Wb/nia/Luka/22
Famagölö ndra ere ba wamunu Yesu[edit | edit source]
I. 1 Ba lö ara tö,[1] ba owasa roti si lö mu'aisöni andrö, nifotöi fasa. 2 Ba la'alui lala wamunu ya'ia ere sebua ba sangila amakhoita; ata'u sa ira niha sato.[2]
3 Ba möi Zatana ba dödö Yuda andrö,[3] sotöi banua Kariota, awö zi felendrua andrö.[4] 4 Ba möi ia fahuhuo khö ndra ere sebua ba khö ndra kumandra, he wisa lala wangombakhania ya'ia khöra.
5 Ba omuso dödöra, ba la'osara'ö li, ba wame'e ana'a khönia. 6 Ba itehe, ba i'alui zi sökhi lala, wangombakha ya'ia, ba zi lö niha.
Femanga ni'amoni'ö[edit | edit source]
II. 7 Ba irugi baŵa roti si lö mu'aisöni no mege,[5] ba nitaba fasa andrö.
8 Ba ifatenge ndra Fetero Yohane Yesu, imane: Mi'ae mi'asiwai khöda wasa andrö, ena'ö ta'a.
9 Ba lamane khönia: Heza zomasi ndra'ugö, ma'asiwai?
10 Ba imane khöra: Hiza, na mirugi yomo ba mbanua, ba falukha ami niha, solohe migö nidanö, da'ö mi'o'ö, ba nomo, ba zi möi ia, 11 ba mimane ba zokhö omo andrö: Da'ö niŵa'ö zamahaö ya'aga khöu: Heza so naha andrö khögu, ba wemanga wasa, awö nifahaögu? 12 Ba i'oroma'ö dania khömi mbate'e sebua, yaŵa ba zi sagötö, si no mubologö tufo; ba da'ö mi'asiwai.
13 Ba möi ira, ba itörö niŵa'önia khöra; ba la'asiwai wasa andrö.
14 Ba me no inötö,[6] ba mudadao ia manga, ba awönia zinenge andrö si felendrua.
15 Ba imane khöra: No humulu sibai dödögu, ba wemanga wasa andre, awömi, föna wamakao ya'o andrö. 16 Uŵa'ö sa khömi, lö'ö sa'ae u'a, irege no itörö ba mbanua Lowalangi andrö.
17 Ba ihalö mako, i'aohasi gölö Lowalangi, ba imane: Mitema da'e ba mifosasi khömi. 18 Uŵa'ö sa khömi, lö'ö sa'ae ubadu nösi mbua nagu, i'otarai da'e, irege alua mbanua Lowalangi andrö.[7]
19 Ba ihalö roti,[8] i'aohasi gölö Lowalangi, iboboto roti ba ibe'e khöra, imane: Botogu da'e, nibe'e salahimi; mitörö-törö tödömi ndra'o, ba zi mane.[9] 20 Ba si manö göi mako andrö, me no aefa manga ira, ba imane: Amabu'ula li si bohou mako andre, ba ndrogu, saduwa dania salahimi.
21 Ba hiza,[10] no orudu ba wemanga andre danga zi manga mböligu. 22 Möi sa Nono Niha, itörö nihonogöi; ba alai niha andrö, si manga mbölinia. 23 Ba ibörötaigö faoma lasofu khö nawöra, ha niha maö ia, ba khöra andrö, solau da'ö dania.
Famadöni haniha wondrege zebua[edit | edit source]
III. 24 Ba tesao göi wamadöni ba khöra, ha niha zebuara maö.[11]
25 Ba imane khöra: Mamatörö banuara zalaŵa ba niha baero, ba si so niha barö mbawa, ba lafotöi sebua tödö.[12] 26 Ba ya'ami, ba tenga si manö; sebuami, ba yahulö si mane si akhi, ba solohe, ba yahulö si mane enoni.[13] 27 Ha niha sa zebua? sidadao manga, ba ma sangai halöŵö? Hadia, tenga sidadao manga? Ba ya'o, ba khömi, ba no hulö zangai halöŵö.[14]
28 Ba ya'ami zi lö faröi-röi khögu, ba wanandraigö ya'o andrö. 29 Ba ya'o ba uhonogöi khömi, si mane fangohonogöi Nama khögu banua andrö,[15] 30 ena'ö orudu manga ami khögu ba mamadu-madu hadia ia, ba mbanuagu andrö, ba ena'ö dumadao dania ami ba dadaoma, manguhuku Iraono Gizeraeli, si felendrua tua andrö.[16]
Famangelama Wetero[edit | edit source]
IV. 31 He Simoni! He Simoni! hiza no i'andrö khönia Satana, ena'ö itafi'ö ami, hulö wakhe,[17] 32 ba no mangandrö ndra'o, salahiu, ena'ö lö aetu wamatimö, ba ya'ugö, na no öfalalini gera-erau dania, ba abe'e'ö dalifusöu.[18]
33 Ba imane khönia: He Tua, tola manö sa'ae möido awöu, he ba gurunga, ba he ba wa'amate.[19]
34 Ba imane: Uŵa'ö khöu, Fetero, lö fakhamö miwo zilatao bongi dania, ba no medölu ö'osilö'ögö wangila ya'o.
35 Ba imane khöra: Me ufatenge ami no, si lö kabe-kabe, si lö bola, si lö badagahe, hadia no irai ambö khömi hadia ia? Ba lamane: Lö irai.[20] 36 Ba imane khöra: Ba iya'e, ba ha niha zi so kabe-kabe ba yamuhalö, si manö göi mbola, ba si lö'ö, ba yamu'amawa mbarunia sebua, ba yamu'öli wöda. 37 Uŵa'ö sa khömi, lö tola lö itörö ba khögu da'ö, si so ba zura: "Ba no tebe'e awö zebua horö ia"; itörö sa nitandrösaigö khögu andrö.[21]
38 Ba lamane: He Tua, hiza wöda, dua rozi. Ba imane khöra: Abönö.
Fangandrö ba kabu Gezemane[edit | edit source]
V. 39 Ba möi ia baero,[22] isaŵa gahe hili wanikha, no to'ölö ia ba zi manö.
40 Ba la'o'ö ia nifahaönia. Ba me no irugi, ba imane khöra: Mi'angandrö, fa böi itörö ami fanandraigö.
41 Ba iheta ia khöra, ikhamö tebu-tebu kara wa'aröu, ba ibalöduhini tou danö, mangandrö, imane: 42 He Ama, ena'ö na öfatalu'i'ö khögu mako andrö, ba böi ya'itörö zomasi ndra'o, ha somasi ndra'ugö.[23]
43 Ba to'ele khönia mala'ika, moroi ba zorugo, sangabölö'ö ya'ia. [24] 44 Ba tobali fasöndra ia ba iforege wangandrö. Ba tobali hulö mböi-böi ndro mböböinia, atoru ba danö.[25]
45 Ba maoso ia, ibato wangandrö andrö i'ondrasi ndra nifahaönia, ba hiza, no mörö ira, ba wa'abu dödö. 46 Ba imane khöra: Hadia wa mörö ami? Mifaoso! mi'angandrö, fa böi itörö ami fanandraigö.
Fondra'u ya'ia[edit | edit source]
VI. 47 Ba me humede ia na,[26] ba hiza niha, ba sotöi Yuda andrö, awö zi felendrua, zangoloi'ö ya'ira, ba i'ondrasi Yesu, ba wangago bawania.
48 Ba imane khönia Yesu: He Yuda, hadia fa'ago bawa ndra'ugö khö Nono Niha, wemanga mbölinia?
49 Ba me la'ila si fao khönia he wisa, ba lamane: he Tua! Hadia, ma'ö'ötö ira föda? 50 Ba i'ö'ötö zawuyu gere sebua si samösa, awöra, i'eŵa dalingania, kambölö.
51 Ba humede Yesu, imane: Noa, böi mitohugö. Ba ibabaya dalinga andrö, ifadöhö zesokho.
52 Ba imane Yesu ba gere sebua andrö, ba gumandra ba gosali ba ba zatua andrö, si möi mondra'u ya'ia: Hulö ba zorabu möi ami, moföda ami, ba mobago gama. 53 Me ero ma'ökhö ndra'o khömi ba gosali, ba lö nibabayami ya'o. Ba da'e ginötö, ba da'e wa'abölö zogömi-gömi andrö.
Fangosilö'ögö Wetero[edit | edit source]
VII. 54 Ba me no lara'u ia,[27] ba la'ohe, ladölö ba nomo gere sebua andrö. Ba i'o'ö Fetero, aröu ia, moroi furi.
55 Ba me no la'ebua'ö galitö ba dalu golayama, me dumadao ira, ba dumadao göi Wetero ba ngaira.
56 Ba i'ila ia sawuyu ono alawe, me dumadao ia ba haga galitö, ifaigi ia, imane: Da'ö göi nawönia. 57 Ba i'osilö'ögö, imane: Lö u'ila ha niha da'ö, alawe.
58 Ba lö ara, ba i'ila ia tanö bö'ö ba imane: Awöra göi ndra'ugö. Ba imane Fetero: Tenga le. 59 Ba so saza gotalua, ba ifaduhu'ö tanö bö'ö, imane: Si ndruhu, da'e göi nawönia, banua Galilaia sa göi ia. 60 Ba imane Fetero: Lö u'ila hadia niŵa'öu, le.
Ba i'anema'ö, me humede ia na, ba miwo zilatao.
61 Ba ibali'ö ia So'aya, ifaigi Wetero; ba itörö tödö Wetero niŵa'ö Zo'aya andrö, me imane khönia: Lö fakhamö miwo zilatao bongi, ba no medölu ö'osilö'ögö ndra'o.[28]
62 Ba möi ia baero, mege-ege sibai.
Fangetu'ö hukunia[edit | edit source]
VIII. 63 Ba la'o'aya Yesu niha andrö,[29] solohe ya'ia, laböbözi ia, 64 labalugö ia, ba lasofu khönia, lamane: Fa'ele'ö, ha niha zamözi ya'ugö? 65 Ba oya na ngawalö tanö bö'ö laŵa'ö khönia, wanandraŵaisi ya'ia.
66 Ba me no moluo, ba falukha zatua mbanuara ba ere sebua ba sangila amakhoita, ba la'ohe ia ba rafe khöra, lamane: Na Keriso andrö ndra'ugö, ba ombakha'ö khöma.[30]
67 Ba imane khöra: Na uŵa'ö khömi, ba lö faduhu dödömi.[31] 68 Ba na manofu ndra'o, ba lö mitema ligu. 69 Ba i'otarai da'e, ba dumadao Nono Niha ba gambölö wa'abölö Lowalangi andrö.
70 Ba lamane fefu: Ba Ono Lowalangi ndra'ugö? Ba imane khöra: Ya'ia niŵa'ömi.
71 Ba lamane: Hadia guna wamaduhu'ö sa'ae khöda? Tögi dalingada sa'ae zamondrongo, me iŵa'ö.
Famotokhi ba gahe[edit | edit source]
- ↑ Ayati 1-2: Mat 26:1-5; Mar 14:1,2
- ↑ Mat 21:46
- ↑ Ayati 3-6: Mat 26:14-16; Mar 14:10-11
- ↑ Yoh 13:27
- ↑ Ayati 7-13: Mat 26:17-20; Mar 14:12-16
- ↑ Ayati 14-18: Mat 26:26-29; Mar 14:22-25
- ↑ Mat 26:29
- ↑ Ayati 19-20: Mat 26:27-29; Mar 14:22-25; KorII 11:23 b.t.
- ↑ Yoh 6:51
- ↑ Ayati 21-22: Mat 26:21-25; Mar 14:18-21
- ↑ Faigi 9:46
- ↑ Mat 20, 25 b.t.
- ↑ Rom 12:10; Fil 2:3
- ↑ Yoh 13:4-14; Mat 20:28
- ↑ Faigi 12:32; Fam 3:21
- ↑ Mat 19:28
- ↑ FetI 5:8
- ↑ Yoh 21:15
- ↑ Mat 26:33 b.t.; Yoh 13:37 b.t.
- ↑ Faigi 9:3
- ↑ Faigi 24:32; Yes 53:12
- ↑ Ayati 39-46: Mat 26:30,36-46; Mar 14:32-42
- ↑ Yoh 6:38
- ↑ Dan 10:18,19; Heb 2:7
- ↑ Heb 5:7
- ↑ Ayati 47-53: Mat 26:47-56; Mar 14:43-50; Yoh 18:2,3,10,11
- ↑ Ayati 54-62: Mat 26:57,69-75; Mar 14:54,66-72; Yoh 18:13-18,25-27
- ↑ Faigi 22:34
- ↑ Ayati 63-65: Mat 26:67,68; Mar 14:65
- ↑ Mat 27:1; Mar 15:1; Yoh 18:28
- ↑ Mat 26:63-66; Mar 14:60-64
Fabaliŵa lala[edit source]
Olayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö