Wb/nia/Amaedola Zelomo/8

I. Dozi niha ikaoni fa'atua-tua andrö

1 Hadia, lö mu'ao wa'atua-tua andrö? Hadia, lö ifarongogö linia fa'aboto ba dödö?
2 Ba zuzu hili yaŵa ba zinga lala ba ba waerua lala i'iagö.
3 Ba zinga mbawa göli, ba mbalö mbanua, ba mbawa lala miyomo mu'ao ia, imane:
4 "Khömi, ira matua, muhede ndra'o, ba nono niha ufarongogö ligu:
5 Ya'ami soŵöhöwöhö, mifondrondrongo wangila watahogö ba ya'ami si lö tödö mifondrondrongo wa'aboto ba dödö!
6 Mifondrondrongo, ba hadia zoadu ufatunö, satulö wehede mbewegu.
7 Si duhu ilau lelagu, ba hadia ia horö, ba i'ogorofi bewegu.
8 Satulö fefu wehede mbawagu; lö hadia ia zi tefuyu ba lö si lö atulö.
9 Ahori isöndra geluaha sangila watahögö, ba lö si fatimba ba zi no manöndra fa'aboto ba dödö.
10 Andrö mi'omasi'ö wamangelama andre khögu, moroi ba wirö, ba mi'omasi'ö wa'aboto ba dödö zi duhu, moroiba mbalaki.
11 Ebua sa mböli wa'atua-tua, moroi ba mböli mani-mani; fefu hadia ia zomasi niha, ba lö fagölö-gölö khönia."

II. Sebua sibai böli ia

12 "Ya'odo fa'atua-tua, ba no si so fa'onekhe, ba ufa'ema wa'aboto ba dödö.
13 Fangata'ufi Yehowa, ba no fa'ogoro ba zi lö sökhi; hokha ba fayaŵasa ba fanörö lala si lö sökhi, ba no sogoro ndra'o.
14 Khögu so wamolala tödö ba fangabe'e; fa'aboto ba dödö ndra'odo; khögu wa'abölö.
15 Balazi ndra'o, wa la'ila mamatörö niha bö'ö razo, awö wa lahonogöi zatulö samatörö andrö.
16 Samatörö andrö ba salaŵa, dozi sanguhuku ba guli danö, ba moroi khögu, wa no salaŵa ira.
17 U'omasi'ö zomasi ya'odo, ba sangalui ya'odo, fatua ono matua ira, ba lasöndra ndra'o.
18 So khögu gana'a ba fa'ebua döi, girö-girö si lö tebulö ba fa'atulö.
19 Fangata'ufi ya'odo, ba no tohude moroi ba gana'a, moroi ba mbalaki; ba nisöndra khögu, ba no tohude, moroi ba wirö si sökhi.
20 Lala satulö utörö, tödö lala sadölö,
21 ba wamo'ana'a somasi ya'odo, ba wamo'ösi arö dawöla khöra."

III. Samolala tödö Lowalangi ia ba wamazökhi tanö'a andrö

22 "Yehowa mege zomböi ya'odo, böröta lala andrö khönia, böröta halöŵönia föna.
23 Ba götö föna sibai sa'ae tefataro ndra'odo, ba mböröta, me tefobörö danö.
24 Me lö'ö na mu'abakha'ö nasi, tumbu ndra'o; me lö umbu na, sabölö idanö.
25 Lö'ö na mufadane dane hili ba lö hili-hili na, ba no tumbu ndra'odo.
26 Me lö nifazökhinia tanö na, awö mbenua misa, awö mböröta danö andrö.
27 Me ifazökhi mbanua si yaŵa sa ba no sodo; me i'aro'ö zi no amaedola wayo yaŵa nasi;
28 Me ifataro lawuo si yaŵa ba me ihonogöi gumbu ba zabakha si tou.
29 Me ihonogöi wondrege nasi, fa böi isawö niŵa'önia dulu, ba me ilata danö;
30 Ba ya'odo duka khönia, fa'omuso dödö ndra'o [khönia], ero ma'ökhö, famai ndra'o fönania, lö mamalö-malö.
31 Famaido ba guli danö andrö khönia, ba somuso tödö ndra'o ba nono niha."

IV. Solo'ö khönia ba sauri

32 "Andrö mifondrondrongo khögu, ya'ami ira onogu; ya ahowu sa zanörö lala andrö khögu!
33 Mifondrondrongo wamangelama andre, ena'ö atua-tua ami; böi mi'ositengagö!
34 Ya ahowu niha, samondrongo khögu, ba wanaronaro ba zinga mbawandruhö khögu, ba wamaigi-maigi ehomo fatambai mbawandruhö andrö khögu!
35 Sanöndra ya'odo sa, ba isöndra wa'auri; falukha ia wa'ebua dödö khö Yehowa.
36 Ba si lö manöndra ya'o, ba i'alani ia; dozi si fa'udu khögu, ba somasi fa'atekiko."

Famotokhi ba gahe

Fabaliŵa lala

Olayama Amaedola Zelomo: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö