Wb/nia/Luka/10
Famatenge nifahaö si fitu ngafulu
[edit | edit source]I. 1 Aefa da'ö, ba i'oniagö na danö bö'ö So'aya fitu ngafulu, ba ifatenge ira, daru-darua, ba wowaö-waö fönania, ba mbanua sebua ba ba mbanua side-ide fefu, ba zi möi ia dania.[1]
2 Ba imane khöra: Ebolo sa mbasitö andrö, ba sohalöŵö, ba lö atoto: andrö mi'andrö khö zokhö basitö andrö, ena'ö ifatenge zohalöŵö ba mbasitönia.[2] 3 Mi'ae'e; hiza, ufatenge ami, hulö nono mbiri-biri, ba hunö nasu gatua.[3] 4 Böi mi'ohe gabe-kabe, ba he bola, ba he badagahe; böi mi'owai niha ba lala.[4]
5 Ba ba zi möi ami yomo, ba da'ö zi föföna limi: "Yafalukha wa'ohahau dödö zi samba omo andre."[5]
6 Ba na so ba da'ö nono wa'ohahau dödö, ba ahono khönia wa'ohahau dödö andrö khömi; ba na lö'ö, ba mangawuli ia khömi.
7 Ba ba nomo andrö mi'iagö, mi'a ba mibadu hadia nibe'era khömi, noa sa si nangea itema luo sohalöŵö. Böi mifa'ema nomo.[6]
8 Ba na möi ami ba mbanua, ba na lafa'amöi ami, ba mi'a hadia nibe'era khömi,
9 ba mifadöhö wökhö zofökhö khöra, ba mimane khöra: No i'ondrasi ami banua Lowalangi andrö[7]
10 Ba na möi ami ba mbanua, ba na lö lafa'amöi ami, ba miheta ami yomo, mi'ae ba newali khöra, ba mimane:
11 Gawu-gawu andre na i, si falemba khöma, ba gahe, ba mbanuami andre, ba ma'ezosi khömi, ba böi zi lö mi'ila, wa no ahatö mbanua Lowalangi andrö.[8]
12 Ba uŵa'ö khömi öna-öna na zi göna Zodoma, na luo da'ö dania, moroi ba zi göna mbanua da'ö.
13 Alai ndra'ugö, Khorasi![9] Alai ndra'ugö Betisa'ida! Na ba Diro ba ba Zidona mena'ö tefazökhi dandra andrö, nifazökhi ba khömi andrö, ba no föna sa'ae lafalalini mena'ö gera-erara, no dumadao ira bawu mena'ö ba no la'onukha goni-goni. 14 Ba öna-öna na zi göna Diro ba Sidona, ba wanguhuku dania, moroi ba zi göna ami.
15 Ba ya'ugö Kafanauma, tenga no mu'alaŵa'ö ndra'ugö irugi ba zorugo? Irugi mbanua tou latimba si tou ndra'ugö dania.
16 Ha niha zamondrongo khömi, ba khögu ifondrondrongo, ba ha niha zangositengagö ya'ami, ba ya'o i'ositengagö, ba ha niha zangositengagö ya'o, ba samatenge ya'o i'ositengagö.[10]
Fangawuli ndra nifahaö si fitu ngafulu
[edit | edit source]II. 17 Ba mangawuli zi fitu ngafulu no mege, omuso dödöra, lamane: He Tua, bekhu göi, no la'o'ö lima, ba döimö andrö.[11]
18 Ba imane khöra: No u'ila Zatana andrö, saekhu tou moroi ba mbanua si yaŵa, hulö gari mbanua.[12] 19 Hiza no utehe khömi mihundragö gulö ba tongo ba milaŵa wa'abölö nemali andrö fefu, ba lö'ö manö te'ala ami.[13]
20 Ba böi da'ö mibe'e fa'omuso dödömi, wa no la'o'ö limi bekhu andrö; da'ö mibe'e fa'omuso dödömi, wa no mutanö döimi ba zura, ba zorugo.[14]
21 Me luo da'ö owua-wua dödönia, soroi ba Geheha ni'amoni'ö, ba imane: Usuno ndra'ugö, Ama, So'aya sorugo awö danö, me no öbini'ö da'ö ba zatua-tua ba ba zonekhe, ba me no ö'oroma'ö ia ba ndraono. Si ndruhu, ya'ugö, Ama, me no si manö wa'omasiu.[15]
22 Ba ibali'ö ia furi ba nifahaönia, imane: No ibe'e ba dangagu Amagu fefu hadia ia, ba lö saboto ba dödö ha niha Nono andrö, baero Nama andrö, ba lö saboto ba dödö ha niha Nama andrö, baero Nono andrö, awö ba zedöna i'oroma'ö Ono andrö.[16]
23 Ba ibali'ö ia furi ba nifahaönia, ba zi ha ya'ira, imane: Ya'ahowu hörö andrö, sangila ni'ilami andrö.[17] 24 Uŵa'ö sa khömi: Ato zama'ele'ö, awö zalaŵa, somasi mangila ni'ilami, ba lö ni'ilara, ba no omasi ira mamondrongo nirongomi, ba lö nirongora.
Dawa Zamaria sahakhö tödö
[edit | edit source]III. 25 Ba hiza, maoso zangila amakhoita, samösa, manandraigö ya'ia, imane: He samahaö, he uwisa, ena'ö usöndra wa'auri si lö aetu andrö?[18]
26 Ba imane khönia: Hadia ba zura goroisa andrö? he wisa wombasou?
27 Ba itema linia, imane: "Omasi'ö Zo'aya, Lowalangiu, moroi si'aikö ba dödöu, nosou ma'asambua zangomasi'ö ya'ia, ba öhorigö wa'abölöu, awö gera-erau wangomasi'ö ya'ia; ba omasi'ö zahatö khöu, si mane fa'omasiu ndra'ugö."[19]
28 Ba imane khönia: Si ndruhu niŵa'öu, o'ö da'ö, ba auri ndra'ugö.[20]
29 Ba ibu'a ena'ö, imane khö Yesu: Ba ha niha zahatö khögu?
30 Ba imane Yesu: So niha, si möi misi tou, i'otarai Yeruzalema, numalö ba Yerikho, ba falukha ia zorabu, laheta nukhania, laböbözi ia ba lalau mofanö, laröi tou ia, arakha mate.
31 Ba itörö misi tou lala andrö ere, ba i'ila, ba itörö manö.
32 Ba si manö göi nono Lewi, samösa, me irugi da'ö, i'ila, ba itörö manö.
33 Ba itörö göi da'ö Dawa Zamaria, sikoli, ba me i'ila, ba ahakhö dödönia.[21] 34 I'ondrasi, i'olohuni zokhonia, ilau wanikha ba agu, ifazaŵa ba kudo khönia, i'ohe ba nomo ba zi mörö zikoli ba irorogö.
35 Ba mahemolu ö, ba iso'ö baero dombua hua suku, ibe'e khö zokhö omo andrö, imane: Rorogö ia, ba na öbe'e na, baero da'e, hadia ia, ba u'ali khöu, na mangawulido.
36 Hadia ba dödöu, ha niha ba zi datölu andrö zahatö khö nibözi zorabu andrö?
37 Ba imane: Si hakhösi tödö ya'ia.
Ba imane khönia Yesu: Ba ae'e, ba lau zi manö, ya'ugö göi.[22]
Marata ba Maria
[edit | edit source]IV. 38 Ba me mofanö ira, ba möi ia ba mbanua side-ide; ba so ndra alawe, Marata döi, ikaoni ia yomo.[23]
39 Ba so dalifusönia, Maria döi, ba dumadao da'ö föna Zo'aya mamondrongo niŵa'önia.[24]
40 Ba Marata andrö, ba no owölö-ölö, ba wangai hadia ia zoguna khönia. Ba möi ia khönia, imane: He Tua, hadia, lö ba dödöu, wa ibe'e manö sangai halöŵö ndra'o ga'agu, ha ya'o? ŵa'ö ae khönia, ena'ö ibabaya göi, itolodo.
41 Ba itema linia So'aya, imane khönia: He Marata! he Marata! wa'oya wangabu dödöu, ba oya ngawalö wa lö ahono'ö; 42 ba ha sambalö zoguna. No ituyu khönia zi sökhi andrö Maria, lö laheta khönia da'ö.[25]
Famotokhi ba gahe
[edit | edit source]- ↑ MozII 24:1
- ↑ Mat 9:37,38
- ↑ Mat 10:16
- ↑ Mat 10:9 b.t.; SalII 4:29
- ↑ Mat 10:12 b.t.
- ↑ KorI 10:27; Mat 10:10
- ↑ Mat 3:2
- ↑ Mat 10:14 b.t.
- ↑ Ayati 13-16: Mat 11:20-24
- ↑ Mat 10:40; TesI 2:13; 4:8
- ↑ Faigi 9:1,10
- ↑ Yoh 12:31; Fam 12:9
- ↑ Mat 16:18; Sin 91:13
- ↑ Fil 4:3; Fam 20:12; 21:27
- ↑ Mat 11:25-27
- ↑ Yoh 17:10; Heb 2:8
- ↑ Mat 13:16,17
- ↑ Mat 24:35 b.t.; Mar 12:28 b.t.
- ↑ MozV 6:5; MozIII 19:18
- ↑ MozIII 18:5; Rom 10:5
- ↑ Faigi 17:16; Yoh 4:9; 8:48
- ↑ Faigi 6:36
- ↑ Yoh 11:1; 12:1-3
- ↑ MozV 33:3
- ↑ Sin 27:4; Mat 6:33; Yoh 6:47,33
Fabaliŵa lala
[edit source]Olayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö