Wb/nia/Luka/12

From Wikimedia Incubator
< Wb‎ | nia‎ | Luka
Wb > nia > Luka > 12

Fangelama ba waminitödö ba ba wangata'ufi niha[edit | edit source]

I. 1 Ba owulo niha sato, ba ngafulu ngahönö, tobali lahundragö nawöra, ba ibörötaigö Yesu, imane ba nifahaöinia ua: Mi'angelamaisi danömö roti ba warizaio andrö, famini tödö andrö.[1]

2 Lö'ö sa hadia ia nibalugö,[2] si lö tebokai dania, ba lö si tobini, si lö te'ila dania. 3 Andrö, ha wa'oya niŵa'ömi ba zogömi-gömi, ba ba haga terongo, ba hadia niŵa'ömi ba dögi dalinga, si bakha, ba ba dete nomo yaŵa teturiagö.

4 Ba uŵa'ö khömi si fahuwu khögu: böi mi'ata'ufi zamunu boto, ba aefa ö, ba lö la'ila mulau hadia ia. 5 Ba u'oroma'ö khömi, ha niha ni'ata'ufimi; mi'ata'ufi zi tola manibo ba narako, na no aefa ibunu. Si ndruhu, uŵa'ö khömi, da'ö mi'ata'ufi.

6 Tenga lima sagada la'amawa ziliŵi nali? ba sambua lö solifu Lowalangi da'ö. 7 Ba rozi mbu ba högömi göi fefu, ba no mu'erai; böi ata'u ami, no tohude ami moroi ba ziliŵi nali, he ŵa'ae oya ira,[3]

8 Ba uŵa'ö khömi: Ha niha fefu zamaduhu'ö ya'o ba niha, da'ö nifaduhu'ö Nono Niha göi dania föna mala'ika Lowalangi andrö. 9 Ba ha niha zangosilö'ögö ya'o ba niha, da'ö ni'osilö'ögö föna mala'ika Lowalangi andrö dania.

10 Ba ha niha fefu zanandraŵaisi Ono Niha, ba ni'efa'ö khönia da'ö; ba ha niha zanandraŵaisi Eheha ni'amoni'ö, ba lö te'efa'ö khönia.[4]

11 Ba na la'ohe ami ba walukhata ba ba zalaŵa ba ba zolohe huku, ba böi mi'abusi tödö he miwisa ba hadia wamu'a, ba hadia niŵa'ömi.[5] 12 Eheha ni'amoni'ö sa dania zamahaö ya'ami, ba da'ö sibai, hadia niŵa'ö.

Fa'omasi gana'a ba fa'abu dödö ba mbalazo[edit | edit source]

II. 13 Ba so zamösa, awö niha sato andrö, imane khönia: He samahaö, ŵa'ö khö ga'agu, ena'ö mafaosa göndröita zatua.

14 Ba imane khönia: He le! ha niha zamataro ya'o sanguhuku, ba ma samaosa ondröita ba khömi?

15 Ba imane khöra: Mifaigi, mi'angelamaisi wa'omasi gana'a fefu, alakha lö fahöna, fa irugi aurifa si so andrö.[6]

16 Ba iŵa'ö khöra gamaedola, imane: So niha so'ana'a, ba no abölö mbua nowinia. 17 Ba i'era-era tödönia, imane: He uwisa, me lö khögu nahia ba wangirö'ö bua nowigu? 18 Ba imane: Da'ö ulau: Ududugö halasagu, ba segebua moroi ba da'ö ufazökhi, ba da'ö u'owuloi fefu mbua zinanögu ba hadia ia zi so khögu. 19 Ba umane ba dödögu: No fahöna khöu mbalazo, ya'ugö tödögu, ha me uga fakhe lö ahori; honogö'ö, lau manga ba badu-badu hadia ia ba omusoi'ögö!

20 Ba imane khönia Lowalangi: He sambö era-era! bongi andre lahalö nosou, ba nihönamö andrö, ba ha ökhö möi?[7]

21 Si manö lala zangozaragö khönia ana'a, si lö ana'a ba khö Lowalangi.[8]

22 Ba imane ba nifahaönia:[9] Andrö uŵa'ö khömi, böi mi'abusi tödö noso, hadia mbalazomi, ba böi mi'abusi tödö mboto, hadia nukhami. 23 No ebua noso, moroi ba mbalazo, ba no ebua mboto, moroi ba nukha.

24 Mitöngöni gaga, lö'ö sa manaru ira ba lö mamasi, lö khöra lou ba lö halasa, ba ibalazoi ira Lowalangi; tenga no aröu tohude ami moroi ba wofo?

25 Ba ha niha ba khömi zangila mondrou'ö fa'anau nosonia samba si'u, na i'abusi tödö?

26 Ba na tebai göi ami ba wondrege zide-ide, ba hana wa mi'abusi tödö danö bö'ö?

27 Mitöngöni ladari mböhö andrö, lö'ö sa managu ba lö manoso; uŵa'ö khömi, lö'ö göi manö nukha Zelomo ba lakhöminia andrö fefu, si mane nukha zi sara da'ö. 28 Ba na imanö Lowalangi wamonukha du'u ba danö, si so ma'ökho, nitibo'ö ba galitö mahemolu, ba tenga mendrua manö imanö khömi, sambö famati?

29 Ba ya'ami, ba böi mi'alui hadia ni'a, hadia nibadu, ba böi fawuka dödömi. 30 Niha guli danö andre sa zangalui da'ö fefu, ba Amami andrö, ba no i'ila, wa soguna khömi da'ö. 31 Ba mi'alui mbanuania, ba tebe'e nönö-nönö khömi da'ö.

32 Böi mi'ata'ufi, ya'ami, rorogöfö gubalo, si lö atoto; noa sa fa'omasi Nama, khömi dania mbanua andrö. [10]

33 Mi'amawa zi so khömi, ba mibe'e ame'ela ba zi numana. Mi'asogö khömi mbola si tebai obou, awö girö-girö si lö ahori-hori, ba zorugo, si tebai irugi sanagö ba si lö ifakiko hama. [11] 34 Ba zi so girö-girömi sa, ba da'ö göi so dödömi dania.[12]

Falö mörö ba falö faröi[edit | edit source]

III. 35 Böi aefa-aefa mböbö talu ba löwi-löwimi, ba böi mate-mate wandrumi, [13] 36 ya hulö niha sombalo-mbaloi sokhö ya'ira ami, na mangawuli ia moroi ba walöŵa, ena'ö i'anema'ö labokai khönia, na so ia, na ibökö mbawandruhö.[14]

37 Ya'ahowu zawuyu andrö, na lö mörö ira i'ila sokhö ya'ira, na so ia; si ndruhu niŵa'ögu khömi, molembe ia dania, ifedadao ira ba möi ia ngoni-ngonira.[15]

38 Ba na so ia, na no mörö niha ba ma na no aefa talu mbongi, ba na si manö zui, i'ila, ba ya'ahowu ira.[16] [17]

39 Ba böi zi lö aboto ba dödömi da'ö: Na no i'ila ena'ö sokhö omo ha wa'alaŵa mbóngi so zanagö, ba lö ifa'amöi ba nomonia ena'ö.[18]

40 Ba ya'ami göi, mifa'anö ami, na lö midöna-döna sa dania so Nono Niha. [19]

41 Ba imane khönia Fetero: He Tua, hadia, khöma öŵa'ö gamaedola andrö, ba ma ba khöra fefu göi?

42 Ba imane So'aya: Ha niha zatua zangai halöŵö, si lö faröi si no atua-tua, nibe'e zokhö barö mbawa sangai halöŵö khönia, ba wame'e göra, na inötö? 43 Ya'ahowu zawuyu andrö, na i'ila sokhö ya'ia, na so ia, no i'o'ö zi manö. 44 Si ndruhu niŵa'ögu khömi, ibe'e barö mbawania fefu hadia ia zi so khönia.

45 Ba na iŵa'ö ena'ö tödönia sawuyu no mege: "Mogasa so zokhö ya'o", ba na ibörötaigö ibago-bago zawuyu ira matua ba sawuyu ira alawe, ba na manga-manga ia ba mamadu-madu tou ba mabu-mabu, 46 ba so dania zokhö sawuyu andrö, na luo lö idöna-döna, ba ha wa'alaŵa luo, ba lö i'ila, ba i'ötö dalu ba ibe'e gurakhania, awö zi lö mamati. 47 Ba sawuyu andrö, si no mangila somasi zokhö ya'ia, ba si lö mangasiwai hadia ia ba si lö molo'ö somasi zokhö, ba la'abölögö wamözi.[20]

48 Ba ha niha zi lö mangila, ba ilau hadia ia zi göna ia bözi-bözi, ba la'önaigö wamözi ya'ia. Ba dozi, ha khö zoya labe'e, ba oya lasugi khönia, ba ha khö zoya labe'e ba danga, ba oya göi la'andrö khönia.

Fa'udusa börö Keriso[edit | edit source]

IV. 49 Ba wolohe alitö ba guli danö so ndra'o, ba omasido sibai, na no muhola ia ena'ö;[21] 50 ba so nibayagö khögu dania, ba lö ahono dödögu ibe'e, irege no awai.

51 Hadia, miwai ba wolohe fa'atulö ba guli danö so ndra'o! Tenga da'ö, uŵa'ö khömi, ba wolohe fa'udusa möi ndra'o.[22]

52 I'otarai da'e sa, ba fa'udu zi dalima, si ha samba omo; fa'udu zi datölu ba zi darua, ba fa'udu zi darua ba zi datölu. 53 Fa'udu nama khö nono ba fa'udu nono khö nama, ba ina khö nono alawe ba ono alawe khö nina, inania khö numönö ba umönö khö ninania matuania.

Tandra nitöngöni[edit | edit source]

V. 54 Ba imane göi ba niha sato: Na mi'ila so lawuo moroi ba gahe mbanua, ba gaekhula luo, ba i'anema'ö mimane: So deu dania, ba itörö zi manö.[23] 55 Ba na angi moroi raya, ba mimane: Aukhu zino dania, ba itörö.

56 He ya'ami, samini tödö! amuata danö ba amuata mbanua, ba no mi'ila mihuku, ba inötö andre, ba he wisa wa lö mi'ila mihuku? 57 Ba hana wa tenga moroi ba dödömi manö göi mihuku, hadia zatulö?

58 Na fao ami zi fa'udu khöu, we'amöi ba gumandru, ba forege ba lala, ena'ö aefa ndra'ugö khönia, fa böi isöbi ndra'ugö khö zanguhuku, ba ibe'e ba danga wazuri ndra'ugö sanguhuku, ba ikuru'ö fazuri.[24] 59 Uŵa'ö khöu, lö'ö manö aefa'ö ba da'ö, na so zi tosai si sakefe, ömöu, si lö mubu'a.

Famotokhi ba gahe[edit | edit source]

  1. Mat 16:6
  2. Ayati 2-9: Mat 10:26-33
  3. Luk 21:18
  4. Mat 12:31 b.t.
  5. Luk 21:14 b.t.; Mat 10:19 b.t.; Mar 13:11
  6. TimI 6:7-10; Amaed 23:4
  7. Sin 39:7; Yob 27:8
  8. TimI 6:17; Sin 73:25 b.t.
  9. Ayati 22-31: Mat 6:25-31
  10. Faigi 22:29; Yes 41:10,14
  11. Faigi 16:9; 18:22; Mat 6:19; Heb 10:34
  12. TimI 6, 19
  13. Efes 6:14; FetI 1:13; Mat 5:16
  14. Mat 25:1-13
  15. Mat 24:25 b. t
  16. Mar 13:35
  17. Ayati 39-46: Mat 24:43-51
  18. TesI 5:2
  19. Faigi 21:34-36
  20. Yak 4:17
  21. Yes 4:4
  22. Mat 10:34 b.t.
  23. Mat 16:2 b.t.
  24. Mat 5:25 b.t.

Fabaliŵa lala[edit source]

Olayama Zura Luka: 123456789101112131415161718192021222324

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö