Wb/nia/Luka/15
Amaedola mbiri-biri selungu ba hua suku[edit | edit source]
I. 1 Ba oi la'ondrasi ia sanema beo ba sebua horö, ba wamondrondrongo huhuonia.[1]
2 Ba kumökö-kökö warizaio ba sangila amakhoita, lamane: Ifa'amöi khönia zebua horö da'ö ba orudu manga ia khöra. [2]
3 Ba ilau khöra gamaedola andre, imane:
4 Ha niha ba khömi zi so biri-biri, otu nga'eu, ba na elungu zageu, hadia lö iröi ba danö si mate zi siŵa wulu a siŵa, ba i'o'ö zi sageu andrö, irege isöndra?[3]
5 Ba na no isöndra, ba i'angalisigö, omuso dödönia,[4] 6 ba na irugi yomo, ba ikaoni zi fahuwu khönia, awö zi fahatö omo khönia, imane khöra: Akha omuso dödömi, awögu, me no usöndra mbiri-birigu andrö, si no elungu andrö? 7 Uŵa'ö khömi, si manö göi wa'omuso dödö ba zorugo, ba niha, samalalini era-era, he ha samösa, moroi ba wa'omuso dödö ba zi siŵa wulu a siŵa, si lö moguna famalalini era-era.[5]
8 Ba heza so ndra alawe, si so hua suku, fulu nga'örö, ba na aekhu zagörö khönia, hadia, lö itunu wandru, ba lö ibözini nomo, ba lö iforege wangalui, irege isöndra? 9 Ba na no isöndra, ba ikaoni ndra alawe si fahuwu khönia, awö zi fahatö omo khönia ba imane: Akha omuso dödömi, awögu, me no usöndra hua suku andrö, si no aekhu.
10 Uŵa'ö khömi, si manö wa'omuso dödö ba zanehe mala'ika andrö, ba zorugo, ba niha, samalalini era-era, he ha samösa.
Amaedola nono selungu[edit | edit source]
II. 11 Ba imane: So niha föna, si so ono matua, darua. 12 Ba imane si akhi khö nama: He ama, be'e khögu dana khögu gana'a andrö. Ba ifaosa khöra zi so andrö.
13 Ba lö ara furi ö, ba i'ozaragö fefu hadia ia siakhi nono andrö no mege, ilau mofanö, isaŵa danö saröu ba ba da'ö ihori gana'ania, manibo manö ia.[6]
14 Ba me no ihori fefu hadia ia, ba itörö lofo sabölö-bölö danö andrö ma'asagörö, ba ibörötaigö lö balazo khönia.
15 Ba möi ia mu'olembai niha ba danö andrö, samösa, manga gazi; ba ifatenge ia da'ö ba mbenuania, ba wokubaloi bawi. 16 Ba omasi ia ifo'ösi dalunia lölö mbanio, ö mbawi, ba lö same'e khönia.
17 Ba i'era-era tödönia ba imane: Ha wa'ato zangai halöŵö khö namagu, si lö ambö ö, ba ya'o, ba tekiko wa'olofo ba da'e.[7] 18 Damaoso ndra'o, möido khö namagu ba umane khönia: He ama! no ufazökhi horö ba zorugo ba fönau, [8] 19 tenga sa'ae si nangea laŵa'ö onou ndra'o, akha hulö zi manga gazi ndra'o khöu, samösa.
20 Ba maoso ia, möi ia khö namania. Ba me aröu ia na, ba i'ila sa'ae ia amania, ba ahakhö dödö, fagohi ia, italagui mbagi, fa'ago bawa ia khönia.[9]
21 Ba imane khönia ono: He ama, no ufazökhi horö ba zorugo ba fönau, tenga sa'ae si nangea laŵa'ö onou ndra'o.
22 Ba imane ama ba zawuyunia: Mihalö mbaru luo si sökhi andrö ba mibe'e barunia, mibe'e laeduru ba durunia ba badagahe ba gahenia,[10] 23 ba mihalö nono zaŵi nibula andrö, mitaba ba ta'a, akha omuso dödöda, 24 me no ifuli auri nonogu andre, si no mate, no elungu ia, ba no musöndra. Ba i börötaigö omuso dödöra.[11]
25 Ba no so ba nowi nononia si a'a. Ba me ifuli ia me ahatö ia ba nomo, ba irongo wanuno ba folaya. 26 Ba humede ia khö zawuyu, isofu khönia hadia da'ö.
27 Ba imane khönia da'ö: No so nakhiu andrö, ba no ifataba'ö nono zaŵi nibula andrö amau, me no mangawuli ia khönia, me lö si göna ia hadia ia.
28 Ba mofönu ia ba lö edöna möi ia yomo. Ba möi tou namania, ifarou dödönia. 29 Ba itema li namania, imane: Hiza, ha me uga fakhe enoniu ndra'o, ba lö urai usawö goroisamö, ba khögu lö örai öbe'e nono mbiri-biri, ena'ö omuso dödögu, awö zi fahuwu khögu.30 Ba me no so nonou andrö, si no mangohori ana'ania, awö zohorö-horö, ba no öfataba'ö khönia nono zaŵi nibula andrö.[12]
31 Ba imane khönia: He onogu, si lö tebulö khögu ndra'ugö, ba hadia ia fefu zi so khögu ba khöu. 32 Ba somuso tödö sa ita ena'ö, sowua-wua tödö, me no ifuli auri nakhiu andrö, si no mate; no elungu ia, ba no musöndra.
Famotokhi ba gahe[edit | edit source]
Fabaliŵa lala[edit source]
Olayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö