Wb/nia/Luka/7
Famadöhö wökhö zawuyu gumandra
[edit | edit source]I. 1 Ba me no i'o'ozui fefu huhuonia,[1] nifondrondrongo niha, ba möi ia miyomo ba Gafanauma. 2 Ba so zofökhö, onali mate, sawuyu gumandra, somasi ia. 3 Ba me irongo Yesu sokhö, ba ifatenge khönia zatua niha Yehuda, ifa'andrö'ö khönia, ena'ö möi ia mu'orifi zawuyunia. 4 Ba me falukha ira Yesu, ba laforege wangandrö khönia, lamane: Tola sa ö'o'ö khönia da'ö; 5 me no sangomasi'ö ya'ita, ba no ya'ia zolau khöda omo zekola andrö.
6 Ba möi Yesu, fao ia khöra.
Ba me no ahatö sa'ae ia ba nomo, ba ifatenge zi fahuwu khönia kumandra andrö, imane: He Tua! böi akao ndra'ugö, ambö sa ndra'o, möi'ö ba nomogu. 7 Andrö göi uŵa'ö tödögu, tenga si nangea möi ndra'o khöu; ba hede manö ha sambua li, ba döhö wökhö zawuyugu. 8 Ya'odo göi, ba no niha, si so barö mbawa zalaŵa ndra'odo, ba so barö mbawagu zaradadu, ba na umane ba zi samösa: Ae'e, ba mofanö ia, ba ba zi samösa: Aine, ba i'ondrasido; ba na uŵa'ö khö zawuyugu: Halöŵöu da'ö, ba ihalö.
9 Ba me irongo da'ö Yesu, ba ahöli-höli dödönia khönia, ba ibali'ö ia ba niha sato, solo'ö ya'ia, imane: Uŵa'ö khömi, ba Ndraono Gizeraeli na i, ba lö nisöndragu famati si manö.
10 Ba me mangawuli ba nomo zinenge no mege, ba no döhö wökhö zawuyu andrö, fönara.
Fanusugi nono matua ba Na'i
[edit | edit source]II. 11 Ba mahemolu ö, ba möi ia ba mbanua, sotöi Na'i, ba ato zi fao khönia nifahaönia, awö niha sato. 12 Ba me no ahatö ia ba mbawa göli, ba hiza, la'ohe baero zi mate, awai nono ninania, ba lakha mbanua nina, ba ato zi fao khönia banuara.
13 Ba me i'ila ia So'aya, ba ahakhö dödönia ia, imane khönia: Böi e'e! [2] 14 Ba i'ondrasi, ibabaya hasi, ba labadugö ira sangosa'ö, ba imane: He ono matua! da'ö ligu khöu: Faoso! 15 Ba mudadao zi mate, ibörögö muhede; ba ibe'e khö ninania Yesu. [3] 16 Ba ihawui ira fefu fa'ata'u, lasuno Lowalangi, lamane: No maoso zama'ele'ö sebua ba khöda, ba no möi mufaigi mbanuania Lowalangi.[4] 17 Ba humöngö duriania andrö ba danö Yudaia ma'asagörö ba ba danö si fasui fefu. [5]
Ifatenge khö Yesu nifaönia Yohane
[edit | edit source]III. 18 Ba la'ombakha'ö khö Yohane, da'ö fefu nifahaönia.[6] Ba humede Yohane ba nifahaönia, 19 darua, ifatenge ira khö Zo'aya, imane: Hadia, ya'ugö zi möi andrö, ma mabase'ö danö bö'ö?
20 Ba me falukha ira khönia, ba lamane: Yohane andrö, samayagö idanö, ifatenge ndra'aga khöu, imane: Hadia, ya'ugö zi möi andrö, ma mabase'ö danö bö'ö?
21 Ba faudu da'ö sibai, ba ato itolo sofökhö ba si so famakao ba sobekhu si lö sökhi; ba ba zau'a i'amualagö wangila niha, ato ira.
22 Ba itema lira imane khöra: Mifuli ami, mi'ombakha'ö khö Yohane hadia ni'ila hörömi ba hadia nirongomi. Ifuli la'ila niha saua, mowaö-waö zi no ombuyu-mbuyu, döhö wökhö zobou auri, larongo li niha safiso, tesusugi zi no mate ba te'ombakha'ö duria somuso dödö ba zi numana; 23 ba ya'ahowu ba zi lö fatuwu ndra'o.
Ifaduhu'ö Yohane Yesu
[edit | edit source]IV. 24 Ba me no mofanö zinenge Yohane andrö,[7] ba ibörögö fahuhuo ba niha sato, ba khö Yohane andrö, imane:
Hadia nifaigimi, wa möi baero ami mege, ba danö si mate? Hadia, sukhu siheu-heu ba nangi? 25 Ma hadia nifaigimi, wa möi baero ami mege? Hadia, niha si so nukha sombuyu-mbuyu? Hiza, ba nomo zalaŵa so niha si so nukha sogini-gini, ba sangehao göra. 26 Ma hadia nifaigimi, wa möi baero mege ami? Hadia, sama'ele'ö? Si ndruhu niŵa'ögu khömi, si no ebua göi moroi ba zama'ele'ö.
27 Ya'ia zi so ba zura andrö: "Hiza ufowaö-waö mala'ika andrö khögu, fönau, sangehao lalamö fönau." 28 Uŵa'ö khömi, samösa lö sama'ele'ö, sebua moroi khö Yohane andrö, samayagö idanö, ba ni'adonogö ndra alawe, fefu. Ba fondrege zide-ide ba mbanua Lowalangi andrö, ba no ebua moroi khönia.
29 Ba niha fefu, samondrongo, ba sanema beo andrö, ba satulö Lowalangi laŵa'ö, ba lafabayagö'ö idanö ira, famayagö idanö andrö, khö Yohane.[8] 30 Ba farizaio andrö, ba sangila amakhoita, ba labali'ö si lö boto dödö Lowalangi andrö khöra, me lö edöna ira wamayagö idanö andrö khönia.
31 Ba ha ube'e famaedo niha si sagötö andre, ba ha khö fakhili-khili ira? 32 Ba ndraono fakhili-khili ira, si dadao ba kade, si faoma mu'ao khö nawöra, wanguma'ö: No malau zigu khömi, ba lö solaya ami; no fa'ala-alai ndra'aga khömi, ba lö se'e ami.
33 Noa sa möi Yohane andrö, samayagö idanö, lö i'a roti, ba lö ibadu nagu, ba mimane: Sobekhu. [9] 34 Ba no möi Nono Niha, manga-manga ia, ba mamadu-madu hadia ia, ba mimane: Hiza niha solu'a-lu'a, sabuso-buso agu ba si fahuwu ba zanema beo ba ba zebua horö! 35 Ba tobali samu'a ba hulu wa'atua-tua andrö nononia fefu.
Ibayoini Yesu ira alawe si so horö
[edit | edit source]V. 36 Ba ikaoni ia manga farizaio. Ba möi ia ba nomo warizaio andrö, mudadao ia manga.
37 Ba hiza ndra alawe, banua da'ö, sebua horö, me no irongo, no möi ia manga ba nomo warizaio andrö, ba i'ohe zamba buli-buli kara fanikha samohua, [10] 38 i'ondrasi moroi furi gahenia ba me'e, ibörögö ibasöi gahe idanö hörönia ba i'osi bunia, i'ago gahe ba ibayoini fanikha no mege.[11]
39 Ba me i'ila da'ö farizaio andrö, sogaoni ya'ia, ba imane dödönia: Na sama'ele'ö da'ö, ba i'ila ena'ö ha niha, ba he wisa mbua-bua ndra alawe andrö, sombambaya ya'ia, wa no sebua horö. [12]
40 Ba humede khönia Yesu, imane khönia: So niŵa'ögu khöu, Simoni. Ba imane: Ŵa'ö, samahaö. [Ba imane]: 41 So zosugilö, darua zo'ömö khönia; ömö zi samösa, ba dua ngaotu a lima wulu rufia, ba ömö zi samösa, ba dua wulu a lima. 42 Ba me lö khöra famu'a, ba faoma ibe'e bualania khöra zugilönia andrö. Ba ha niha ba zi darua andrö zabölö mangomasi'ö ya'ia?
43 Itema linia Simoni, imane: Ba dödögu, sebua ibe'e buala.
Ba imane khönia: Si ndruhu niŵa'öu.
44 Ba ibali'ö ia ba ndra alawe andrö, imane khö Zimoni: Hadia, ö'ila ndra alawe andrö? No möido ba nomou; idanö khögu, ba gahe, ba lö nibe'eu. Ba da'e, ba no ibasöi taŵa hörönia gahegu, ba bunia wolosi khönia. 45 Lö si fa'ago bawa ndra'ugö khögu. Ba da'e, ba i'otarai möi ia yomo, ba lö nibatonia fangago ahegu. 46 Lö nibayoiniu fanikha högögu. Ba da'e, ba no ibayoini gahegu fanikha samohua.[13] 47 Andrö uŵa'ö khöu: No mu'efa'ö khönia horö soya andrö, me no abölö wa'omasinia. Ba ba ni'efa'ö si lö oya-oya, ba lö abölö wa'omasinia.
48 Ba imane ba ndra alawe andrö: No mube'e aefa khöu horöu. [14]
49 Ba labörötaigö awönia ba wemanga, lamane dödöra: Ha niha da'ö, sangefa'ö horö göi?
50 Ba imane ba ndra alawe andrö: Famatimö zangorifi ya'ugö; fuli'ö, ya'ohahau dödöu. [15]
Famotokhi ba gahe
[edit | edit source]Fabaliŵa lala
[edit source]Olayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö