Wb/nia/Luka/20
Fanofu haniha zanehe nilau Yesu
[edit | edit source]I. 1 Ba ha samuza ma'ökhö, me ifahaö niha ba gosali, me i'ombakha'ö duria somuso dödö andrö, ba so gere sebua ba sangila amakhoita ba satua mbanua andrö, 2 muhede ira khönia, lamane: Ŵa'ö khöma: Hadia, wa tola ölau da'ö, ba ha niha ia, zanehe khöu?
3 Ba itema lira, imane khöra: So göi zambalö nisofugu khömi, ba mi'ombakha'ö khögu: 4 Famayagö idanö andrö khö Yohane no, hadia, moroi ba zorugo ma moroi ba niha?
5 Ba la'era-era tödöra, lamane: Na taŵa'ö: Moroi ba zorugo, ba imane dania khöda: Ba hana wa lö samati ami khönia! 6 Ba na taŵa'ö: Moroi ba niha, ba latebu kara ita niha sato fefu; a'oi sa faduhu dödöra, wa no sama'ele'ö Yohane andrö.
7 Ba laŵa'ö khönia, lö la'ila, he moroi.
8 Ba imane khöra Yesu: Ba lö'ö göi uŵa'ö khömi, hadia wa tola ulau da'ö.
Amaedola zohalöŵö ba kabu nagu
[edit | edit source]II. 9 Ba ibörötaigö iŵa'ö ba niha gamaedola andre:[1] So niha, samazökhi kabu nagu, ba ibe'e niwawalö ba zohalöŵö, ba isaŵa danö bö'ö, ara ia.
10 Ba me baŵa mbua, ba ifatenge zawuyu ba zohalöŵö andrö, ena'ö labe'e khönia mbua kabu nagu andrö ösa. Ba latema laböbözi da'ö sohalöŵö ba kabu nagu andrö, ba lafatenge mangawuli, lö labe'e.
11 Ba itohugö, ifatenge zawuyu tanö bö'ö. Ba ya'ira, ba laböbözi da'ö göi, la'o'aya, ba lafatenge mangawuli, lö labe'e.
12 Ba itohugö ifatenge, datölu sa'ae. Ba lafesokho da'ö, ba latibo'ö baero.
13 Ba imane sokhö kabu nagu andrö: He uwisa? Da'ufatenge nonogu omasiö andrö, te ata'u ira da'ö.
14 Ba me la'ila da'ö sohalöŵö ba kabu andrö, ba fahuhuo ira, lamane: Sanema ondröita da'ö, databunu ia, ena'ö khöda möi gondröita andrö. 15 Ba latibo'ö ia baero kabu nagu andrö ba labunu.
Ba he iwisa khöra dania sokhö kabu nagu andrö? 16 Möi ia dania, ba ifakiko zohalöŵö andrö, ba ibe'e ba danga danö bö'ö kabu nagu no mege.
Ba me larongo da'ö, ba lamane: Böi si manö.
17 Ba inehegö ira ba imane: Ba hadia ia zi so ba zura andrö: "Gowe andrö, nitibo'ö zotomo andrö, ba no tobali toyo ba watalinga?" 18 Ba sarasa fefu zalau ba gowe andrö, ba nilangönia, ba imama.
19 Ba la'alui lala wondra'u ya'ia sangila amakhoita ba ere sebua, ba da'ö sibai, ba ata'u ira niha sato. Noa sa aboto ba dödöra, wa khöra iböbögö gamaedola andrö.[2]
Fanofu sanandrösa ba mbeo
[edit | edit source]III. 20 Ba latarogö ia,[3] ba lafatenge zamauze, samini'ö tödöra, hulö na satulö tödö ira, ena'ö la'alani ia ba huhuonia, ba wame'e ba danga zalaŵa ya'ia, ba ba danga gumandru.
21 Ba lasofu khönia, lamane: He samahaö, ma'ila wa no satulö niŵa'öu, awö wamahaömö, ba lö öfaigi mbawa niha, ha si ndruhu manö khöu, wangombakha lala Lowalangi andrö. 22 Hadia, tola tabe'e mbeo khö kaizaro, hadia lö'ö?
23 Ba me no i'ila wa'onekhera andrö, ba imane khöra: Mi'oroma'ö khögu hua suku. Ha famaedo da'e khönia ba ha khö zurania? 24 Ba lamane khönia: Khö kaizaro. 25 Ba imane khöra: Na si manö, ba mibe'e khö kaizaro, hadia khö kaizaro, ba hadia khö Lowalangi, ba mibe'e khö Lowalangi.
26 Ba tebai la'alani ia ba niŵa'önia, ba niha sato, ba ahöli-höli dödöra ba wanemania li andrö, ba lö hede-hedera sa'ae.
Fanofu sanandrösa ba wemaoso zimate
[edit | edit source]IV. 27 Ba so zadukaio andrö,[4] ösa, sanguma'ö lö femaoso zi mate, lasofu khönia, lamane:
28 He samahaö, no ibe'e ba zura khöma Moze, na mate zi so talifusö, si so donga, ba na lö ono, ba yamuhalö ndronga andrö talifusönia, ba yamufonga'ötö dalifusönia si mate andrö. 29 Ba no so zi fatalifusö, dafitu, ba mangowalu zi samösa, ba mate, lö ono, 30 ba ihalö ndra alawe andrö fanete da'ö ba fanete da'ö zui, 31 ba si manö-manö, dafitu, oi mate, lö ono. 32 Ba ba gafuriata, ba mate göi ndra alawe andrö. 33 Ba ira alawe andrö, ha donga ia, ba khöra andrö, ba wemaoso zi mate andrö dania? No dozi lahalö ia, dafitu.
34 Ba imane khöra Yesu: Niha zi sagötö tanö andre zangowalu ba tebe'e nihalö. 35 Ba si tola ba mbanua furi andrö, si tola maoso moroi ba ngai zi mate, ba lö mangowalu ba lö labe'e nihalö. 36 Tebai sa mate ira sa'ae göi, hulö mala'ika sa'ae, ba ono Lowalangi ira, me ono wemaoso andrö. [5] 37 Ba femaoso zi mate andrö, ba no itörö göi li Moze, ba ngafu ndroi andrö, me ibe'e töi Zo'aya Lowalangi Gaberahamo ba Lowalangi Giza'aki ba Lowalangi Yakobo. 38 Ba tenga Lowalangi zi mate Lowalangi, no Lowalangi zauri; a'oi sa auri ira khönia.
39 Ba latema linia sangila amakhoita ösa, lamane: Duhu niŵa'öu, samahaö.
40 Ba ata'u sa'ae ira manofu khönia hadia ia.[6]
Fanofu nga'ötö Yesu
[edit | edit source]V. 41 Ba imane khöra:[7] He wisa wa laŵa'ö ma'uwu Dawido Keriso andrö? 42 Ba Dawido sa zanguma'ö ba zura zinunö andrö: "No iŵa'ö So'aya khö Zo'aya ya'o: Dadao ba gambölögu, 43 irege no ube'e tou barö gaheu zi fa'udu khöu." 44 Tobali faso'aya khönia Dawido; ba he wisa, wa ma'uwunia ia?
Fangelama ba zangila amakhoita
[edit | edit source]VI. 45 Ba me lafondrondrongo niha sato fefu,[8] ba imane ba nifahaönia:
46 Mi'angelamaisi zangila amakhoita andrö; somasi mamaru baru sanau, somasi na la'owai ira ba kade, awö wedadao ba dadaoma tanö si yaŵa, ba zekola ba ba walöŵa,[9] 47 sangohori balazo lakha mbanua, sangaragö fangandrö-ngandrö, fa la'ila niha; tedou manö huku, nifatörö khöra dania.
Famotokhi ba gahe
[edit | edit source]Fabaliŵa lala
[edit source]Olayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö