Wb/nia/Moze III/25

I. Amakhoita ba ndröfi sabato

1 Ba humede Yehowa khö Moze ba hili Zina'i, imane: 2 Hede ba Ndraono Gizeraeli ba ömane khöra:

Na no mirugi dania danö, nibe'egu khömi, ba mosabato khö Yehowa danö. 3 Me önö fakhe wa'ara öhalö-halö danö nowi ba ögutiguti nagu khöu, ba ö'ozaragö mbua. 4 Ba ba ndröfi si fitu, ba mosabato danö, sabato khö Yehowa. Ba lö tola öhalö nowiu ba da'ö ba lö tola ogutiguti nagu khöu. 5 Ba hadia zowua manö, aefa wamasiu mege, ba lö tola öbasi, ba bua nagu andrö, si lö mugutiguti, ba lö tola ö'ozaragö, me döfi sabato ba danö. 6 Hadia mbua danö götö wolombase andrö, ba ömi — öu, ba ö zawuyumö, ono matua ba ono alawe, ba ö genoniu, ba ö zi fatewu khöu, yomo khöu. 7 Ba ö guriföu göi ba ö gutu ndru'u ba danömi fefu mbua danö andrö.

II. Döfi wa'owua-wua dödö

8 Ba ö'erai ndröfi sabato andrö, fitu — mewitu wa fitu fakhe, tobali öfa wulu a siŵa fakhe götö ndröfi sabato si fitu. 9 Ba ba da'ö öfalau'ö dorofe, ba zi mewulu ba mbaŵa si fitu; na baŵa wangatulö andrö, ba sagörö tanö mifalau'ö dorofe, 10 ba mi'amoni'ö ndröfi si lima wulu andrö, mifarongogö ba da'ö wa'aefa, fa'aefa niha fefu ba danö. Döfi wa'owua-wua dödö miŵa'ö, ba dozi ami, ba mangawuli khömi gokhötami, ba mangawuli ba niwara zamösana. 11 Döfi wa'owua-wua dödö ia, miŵa'ö, ndröfi si lima wulu andrö. Ba lö tola manaru ami ba da'ö, ba lö tola mibasi zowua manö, ba he bua nagu andrö, si lö mugutiguti, ba lö tola mi'ozaragö. 12 Me no döfi wa'owua-wua dödö, ba ni'amoni'ö ia, miŵa'ö. Moroi ba danö mi'a mbuania.

13 Da'ö ndröfi wa'owua-wua dödö andrö, ba zangawuli ba zamösana okhötania.

III. Ya'ia mbalazi ba wowöli hadia ia ba ba wananu

14 Na so ni'amawau khö nawöu, ba ma na ö'öli hadia ia khö nawöu, ba faoma böi mibe'e te'ala nawömi. 15 Balazi ha me uga fakhe aefa ndröfi wa'owua-wua dödö, na ö'öli hadia ia khö nawöu, ba balazi ha me uga fakhe mamasi na, na i'amawa khöu. 16 Na oya na ndrofi, ba ö'ebua'ö khönia mböli, ba na ambö fa'oya, ba ö'ambösi nibe'e; ha me uga famasi sa i'amawa khöu. 17 Böi yamube'e te'ala nawönia zamösana; ata'ufi Lowalangiu, me no Yehowa ndra'odo Lowalangimi.

18 Andrö mi'o'ö nifakhoigu, mitöngöni huku andrö khögu ba mi'o'ö, ena'ö lö hadia ia khömi ba danö. 19 Ba mowua dania danö, ena'ö abuso ami ba ena'ö lö hadia ia khömi ba danö.

20 Ba na miŵa'ö ena'ö: Hadia göma ba ndröfi si fitu andrö, na lö manaruga ba na lö tola ma'ozaragö mbua danö? 21 ba na döfi si önö andrö, ba ube'e li ba howu-howu andrö khögu, ena'ö ndrohu-ndrohu ba zi medölu fakhe misöndra khönia, ibe'e. 22 Ba na manaru ami, na döfi si ŵalu, ba mi'aga'aga mbua danö mege; irugi ba ndröfi si siŵa — tobali mi'aga'aga zi tohöna, irege so zi bohou.

23 Tanö, ba lö tola mi'amawa tenga sanutö, me no khögu danö, niha bö'ö sa ami ba si fatewu khögu. 24 Andrö mitehe wananu benua, fefu gofu heza ba danö andrö, si no möi tanömi. 25 Na tobali numana dalifusöu, ba na i'amawa osa mbenuania, ba yamöi sananu, salahinia, wondrege zahatö khönia, yamusanu ni'amawa dalifusönia andrö. 26 Ba na so zi lö sananu, ba na i'ila i'alui ndrohu-ndrohu wananu, 27 ba yamusöbi ndröfi andrö aefa wamawa, ba hadia zi tosai, ba yamufuli ba ni'amawania ya'ia, ena'ö mangawuli khönia gokhötania. 28 Ba na lö isöndra zoguna fananu, ba lö tebulö khö zowöli ni'amawania andrö, irege döfi wa'owua-wua dödö andrö; ba da'ö dania aefa, tobali mangawuli khönia gokhötania andrö.

29 Ba na so zamawa omo, bakha barö göli mbanua, ba tola ifuli isanu na barö ndröfi andrö, ni'amawania ya'ia; irege da'ö lafonoso ia, ba wananu. 30 Ba na lö musanu irege alua ndröfi; ba tetutu danö ba zowöli andrö ba ba nga'ötönia, ba nomo andrö, bakha barö göli mbanua, ba lö'ö sa'ae mangawuli ba ndröfi wa'owua-wua dödö andrö. 31 Ba omo ba mbanua side-ide, si lö mufasui öli, ba si faböbö ba mbenua miŵa'ö; tola nisanu, ba mangawuli na döfi wa'owua-wua dödö andrö.

32 Ba ba nomo nono Lewi andrö — omo ba mbanua misa, khöra — ba tetehe ba nono Lewi wananu, gofu ha wa'ara. 33 Ba na so nono Lewi si lö mananu ya'ia, ba mangawuli khönia nomo andrö, ni'amawania, na döfi wa'owua-wua dödö andrö, ba mbanua si so okhötania; omo andrö sa, ba mbanua nono Lewi, ba si lö tebulö khöra, ba hunö Ndraono Gizeraeli. 34 Ba benua andrö ba zinga mbanua khöra, ba lö tola te'amawa, me no khörakhöra, götö-götö wa'ara, okhöta si lö tebulö.

IV. Fanenaŵa famohare ana'a

35 Ba na tobali numana dalifusöu, na awuwu ia ba ngaiu, ba ötolo ia, amaedola niha bö'ö, amaedola zi fatewu, ena'ö isöndra mbalazonia ba ngaimö. 36 Lö tola öfohare gana'au khönia, böi fabali khönia, ö'ata'ufi Lowalangiu, ena'ö isöndra mböli gönia talifusöu, ba ngaimö. 37 Ana'au, ba lö tola öfohare khönia, ba önia, nibe'eu, ba böi fabali. 38 Yehowa ndra'odo, Lowalangimi, si no mangeheta ya'ami ba danö Miserayi, ba wame'e khömi tanö Gana'ana, ba we'amöi Lowalangimi.

V. Oroisa he lawisa ba zawuyu, Iraono Gizeraeli

39 Ba na tobali numana dalifusöu ba ngaiu ba na i'amawa ia khöu, ba böi fohalöŵö ia halöŵö zawuyu. 40 Amaedola enoni ia khöu öbe'e, ba amaedola zi fatewu, yamöi ngoni-ngoniu, irege döfi wa'owua-wua dödö andrö. 41 Ba da'ö dania ö'efa'ö ia, awö ndraononia, ba ifuli ia ba niwara, ba mangawuli khönia gondröita namania. 42 Enonigu sa ira, nihetagu, ba danö Miserayi; lö tola la'amawa sawuyu ira. 43 Böi faitoisi wamatörö ya'ia, ö'ata'ufi Lowalangiu.

44 Ba na omasi'ö zawuyu ono matua ba sawuyu ono alawe, ba ba niha baero, si tefasui ya'ami — ba khöra mihöli zawuyu ono matua ba sawuyu ono alawe. 45 Ba he iraono zi fatewu andrö, ba khömi, ba hana na mihöli ösa, awö nga'ötöra andrö, ba khömi, si tumbu ba danömi; hana na khömi da'ö. 46 Ba hana na mifa'ema ba ndraonomi furimi, ondröita, ena'ö okhötara, ba hana na lö tebulö sawuyumi ira. Ba ba dalifusömi andrö, Iraono Gizeraeli — ba faoma böi mifaitoisi, wamatörö awömi.

47 Ba na falukha niha bö'ö, ba ma si fatewu, öna-öna so khönia ba ngaiu, ba na tobali numana dalifusöu ba ngainia, ba na i'amawa ia ba niha bö'ö, ba ma ba zi fatewu, ba ma ba nga'ötö niha bö'ö ba ngaimö, 48 ba nitehe khönia wananu, na no i'amawa ia; hana na talifusönia zananu ya'ia; 49 ma tana mamania ba ma ono dana namania zananu ya'ia, ba ma ha niha zabölö ahatö khönia, iwara, zananu ya'ia, ba ma zui, na isöndra gana'a, ba hana na ya'ia zananu ya'ia. 50 Ba i'erai khö zowöli ya'ia, i'otarai ndröfi, me i'amawa ia, irugi ndröfi wa'owua-wua dödö andrö. Ba ba mböli, ba balazi ha me uga fakhe, me i'amawa ia; amaedola genoni ia, götö we'asonia khönia. 51 Ba na oya na ndröfi si tosai, ba i'erai ba wamuli ösa, bölinia, ba wananu ya'ia. 52 Ba na ambö fa'oya ndröfi si tosai, irege döfi wa'owua-wua dödö andrö, ba i'erai khönia; balazi ha me uga fakhe ia khönia, ha wa'ebua ifuli, ba wananu ya'ia. 53 Amaedola zi manga gazi, döfidöfi, ia khönia; lö tola öfaigi manö lö hede-hede, na ifaitoisi wamatörö ya'ia.

54 Ba na lö falukha ia wananu si manö, ba ba ndröfi wa'owua-wua dödö andrö dania aefa ia, awö ndraononia. 55 Khögu sa Ndraono Gizeraeli, enonigu; enonigu, nihetagu ba danö Miserayi, ya'odo andre, Yehowa, Lowalangimi.

Famotokhi ba gahe

Fabaliŵa lala

Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö