Wb/nia/Luka/9

From Wikimedia Incubator
< Wb‎ | nia‎ | Luka
Wb > nia > Luka > 9

Famatenge zinenge si felendrua[edit | edit source]

I. 1 Ba humede ia ba zi felendrua andrö,[1] ibe'e khöra wa'abölö, ba itehe khöra wamofanö bekhu fefu, awö wamadöhö fökhö. 2 Ba ifatenge ira, ba wanuriagö banua Lowalangi andrö ba ba wamadöhö fökhö, 3 ba imane khöra: Böi mi'ohe hadia ia ba lala; he si'o ba he bola ba he roti ba he kefe, ba böi dua görö mbarumi. 4 Ba ba zi möi ami yomo, ba da'ö mi'iagö ba ba da'ö mi'otarai wofanö.[2] 5 Ba ba zi lö lafa'amöi yomo ami, ba da'ö miheta ami, ba mbanua andrö, ba mi'anotogö gawu-gawu ba gahemi, ba wamaduhu'ö khöra.

6 Ba mofanö ira, latöröi mbanua misa, wanuriagö turia somuso dödö, awö wamadöhö fökhö, fefu gofu heza möi ira.

7 Ba irongo fefu hadia ia Herode andrö,[3] salaŵa ba zi sagörö ni'o'öfa tanö, ba i'abusi tödö, me no so ösa zanguma'ö: No maoso Yohane moroi ba ngai zi mate;[4] 8 ba so ösa, ba laŵa'ö: No to'ele Geliya; ba so danö bö'ö, ba lamane: No maoso zama'ele'ö föna, samösa. 9 Ba imane Herode: Yohane andrö, ba no ufa'eŵa'ö mbagi, ba ha niha da'ö? Ba i'alui lala, ena'ö falukha ia khönia.[5]

10 Ba mangawuli zinenge no mege, ladunö-dunö khönia, hadia nilaura. Ba i'ohe ira, awönia, mofanö ia ba zi ha ya'ira, isaŵa mbanua, sotöi Betisa'ida.[6]

11 Ba la'ila niha sato,[7] ba la'o'ö ia, ba ifa'amöi ira khönia, fahuhuo ia khöra, i'ombakha'ö mbanua Lowalangi andrö, ba ha niha zofökhö, ba ifadöhö wökhö.

Fame'e gö niha si lima ngahönö[edit | edit source]

II. 12 Ba lö sa'ae alawŵa luo. Ba möi khönia zi felendrua, lamane khönia: Fofanö niha sato andrö, ena'ö möi ira mörö ba mbanua si fasui ba ba halama, ba ena'ö lasöndra gö, me ba danö si mate so ita ba da'e.

13 Ba imane khöra: Mibe'e göra, ya'ami.

Ba lamane: Lö khöma, ha lima roti ba ha dua rozi gi'a; atö na möiga mowöli balazo niha sato andrö fefu.[8]

14 So sa lima ngahönö ndra matua.

Ba imane ba nifahaönia: Mifedadao ira, mifa'oli, lima-lima wulu.

15 Ba la'o'ö da'ö, lafedadao ira fefu.

16 Ba ihalö roti andrö, si lima, ba i'a andrö, si dua rozi, ifaöga horönia miyaŵa ba zorugo, ifahowu'ö gö andrö ba iboboto ba ibe'e khö ndra nifahaö, ba wame'e ba niha sato.

17 Ba manga ira ba abuso fefu. Ba la'ozaragö zi tosai, akhökhöla, felendrua kude.

Famaduhu'ö Wetero[edit | edit source]

III. 18 Ba me mangandrö ia,[9] ha ya'ia, ba la'ondrasi ia nifahaö, ba isofu khöra, imane: Ha laŵa'ö niha sato, ha niha ndra'odo?

19 Ba latema linia, lamane: Laŵa'ö: Yohane andrö, samayagö idanö; ba so zanguma'ö: Eliya; ba so ösa, ba laŵa'ö: No maoso zama'ele'ö föna andrö, samösa.

20 Ba imane khöra: Ba ya'ami, ha miŵa'ö, ha niha ndra'o?

Itema linia Fetero, imane: Keriso Lowalangi andrö ndra'ugö.

21 Ba itenaŵa ira, iŵa'ö khöra, böi la'ombakha'ö da'ö, gofu ha ökhö. 22 Imane: Lö tola lö oya itaha famakao Ono Niha, ba latibo'ö ia dania satua mbanua andrö ba ere sebua ba sangila amakhoita andrö, ba labunu ia, ba tölu ngaluo, ba tesusugi ia.

23 Ba imane khöra fefu:[10] Na so zedöna molo'ö ya'o, ba yamu'ositengagö ia, yamulu'i röfania, ero maökhö, ba yamu'o'ö ndra'o.[11] 24 Ha niha sa zedöna manganau'ö nosonia, khönia aetu dania; ba ha niha zaetu noso, na börö ndra'o, da'ö zanganau'ö ya'ia. 25 Hadia sa guna ba niha, na isöndra harenia fefu hadia ia zi so ba guli danö, ba na ya'ia zi taya, na te'ala ia ba khönia? 26 Ha niha sa zaila ba khögu andre ba ba daroma ligu andrö, da'ö göi zaila dania Nono Niha, na so ia, na so khönia lakhöminia, awö lakhömi Nama, awö lakhömi mala'ika ni'amoni'ö andrö.[12] 27 Ba si ndruhu-ndruhu niŵa'ögu khömi: So ösa ba zi so ba da'e, si lö mangila fa'amate, irege no la'ila mbanua Lowalangi andrö.[13]

Famolakhömi Yesu[edit | edit source]

IV. 28 Ba me no i'etu'ö huhuo andrö,[14] ba so mato ŵalu bongi, ba i'ohe ndra Fetero, Yohane Yakobo, möi ia ba hili, mangandrö.

29 Ba me mangandrö ia, ba tobali mbawania, ba afusi mbarunia, humaga. 30 Ba hiza niha, darua, si fahuhuo khönia, Moze ba Eliya.

31 Molakhömi, wamaigira, lafatunö lua-lua lalania, nifaluania dania ba Yeruzalema.[15]

32 Ba manuköu ndra Fetero. Ba me tokea ira, ba la'ila lakhöminia, awö niha andrö, si darua, si so ba da'ö khönia. 33 Ba me laheta ira khönia da'ö, ba imane Fetero khö Yesu: He samahaö, ba da'e zi sökhi nahada, ba damafazökhi nose, tölu, sambua khöu, sambua khö Moze, ba sambua khö Geliya; lö i'ila watahögö hadia wehedenia.

34 Ba barö wehedenia andrö, ba so lawuo, ilumö'ö ira. Ba ata'u ira, me möi ira bakha ba lawuo andrö.

35 Ba so li, si oroi lawuo andrö, imane: Onogu da'ö, nituyugu, mifondrondrongo khönia.[16] 36 Ba me terongo li andrö ba hatö Yesu ni'ilara. Ba lö hede-hedera, lö hadia ia la'ombakha'ö ba niha, gofu ha ökhö, me luo da'ö, hadia ni'ilara.

Famofanö bekhu[edit | edit source]

V. 37 Ba mahemolu ö,[17] me möi ira mitou moroi ba hili, ba ato zamaondragö ya'ia niha. 38 Ba hiza niha, samösa, ba zato andrö, mu'ao ia, imane: He samahaö, u'andrö khöu, faigi nonogu matua andrö, awai nonogu, ba hiza, 39 ira'u bekhu ba i'ogomuzaö mu'ao, ba idödöni bekhu, fawukhö gilo, ifakao, lö edöna ia aheta. 40 Ba no u'andrö ba nifahaömö, ena'ö lafofanö ia, ba tebai.

41 Ba itema linia Yesu, imane: He ya'ami, niha si lö mamati, si no tefuyu tödö! he wisa na wa'aragu khömi ena'ö, ba ha wa'ara utaha ba khömi? 42 Ohe ba da'e nonou andrö.

Ba me so ia moroi sa, ba idödöni bekhu no mege, ikandro'ö. Ba itenaŵa mbekhu si ra'iö andrö Yesu, ifadöhö wökhö nono matua andrö ba ifuli khö namania.

Ihönagö i'ombakha'ö wa'amatenia Yesu[edit | edit source]

VI. 43 Ba oi tobali dödöra, ba wa'abölö Lowalangi andrö. Ba me oi ahöli-höli dödöra ba nilaunia andrö fefu, ba imane ba nifahaönia: 44 Mifondrondrongo niŵa'ögu andre: Tebe'e sa dania ba danga niha Nono Niha.[18]

45 Ba lö aboto ba dödöra niŵa'önia andrö, no tobini khöra, fa lö la'ila watahögö. Ba ata'u ira wanofu khönia ba niŵa'önia andrö.[19]

Ifarou ira ba wa lö molau faya[edit | edit source]

VII. 46 Ba tesao ba dödöra,[20] ha niha zebuara maö.[21]

47 Ba me no i'ila gera-era dödöra andrö Yesu, ba ihalö ndraono, ibe'e ba ngainia, ba imane khöra: 48 Na so zama'amöi yomo khönia ono andre, na börö döigu, ba ya'o nifa'amöinia yomo. Ba na so zama'amöi yomo ya'o, ba samatenge ya'o ifa'amöi yomo. Ha niha sa wondrege zide-ide ba khömi fefu, da'ö zebua.[22]

Ifarou ira ba wa'ebolo dödö[edit | edit source]

VIII. 49 Ba itema Yohane,[23] imane: He samahaö, no ma'ila zamösa, sanötöi töimö, wamofanö bekhu, ba no matenaŵa ia, me lö i'o'ö ita.

50 Ba imane khönia Yesu: Böi mitenaŵa, ha niha sa zi lö fa'udu khömi, ba no awömi.[24]

51 Ba me lö ara tö irugi baŵa wofanönia ba zorugo, ba idölö ia ba Yeruzalema. 52 Ba ifatenge zinenge, sowaö-waö fönania. Ba mofanö da'ö, ba larugi mbanua Ndrawa Zamaria, ba wamaigi naha wemörö khönia. 53 Ba lö lafa'amöi ia yomo, me no ba lala ba Yeruzalema so ia.

54 Ba me la'ila da'ö nifahaö andrö, Yakobo ba Yohane, ba lamane: He Tua, hadia, omasi'ö na maŵa'ö galitö moroi yaŵa ba mbanua, ena'ö i'a ira?[25] 55 Ba ibali'ö ia, itenaŵa ira. 56 Ba lasaŵa mbanua bö'ö.[26]

Folo'ö Yesu[edit | edit source]

IX. 57 Ba ba wofanö andrö, ba so zamösa, sanguma'ö khönia: Da'u'o'ö ndra'ugö, gofu heza möi'ö.

58 Ba imane khönia Yesu: So dögi narö hili ba zigölu, ba ba wofo ba dalu mbanua, ba so gazuni, ba khö Nono Niha, ba lö naha wemörö.[27]

59 Ba iŵa'ö ba danö bö'ö: O'ö ndra'o.

Ba imane: Tehe khögu, ena'ö mofanödo ua, ba wogo'o amagu.

60 Ba imane khönia: Akha lako'o zi mate khöra niha si mate, ba ya'ugö, ba ae ombakha'ö mbanua Lowalangi andrö.[28]

61 Ba so danö bö'ö na, imane: Da'u'o'ö ndra'ugö Tua, ba tehe khögu ua, ena'ö u'angonasi zi so baomo khögu.[29]

62 Ba imane khönia Yesu: Gofu ha niha ia, zanuyu faku, na ifaigi furinia, ba lö göna ba mbanua Lowalangi andrö.[30]

Famotokhi ba gahe[edit | edit source]

  1. Ayati 1-5: Mat 10:1; 7:9-14; Mar 6:7-13
  2. Faigi 10:5 b.t.
  3. Ayati 7-9; Mat 14:1,2; Mar 6:14-16
  4. Ayati 18:19
  5. Faigi 23:8
  6. Mar 6:30; Mat 14:13
  7. Ayati 11-17: Mat 14:13-21; Mar 6:31-44; Yoh 6:1-14
  8. SalII 4:42 b.t.
  9. Ayati 18-22: Mat 16:13-21; Mar 8:27-31
  10. Ayati 23-27: Mat 16:24-28; Mar 8:34-38
  11. Mar 8:34
  12. Mat 10:33; Mar 8:38
  13. Mar 9:1
  14. Ayati 28-36: Mat 17:1-9; Mar 9:2-9
  15. Faigi 18:31
  16. FetII 1:16,17
  17. Ayati 37-42: Mat 17:14-21; Mar 9:14-29
  18. Mat 16:21
  19. Faigi 18:34; Mar 9:32
  20. Ayati 46-48: Mat 18:1-5; Mar 9:33-37
  21. Faigi 22:24
  22. Faigi 22:26; Mat 20:26 b.t.
  23. Ayati 49-50: Mar 9:38-40
  24. Fil 1:18
  25. Sal II 1:10 b.t.
  26. Yoh 3:17; 12:47
  27. Mat 8:19 b.t
  28. Mat 8:22
  29. Gal 1:16
  30. Faigi 17:32,33

Fabaliŵa lala[edit source]

Olayama Zura Luka: 123456789101112131415161718192021222324

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö