 Sambua ni'ofulu, fefu, he benua, ba he bua danö, ba he bua geu, ba khö Yehowa, ni'amoni'ö khö Yehowa. 31 Ba na so zomasi mananu ösa ni'öfulu andrö khönia, ba sambua ni'olima mbölinia inönö.

32 Ba ba zi sambua ni'ofulu zaŵi ba biri-biri, ba ba nifatörö si'o [gubalo] fefu, ba ni'erai, fulufulu nga'eu, ba sagesageu ni'amoni'ö khö Yehowa. 33 Böi lafaigi, na si sökhi, ba na si lö sökhi, ba lö tola lafalalini. Ba na so zamalalini zui, ba faoma ni'amoni'ö ira, ba lö tola lasanu.

34 Da'ö goroisa andrö, ni'oroi'ö Yehowa khö Moze, ba hili Zina'i, ba Ndraono Gizeraeli.

Famotokhi ba gahe

Fabaliŵa lala

Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö