Wb/nia/Luka/6

Add links
From Wikimedia Incubator
< Wb‎ | nia‎ | Luka
Wb > nia > Luka > 6

Lateu lai wakhe ira nifahaö[edit | edit source]

I. 1 Ba itörö nowi Yesu,[1] me luo sabato, ba lasösöbi lai wakhe nifahaönia, la'a, lafarekha ba dangara.

2 Ba so warizaio ösa, ba lamane: Hana wa milau zi lö tola ba luo sabato? [2]

3 Ba humede Yesu, imane khöra: Hadia, lö nibasomi göi, hadia nilau Dawido, me olofo ia ba awönia fao? 4 Wa no möi ia ba nomo Lowalangi, wa ihalö roti nifaigi-faigi andrö, i'a, ba ibe'e göi ba nawönia fao, si lö tola i'a niha bö'ö, ha ere. 5 Ba imane khöra: So'aya sabato göi Nono Niha andrö.

Famadöhö wökhö danga si no ariri[edit | edit source]

II. 6 Ba me luo sabato bö'ö, [3] ba möi ia ba zekola, mamahaö. Ba so niha ba da'ö, si no ariri tanga, kambölö. 7 Ba ladaro-darogö ia sangila amakhoita, awö warizaio, na ifadöhö wökhö, ba luo sabato, ena'ö lasöndra wangadugö ya'ia. [4]

8 Ba i'ila gera-erara; ba imane ba niha andrö, si so tanga si no ariri andrö: Faoso, ae ba da'e; ba maoso ia, möi ia.[5] 9 Ba imane khöra Yesu: Usofu khömi, hadia, tola lalau zi sökhi, na luo sabato, ba ma si lö sökhi lalau, hadia, la'orifi niha, ma lafakiko? [6] 10 Ba ifakhölö ia, inehegö ira fefu, ba imane khönia: Oro'ö dangau. Ba i'o'ö, ba te'azökhi dangania.

11 Ba oi so wa'afökhö dödöra, ba fahuhuo ira, he lawisa khö Yesu andrö. [7]

Fanuyu ndra sinenge[edit | edit source]

III. 12 Ba me luo da'ö,[8] ba möi ia baero, ba hili, mangandrö, ba sara wongi lö ibato wangandrö khö Lowalangi.[9] 13 Ba me moluo, ba humede ia ba nifahaönia, ba itutuyu zi felendrua, ba khöra, nifotöinia sinenge göi. 14 Simoni andrö, nibe'enia töi Fetero göi ba Andrea, talifusönia, ba Yakobo ba Yohane ba Filifo ba Batolomaio, 15 ba Mataio ba Toma ba Yakobo, ono Galifaio, ba Simoni, nifotöi Selote, 16 ba Yuda, ono Yakobo, ba Yuda, banua Kariota, si manga mböli dania.

Huhuo Yesu[edit | edit source]

IV. 17 Ba möi ia mitou, fao ira khönia, i'iagö zalo'o, ba ato nawönia, nifahaönia, awö niha sato, ato sibai, si oroi Yudaia ma'asagörö ba si oroi Yeruzalema ba mbewe nasi andrö, Tiro ba Sidona, si no möi ba wamondrondrongo linia ba ba wamadöhö'ö fökhöra;[10] 18 te'orifi göi nifakao mbekhu si ra'iö. 19 Ba dozi niha zangalui fombambaya ya'ia, me no so wa'abölö, si otarai khönia, famadöhö wökhöra fefu.[11]

20 Ba ifakhölö ia, ifaigi nifahaönia ba imane:[12] Ya'ahowu ami, si numana, me khömi mbanua Lowalangi andrö. 21 Ya'ahowu ami, solofo iada'e, me ni'abusoi'ö ami dania. Ya'ahowu ami, sege-ege iada'e me sa'iki ami dania.[13] 22 Ya'ahowu ami, na fatiu dödö niha khömi, na latibo'ö ami, na latandraŵaisi ami, na la'ositengagö döimi, hulö na si lö sökhi, na börö Nono Niha.[14] 23 Mi'omusoi'ö dödömi, na luo si manö, mi'amaröga; hiza sa, ebua luomi ba zorugo. Si manö sibai wolau ndra tuara, ba zama'ele'ö andrö. [15]

24 Ba alai sa ami, so'ana'a! noa sa'ae mitema wondrara dödömi andrö.[16] 25 Alai ami, sabuso iada'e, olofo sa'ae ami dania. Alai ami, sa'iki iada'e! abu sa'ae dania dödömi ba mege-ege ami.[17] 26 Alai ami, na lasuno ami niha fefu! si manö sibai sa göi wolau ndra tuara ba zama'ele'ö sofaya andrö.[18]

27 Ba ya'ami, samondrongo, ba da'ö ligu khömi: Mi'omasi'ö zi fa'udu khömi, mitolo zi fatiu tödö khömi,[19] 28 mifahowu'ö zangelifi ya'ami; mi'angandrö salahi zangosiwawöi ya'ami. 29 Na so zamalisi bo'ömö, ba oro'ö khönia zi tambai göi, ba na so zangai lembeu, ba lulu khönia mbaru göi.[20] 30 Fefu ha niha zangandrö khöu, ba be'e khönia, ba na so zangai si so khöu, ba böi andrö mangawuli.[21]

31 Ba hadia zomasi ami lalau khömi niha, da'ö milau khöra, si manö göi.[22] 32 Ba na mi'omasi'ö zangomasi'ö ya'ami, ba hadia wa'ebua dödö khömi! he niha si lö atulö, ba la'omasi'ö göi zangomasi'ö ya'ira.[23] 33 Ba na mitolo sa zanolo ya'ami, ba hadia wa'ebua dödö khömi? Si manö sa göi zi so horö andrö. 34 Ba na mibe'e nifalali ba nidöna-dönami mitema mangawuli, ba hadia wa'ebua dödö khömi? Labe'e göi nifalali si lö atulö ba zi lö atulö, ena'ö latema mangawuli zi manö zui. 35 Ba mi'omasi'ö zi fa'udu khömi, ba mitolo ba mibe'e nifalali ba zi lö midöna-döna hadia ia mangawuli, ba ebua luomi, ba ono Wondrege Zalaŵa ami, me ebua dödönia ba zi lö mangandrö saoha gölö göi ba ba zi lö sökhi.[24]

36 Ya sahakhö tödö ami, si mane fa'ahakhö dödö Namami andrö[25] 37 Ba böi mihuku niha, ba lö'ö manö tehuku ami göi. Ba böi mi'etu'ö huku, ba lö'ö manö la'etu'ö hukumi. Mi'efa'ö zala, ba te'efa'ö zalami.[26]

38 Mibe'e, ba tebe'e khömi; su'a-su'a nifozuzu, nisösö, nihöndrögö, si falawu, lafaduwa ba gahetami; sua-su'a sa ni'anu'a'ömi, la'anu'a'ö zui khömi dania.[27]

39 Ba iŵa'ö khöra gamaedola, imane: Hadia, tola göi i'ohe danga zau'a niha sau'a, ba lala? Tenga faoma aekhu ira ba dögi?[28] 40 Tenga sebua moroi khö zamahaö nifahaö; ba dozi dania, na nifamaha, si mane samahaö ya'ira.[29] 41 Ba hana wa ö'ila golowingö ba hörö dalifusöu, ba boto geu ba hörömö, ha lö ö'ila?[30] 42 Hadia wa tola öŵa'ö khö dalifusöu: He ga'a da'uheta golowingö andrö ba höröu, ba ya'ugö, ba lö ö'ila mboto geu andrö ba hörömö? He samini tödö! Ofönai'ö wangeheta boto geu andrö ba hörömö, ba awena öfaigi wangeheta olowingö ba hörö dalifusöu.

43 Lö'ö sa eu si sökhi, sowua bou sobou, ba lö'ö göi eu sobou, sowua bua si sökhi.[31] 44 Fefu ngawalö döla geu, ba ba mbunia ta'ila he wisa. Lö lateteu marafala ba manaze, ba lö lateteu mbua nagu ba za'a-sa'a mao. 45 Niha si sökhi ifaluagö zi sökhi, moroi ba girö-girö dödönia andrö, si sökhi, ba si lö sökhi, ba ifaluagö zi lö sökhi, moroi ba zi lö sökhi andrö khönia. Hadia sa zi no fahöna ba dödö, da'ö wehede mbewe.[32]

46 Ba hana wa faso'aya ami khögu, wanguma'ö: He So'aya! he So'aya! ba lö mi'o'ö niŵa'ögu? [33]

47 Dozi si möi khögu,[34] samondrongo ligu, solo'ö ya'ia - ba da'u'ombakha'ö khömi, ha khö fakhili-khili ia. 48 Ba niha solau omo fakhili-khili ia, sogo'o tanö, abakha, sanandrösaigö ba gara toyo gehomo. Ba me ebua nidanö ba itörö nomo andrö hohou, ba tebai ifadögö, me no sökhi wanaru'ö ya'ia. 49 Ba na so zamondrongo ba na lö i'o'ö, ba no fakhili-khili ba niha sanaru'ö omo ba danö si lö dane-dane tou: me itörö hohou nidanö, ba i'anema'ö aso'a, ba abölö-bölö wa'aso'a nomo da'ö.

Famotokhi ba gahe[edit | edit source]

  1. ↑ Ayati 1-5: Mat 12:1-8; Mar 2:23-28
  2. ↑ Manofu dödöda hana wa tebai lateu lai wakhe ba lagulu ia ba danga? Ta'ila wa oya zalua ero ma'ökhö, göi ba luo Sabato, si lötolalö'ö mu'ohalöŵögöi. Duma-dumania möi wame'e ö zofökhö, manolo niha salabu ba zinga lala, mondra'u bawi soloi moroi ba mba'o, btn. Bahiza me luo da'ö tebai mufalua fefu da'a molo'ö ndra farizaio. Molo'ö ya'ira, molombase eluahania sindruhu molombase, irege faneu sara lai wakhe manö awö na tagulu-gulu ia ba dangada no tebai. Andrö wa itenaŵa ira Yesu. Lötolalö'ö mufo'eluaha Goroisa Lowalangi molo'ö ohitö dödö Lowalangi, tenga molo'ö ila-ila zura. Tatörö dödöda da'a na ta'ila so niha sabe'e sibai wamatörö "goroisa" irege lö ahakhö dödönia niha. Lowalangi andrö Lowalangi sahakhötödö ba somasi mangorifi niha.
  3. ↑ Ayati 6-11: Mat 12:9-14; Mar 3:1-6
  4. ↑ Faigi 14:3 b.t.
  5. ↑ Faigi 5:22; Mat 9:4; 12:25)
  6. ↑ Faigi göi yaŵa wamotokhi ba gahe Luk 6:1. Si lötolalö'ö mufo'eluaha Goroisa Lowalangi molo'ö ohitö dödö Lowalangi, tenga molo'ö ila-ila zura. Tatörö dödöda da'a na ta'ila so niha sabe'e sibai wamatörö goroisa irege lö ahakhö dödönia niha. Lowalangi andrö Lowalangi sahakhötödö ba somasi mangorifi niha.
  7. ↑ Yoh 11:47
  8. ↑ Ayati 12-16: Mat 10:1-4; Mar 3:13-19
  9. ↑ Mat 14:23
  10. ↑ Mat 4:23 b.t.
  11. ↑ Faigi 8:44 b.t.; Mar 3:10
  12. ↑ Ayati 20-26: Mat 5:2-12
  13. ↑ Yes 55:1; 61:3
  14. ↑ FetI 2:19; 3:14
  15. ↑ HalZin 5:41
  16. ↑ Yak 5:1 b.t.; Mar 10:24
  17. ↑ Yes 65:13
  18. ↑ Yak 4:4; Mikh 2:11
  19. ↑ Mat 5:44
  20. ↑ Mat 5:39.40
  21. ↑ Mat 5:42
  22. ↑ Mat 7:12
  23. ↑ Mat 5:46 b.t.
  24. ↑ MozIII 25:35 b.t.; MozV 15:10; Mat 5:45
  25. ↑ Mat 5:7,48
  26. ↑ Mat 7:1
  27. ↑ Amaed 19:17; KorII 9:6 b.t.; Mar 4:24
  28. ↑ Mat 15:14
  29. ↑ Mat 10:24
  30. ↑ Mat 7:3 b.t.
  31. ↑ Mat 7:17 b.t.; 12:33
  32. ↑ Mat 12:34,35
  33. ↑ Mal 1:6; Mat 7:21
  34. ↑ Ayati 47-49: Mat 7:24-27

Fabaliŵa lala[edit source]

Olayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Luka/6&oldid=6229693"