Wb/nia/Luka/2

From Wikimedia Incubator
< Wb‎ | nia‎ | Luka
Wb > nia > Luka > 2

Fa'atumbu Yesu[edit | edit source]

Tradisi wamazökhi kandra mbiri-biri nahia wa'atumbu Yesu ba ginötö wangowasaini Natal. Bakha ba seni simane andre te'oroma'ö wa'ebua dödö Zo'aya me itehe tobali lumana ia ena'ö te'orifi niha.

I. 1 Ba me luo da'ö, ba ibe'e goroisa kaizaro Auguso, latanö ba zura fefu döi niha ba danö. 2 Fananö töi andrö, ba si föföna, me luo kumandru ba Ziria Girenio andrö. 3 Ba möi niha fefu, ba wamatanö'ö töira ba zura, isaŵa mbanua zatua khöra zamösana.

4 Ba möi göi misi yaŵa Yosefo andrö, moroi ba Galilaia, moroi ba mbanua Nazareta; isaŵa Yudaia, mbanua Dawido andrö, sotöi Betilekhema, me ma'uwu Dawido ia,[1] 5 ba wamatanö'ö ba zura töira, awö Maria, fo'omonia, si no manabina.[2]

6 Ba tobali, me so ira ba da'ö, ba irugi baŵania wo'ono, ba madono ia, 7 ononia si a'a, ono matua, ilölö ba ifagaya ba luha, me lö nahara ba nomo ba zi mörö zikoli.[3]

8 Ba so gubalo ba danöra andrö, si mörö ba danö, manaro biri-birira, ba zi bongi. 9 Ba i'ondrasi ira mala'ika Zo'aya, ba ifasui ira haga Zo'aya, ba oi so wa'ata'ura.

10 Ba imane khöra mala'ika andrö: Böi mi'ata'ufi. Hiza sa, uturiagö khömi wa'omuso dödö, sabölö-bölö, si rugi niha fefu dania.[4] 11 Me no tumbu khömi zangorifi andrö, bongi andre, Keriso, So'aya, ba mbanua Dawido. 12 Ba da'ö dandra khömi; ba luha yaŵa dania mi'ila nono, no mulölö.

13 Ba i'anema'ö so mala'ika zorugo sato, awö mala'ika no mege, lasuno Lowalangi, lamane: 14 Lakhömi khö Lowalangi si yaŵa, ba fa'atulö ba guli danö, ba niha ni'omasi'ö andrö.[5]

15 Ba me no mofanö mala'ika andrö, ba zorugo, me no laröi ira, ba faoma lamane kubalo andrö khö nawöra: Talabu ba Mbetilekhema ba tafaigi da'ö, nifa'ombakha'ögö Zo'aya khöda. 16 Ba la'alio'ö we'amöi, ba falukha ira ndra Maria, Yosefo, awö nono no mege, nifagaya ba luha.[6]

17 Ba me no la'ila, ba la'ombakha'ö daroma li andrö, niŵa'ö khöra, ba nono andrö. 18 Ba dozi samondrongo, ba ahöli-höli dödö, ba ni'ombakha'ö gubalo andrö khöra.

19 Ba lö olifu Maria fefu niŵa'ö andrö, ifatou-tou tödönia.

20 Ba lafuli ira kubalo andrö, lafosumange Lowalangi, lasuno ia, ba nirongora ba ba ni'ila höröra, balazi niŵa'ö khöra.

Famoto Yesu[edit | edit source]

Fangaruwusi Yesu ba gosali ndra niha Yahudi

II. 21 Ba me no irugi fitu bongi, ba wamoto ya'ia, ba labe'e töinia Yesu, nitötöi mala'ika no, me lö'ö na tabina ia.[7] 22 Ba me no aefa mbongi wangehao khö Maria, niŵa'ö ba goroisa Moze andrö, ba la'ohe ba Yeruzalema nono, ba wangaruwusi ya'ia khö Zo'aya.[8] [9] 23 La'o'ö zi so ba zura goroisa Zo'aya, imane: Fefu nono matua, na si a'a nono khö ninania, ba ni'amoni'ö khö Zo'aya[10] 24 ba wame'e sumange, si mane niŵa'ö ba goroisa Zo'aya, dombua wune, ba ma dombua nono marafadi.[11]

Fangaruwusi ba gosali[edit | edit source]

III. 25 Ba hiza, so niha ba Yeruzalema Simeoni döinia, ba satulö tödö niha da'ö, sangata'ufi Lowalangi, no ibalo-baloi wondrara dödö Ndraono Gizeraeli andrö, ba so Geheha ni'amoni'ö ba dödönia. 26 Ba no ibokai khönia Eheha Ni'amoni'ö andrö, lö tola i'ila wa'amate, na lö ni'ilania ua Keriso Zo'aya andrö.

27 Ba möi ia ba gosali, nifarou Geheha; ba me la'ohe bakha nonora Yesu ira inania, ba wanörö khönia nifakhoi ba goroisa, 28 ba ihahae göi, isuno Lowalangi, imane:

29 Awena ohahau dödö genoniu, na ö'efa'ö ia, So'aya, itörö niŵa'öu,[12] 30 me no i'ila hörögu wangorifi andrö khöu,[13] 31 si no ö'asogö tanö föna niha fefu, gofu ha soi ira,[14] 32 haga ni'oroma'ö ba niha baero, ba lakhömi mbanuau Iraono Gizeraeli.[15]

33 Ba ahöli-höli dödö ndra amania inania ba niŵa'ö andrö ba khönia.

34 Ba ifahowu'ö ira Simeoni ba imane khö ninania Maria: Hiza, tebe'e dania, ato zalau ba ato zi maoso ba da'e, ba Ndraono Gizeraeli, ba tebe'e tandra ia, nifadaö,[16] 35 ba tödöu andrö, ba itörö föda dania, ena'ö ato zi teboka era-era dödö.

36 Ba so zama'ele'ö ira alawe, Ana döinia, ono Wanueli, mado Gaseri, no arara ba guli danö, no lahalö ia föna, me ono alawe ia na, ba ha mewitu fakhe, 37 ba lakha mbanua ia, no ŵalu ngafulu a öfa fakhe wa'atua. Lö iröi-röi gosali, ifosumange Lowalangi famoni ba fangandrö-ngandrö, bongi ma'ökhö.[17]

38 Ba ba da'ö sibai i'ondrasi ira, isuno Lowalangi ba itörö linia khöra fefu sombalo-mbaloi fangöhöli andrö ba Yeruzalema.[18]

39 Ba me no ahori latörö fefu hadia ia, wolo'ö oroisa Zo'aya andrö, ba lafuli ira ba Galilaia ba mbanuara Nazareta.[19] 40 Ba manöi nono, ba abölö, fahöna khönia wa'atua-tua, ba no falukha ia wa'ebua dödö Lowalangi.[20]

Musöndra Yesu ba gosali[edit | edit source]

IV. 41 Ba ero röfi möi misi yaŵa ba Yeruzalema ndra inania, na owasa fasa.[21] 42 Ba me no mewelendrua fakhe ia, ba möi ira misi yaŵa göi, la'o'ö huku ba gowasa.

43 Ba me no irugi bongi andrö, me lafuli ira, ba toröi ba Yeruzalema nono, Yesu; ba lö la'ila ira inania. 44 Lawai so ia ba nawöra fao, ba möi ira, ma'ökhö fofanö, wangalui ya'ia, ba dalifusöra ba ba zi no fa'ila li khöra.

45 Ba me lö lasöndra ia, ba lafuli ira ba Yeruzalema, wangalui ya'ia. 46 Ba tölu bongi, ba lasöndra ia ba gosali, no dumadao ia ba hunö zamahaö, wamondrondrongo khöra, awö wanofu-nofu khöra.

47 Ba dozi samondrondrongo khönia, ba ahöli-höli dödö, ba wa'atua-tuania ba ba wanemania li.[22]

48 Ba tobali dödöra, me la'ila ia, ba imane khönia inania: He onogu! Hana wa ömanö khöma? Faigi, no abu dödöma amau, wangalui ya'ugö.

49 Ba imane khöra: Hadia wa mi'alui ndra'o? Hadia, lö mi'ila, wa lö tola lö sodo ba nahia Namagu![23]

50 Ba lö aboto ba dödöra daroma li andrö, niŵa'önia khöra.

51 Ba fao ia khöra, we'amöi misi tou, ba larugi Nazareta, ba i'o'ö lira.

Ba itanö ba dödönia da'ö fefu inania.

52 Ba tedou khö Yesu wa'atua-tua ba fa'ebua ba fa'ebua dödö Lowalangi, awö wa'ebua dödö niha.[24]

Famotokhi ba gahe[edit | edit source]

  1. Faigi 1:26,27; SamI 17:12; Mikha 5:2; Yoh 7:41
  2. Faigi 1:31 btn; Mat 1:18 btn
  3. Mat 1:25
  4. Yes 9:2,3,6; 49:6
  5. Rom 5:1; Efes 2:14,17
  6. Mat 2:11
  7. Faigi 1:31
  8. MozIII 12:2 btn
  9. Mangaruwusi eluahania molohe nono sawuyu sawena tumbu föna zatua ma föna Lowalangi ba wangandrö howu-howu. Tehalö moroi ba wehede foruwu eluahania adu zatua.
  10. MozII 13:2,12-15
  11. MozIII 12:6-8
  12. MozI. 46:30
  13. Faigi 3:6; MozI 49:10, 18
  14. Sin 98:2,3; Yes 52:10
  15. Yes 42:6
  16. Yes 8:14 b.t., 28:16; Rom 9:33; KorI 1:23 b.t.
  17. TimI 5:5
  18. Faigi 23:51
  19. Mat 2:19-23
  20. Faigi 1:80
  21. MozII 23:15; MozV 16:1 b.t.
  22. Yoh 7:15
  23. Yoh 4:34
  24. SamI 2:26

Fabaliŵa lala[edit source]

Olayama Zura Luka: 123456789101112131415161718192021222324

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö