Jump to content

Wb/nia/Samueli I/22

From Wikimedia Incubator
< Wb‎ | nia‎ | Samueli I
Wb > nia > Samueli I > 22

I. Isaŵa danö Ndraono Moabi Dawido

[edit | edit source]

1 Ba iheta ia ba da'ö Dawido, isaŵa dögi narö gara andrö ba zinga Gadula. Ba me larongo da'ö ira ga'ania ba si sawu ya'ira fefu, ba möi ira mitou khönia ba da'ö.[1] 2 Ba fao khönia nifakao, ha niha ira, ba dozi si tosasa ba gömö ba ha niha zi lö sökhi-sökhi tödö, ba tobali högöra Dawido. Mato 400 niha, si fao khönia.[2] 3 Ba moroi ba da'ö, ba isaŵa Misefa ba danö Ndraono Moabi Dawido, ba imane khö razo Ndraono Moabi: Hadia na ba khömi so ndra amagu inagu, irege u'ila, he wisa Lowalangi khögu? 4 Ba iröi ira ba ngai razo Ndraono Moabi, khönia la'iagö, götö we'aso Dawido ba da'ö ba hili. 5 Ba imane khönia sama'ele'ö andrö, Gado: Böi iagö hili andrö; labu, ae ba danö mado Yuda. Ba maoso Dawido mofanö ia, ba irugi Ya'ari Hereti.[3]

II. Fönu Zaulo khö Gahimelekhi andrö ba ba mbanua gere andrö, Nobi

[edit | edit source]

6 Ba te'ombakha'ö khö Zaulo, wa no murongo heza so Dawido ba awönia fao andrö — ba Saulo, ba sidadao ba mbörö manawa ba Gibea, ba hili-hili, sara doho ba dangania, ba no lafasui ia ngoni-ngoninia andrö, fefu — 7 ba imane Saulo ba ngoni-ngoninia andrö, si tefasui ya'ia: Mifondrondrongo, ya'ami, ma'uwu Mbeniyami! Hadia, ibe'e maö göi khömi fefu nowi ba kabu nagu ono Giza'i andrö; hadia, ifataro ami fefu kumandra zi hönö ba kumandra zi otu? 8 Wa no mamagölö ami fefu, udugu, wa no samösa lö sahakhö tödö ya'odo, ba wangombakha khögu nirongoda ma'ökhö, wa no ifa'udu khögu zawuyugu andrö onogu?[4] 9 Ba humede Dugi andrö, Iraono Gedomo — no so ia ba da'ö ba ngai ngoni-ngoni Zaulo andrö — imane: No u'ila me irugi Gahimelekhi andrö, ono Gahitubi ba Nobi, ono Giza'i andrö.[5] 10 Ba isofu niŵa'ö Yehowa khönia da'ö; ba no ibe'e göi mbalazo khönia, ba si'öli Ndrawa Wilisiti andrö, Goliato, ibe'e khönia.[6] 11 Ba ifakaoni'ö razo Gahimelekhi andrö, ere, ono Gahitubi, ba si sawu ya'ira, ere andrö ba Nobi, ba so ira, dozi, la'ondrasi razo. 12 Ba imane Saulo: Fondrondrongo, ya'ugö, ono Gahitubi! Ba imane: Urongo, Tua! 13 Ba imane khönia Saulo: Hana wa no mamagölö ami, ya'ugö ba ono Giza'i andrö, udugu, wa no öbe'e khönia mbalazo ba si'öli, awö wa no ösofu mbawa Lowalangi khönia, fa tola ilaŵa ndra'odo, ni'ilada ma'ökhö? 14 Ba itema li razo Ahimelekhi, imane: Ba ha niha ba genoniu andrö fefu zi faduhu dödöda, si mane khö Dawido, lö lai wa no umönö razo ia ba högö wazuri khöu, awö wa nifosumange ia yomo khöu?[7] 15 Hadia, faefa mege ubörötaigö wanofu bawa Lowalangi khönia? Tenga! Böi yamube'e horögu razo ba böi yamube'e horö zi sawu ya'aga hadia ia, ma'ifu sa lö nirongo zawuyumö da'ö fefu! 16 Ba imane razo: Si mate ndra'ugö, Ahimelekhi, ya'ugö ba si sawu ya'ami fefu! 17 Ba imane razo ba nawönia andrö ba ngainia: Milabu, mibunu gere Yehowa andrö! Noa sa latolo göi Dawido, ba lö ni'ombakha'öra khögu, he ŵa'ae no la'ila, wa soloi ia. Ba lö edöna ngoni-ngoni razo andrö, lahalö tangara wamunu ere Yehowa andrö. 18 Ba imane razo khö Dugi andrö: Ba ya'ugö faoso, ba bunu gere andrö! Ba maoso Ndraono Gedomo andrö, Dugi, ya'ia zamunu ere andrö, 85 niha samaru baru ba doto andrö tarafali, ibunu me luo da'ö. 19 Ba banua Nobi andrö, banua gere, ba i'ö'ötö tou, he ira matua ba he ira alawe ba ono matua ba si lö aefa na ba mbagi zusu, ba saŵi ba kalide ba biri-biri, ba i'ö'ötö tou.[8]

III. Isaŵa Dawido Abiataro andrö

[edit | edit source]

20 Ha samösa zoloi, ono Gahimelekhi, ma'uwu Gahitubi, Abiataro döi, isaŵa Dawido, fao ia ba nawö Dawido andrö. 21 Ba i'ombakha'ö khö Dawido Abiataro, imane: No ibunu gere Yehowa Saulo! 22 Ba imane Dawido khö Gabiataro: Noa sa'ae u'ila me luo da'ö no, börö me no so ba da'ö Dugi andrö, Iraono Gedomo; u'ila sa'ae, wa i'ombakha'ö dania khö Zaulo: ba hulugu so noso niha andrö fefu, si sawu ya'ami! 23 Iagö khögu; böi busi dödöu, ha samunu ya'odo zamunu ya'ugö göi, rorogöfögu ndra'ugö.

Famotokhi ba gahe

[edit | edit source]
  1. Sin 57:1
  2. Sanguhuk 11:3
  3. Faigi 23:14; Sin 63:1
  4. Faigi 18:3
  5. Ayati 22; Sin 52:2
  6. Faigi 21:7–10
  7. Faigi 18:22,27
  8. Faigi 21:2

Fabaliŵa lala

[edit source]

Olayama Samueli I: 12345678910111213141516171819202122232425262728293031

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö