Wb/nia/Samueli I/9

I. Falukha khö Zamueli Zaulo

1 Ba so mbanua Gibea ba mado Mbeniyami, Kisi döinia, ono Gabieli, ma'uwu Zeroro, dua götö ma'uwu Mbekhorati, tölu nga'ötö ma'uwu Gafia, ono mado Mbeniyami, no niha sabölö. 2 Ba so nononia matua, Saulo döi, sebua niha ba si sökhi boto; lö falukha ba Ndraono Gizeraeli si sökhi moroi khönia: ha famalaŵa baginia niha sato fefu. 3 Ba no musuna galide si alawe khö Kisi andrö, Ama Zaulo. Ba imane Kisi khö nononia Saulo: Ohe awöu zawuyu, samösa, ba ae alui galide andrö. 4 Ba latörö hili mado Geferayi andrö ba tanö Zaliza, ba lö lasöndra. Ba latörö danö Za'alimi, ba lö ya'ira: awena dania latörö danö mado Mbeniyami, ba lö lasöndra. 5 Ba me larugi danö Zufi, ba imane Saulo khö nono matua andrö, ni'ohenia awönia: Tabu, tafuli ita; ma iböhöli galide andrö amagu, ma ya'ita i'abusi tödö. 6 Ba imane khönia: Ba mbanua da'e, ba so genoni Lowalangi, niha sebua turia: fefu hadia niŵa'önia, ba lö zi lö itörö. Taisa khönia! ma i'ombakha'ö khöda lalada, nitöröda. 7 Ba imane Saulo khö nono matua andrö: Lau, ba na möi ita khönia, ba hadia ta'ohe ö niha andrö? Noa sa ahori roti andrö ba mbolada, ba lö khöda buala, ni'oheda ena'ö khö genoni Lowalangi andrö. Hadia zi so khöda? 8 Ba ifuli muhede nono matua andrö khö Zaulo, imane: Hiza, so na khögu zambua hua tali, hana na öbe'e da'ö khö genoni Lowalangi andrö, ena'ö iŵa'ö khöda, he lala nitöröda. 9 Me föna sa, ba lamane ba Ndraono Gizeraeli, na möi manofu khö Lowalangi: Mitabu, möi ita khö zangi'ila andrö! Nifotöi sama'ele'ö iada'e, ba me föna, ba sangi'ila labe'e töira. 10 Ba imane Saulo khö nono matua andrö khönia: Si ndruhu niŵa'öu. Tabu, möi ita khönia! Ba lasaŵa miyomo ba mbanua andrö, ba zi so enoni Lowalangi andrö. 11 Ba ba lala miyaŵa ba mbanua, ba falukha ira nono alawe, si möi mitou, ba wana'u idanö; ba lamane ba da'ö: Hadia, so ba da'e zangi'ila andrö? 12 Ba latema lira, lamane: So, hiza ia fönami; awena sibai irugi yomo ba mbanua — me mame'e sumange niha sato ba hili-hili ma'ökhö. 13 Na mirugi yomo, ba fakhamö sibai na ami khönia, gasa-gasa we'amöinia ba wemanga ba naha wame'e sumange andrö. Lö'ö sa manga zato, na lö ya'ia, me ya'ia zamahowu'ö sumange andrö, ba awena dania manga nikaoni andrö. Ba mi'ae manö miyaŵa, fakhamö sibai ami khönia iada'e. 14 Ba möi ira miyaŵa, miyomo. Ba me no latörö sibai mbawa göli, ba faondra khöra Zamueli moroi yomo, ba we'amöi miyaŵa ba naha wame'e sumange.

II. Humede Lowalangi khö Zamueli ba khö Zaulo andrö

15 Ba no ibokai khö Zamueli Yehowa, sara wongi lö Saulo na, no imane: 16 Mane wa'alaŵa luo mahemolu, ba ufatenge khöu niha, si oroi danö mado Mbeniyami, da'ö öbayoini razo mbanuagu Iraono Gizeraeli. Ya'ia dania zangefa'ö banuagu ba danga Ndrawa Wilisiti; noa sa unehegö wamakao banuagu andrö, me no irugi ndra'o wangarö-ngaröra andrö. 17 Ba me i'ila Zaulo andrö Samueli, ba imane khönia Yehowa: Da'ö niha andrö, niŵa'ögu khöu, da'ö dania zamatörö banuagu.

III. Ifosumange Zaulo Samueli

18 Ba i'ondrasi Zamueli Saulo, ba dalu mbawa göli andrö, imane: Ombakha'ö khögu, hezo nomo zangi'ila andrö. 19 Ba imane Samueli khö Zaulo: Ya'odo zangi'ila andrö, taisa miyaŵa ba naha wame'e sumange! Manga ami khögu ma'ökhö, ba mahemolu mbanua, ba ufofanö ndra'ugö ba u'ombakha'ö khöu fefu hadia ia zabu dödöu. 20 Ba ba zigelo galide sisuna khöu, me tölu bongi, ba böi abusi tödö: no musöndra. Ba ha khö fefu hadia ia zebua böli ba Ndraono Gizeraeli? Hadia, tenga khöu ba ba zi samba omo ndra amau, fefu? 21 Ba imane Saulo: Ba ha sa mado Mbeniyami ndra'odo, mado Ndraono Gizeraeli side-ide, ba si sawu ya'aga, ba no fondrege zide-ide ba ngafu mado Mbeniyami andrö; ba hana wa ömanö wehede khögu? 22 Ba i'ohe Zaulo ba ono matua andrö khönia, i'ohe yomo, ba tanö yaŵa ifedadao ira, ba ngai nikaoni andrö; so mato tölu ngafulu ira. 23 Ba imane Samueli ba zangai gö: Be'e gurakha andrö, nibe'egu ba dangau, niŵa'ögu khöu: Be'e yaŵa ua. 24 Ba ibe'e da'io andrö, awö zi fadoro khönia, sangai gö andrö, ibe'e ö Zaulo. Ba imane Samueli: Hiza zi tosai, labe'e öu, a ia, noa sa labe'e yaŵa khöu, irege ginötö andrö, me no uŵa'ö: Ukaoni niha. Ba urudu manga Zaulo khö Zamueli, me luo da'ö. 25 Ba lafuli ira mitou, miyomo, ba yaŵa ba dete nomo lafaigi naha wemörö khö Zaulo, ba mörö ia. 26 Ba me moluo, ba mu'ao Zamueli khö Zaulo, miyaŵa ba dete nomo, imane: Faoso, ena'ö faodo khöu! Ba maoso Zaulo, ba möi ira tou, darua ira Samueli. 27 Ba me larugi si tou mbalö mbanua, ba imane Samueli khö Zaulo: Fowaö-waö nono matua andrö khöu, ba ya'ugö, ba badugö'ö ba da'e, ena'ö u'ombakha'ö khöu niwa'ö Lowalangi.

Famotokhi ba gahe

Fabaliŵa lala

Olayama Samueli I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö