Jump to content

Wb/nia/Samueli I/8

From Wikimedia Incubator
< Wb‎ | nia‎ | Samueli I
Wb > nia > Samueli I > 8

I. Ono Zamueli

[edit | edit source]

1 Ba me atua sa'ae Zamueli, ba iraononia ifataro sanguhuku Iraono Gizeraeli. 2 Töi nononia si a'a, ba Yoeli, ba Abia döi nakhinia; da'ö zamatunö huhuo, ba Mbereseba.[1] 3 Ba lö la'o'ö gamuatania iraononia andrö: la'alui harera ba manga gana'a ba lafuyu'ö huku.[2]

II. La'andrö razo niha sato

[edit | edit source]

4 Ba falukha zalaŵa Ndraono, Gizeraeli, möi khö Zamueli ba Rama,[3] 5 lamane khönia: Hiza, atua ndra'ugö, ba iraonou andrö, ba lö la'o'ö gamu'atamö andrö: ba fataro sa'ae khöma razo, samatörö ya'aga, si mane ba niha baero fefu.[4] 6 Ba fatuwu khö Zamueli, me laŵa'ö: Be'e khöma razo, samatörö ya'aga. Ba mangandrö Zamueli khö Yehowa. 7 Ba imane Yehowa khö Zamueli: Fondrondrongo li zato, fefu hadia ia niŵa'öra khöu. Tenga sa ya'ugö nitibo'öra, ya'odo a'ine nitibo'öra, fa böi sa'ae razora ndra'odo. 8 No faudu sibai ira nilaura khöu iada'e nilaura föna sa'ae, i'otarai luo u'ohe ira miyaŵa moroi ba danö Miserayi, me no la'erogö ndra'o ba me no lafosumange Lowalangi bö'ö. 9 Ba o'ö sa'ae niŵa'öra, ba faulugö göi wamangelama ya'ira, ombakha'ö khöra gömöra khö razo andrö, samatörö ya'ira dania.

III. Lö lafondrondrongo niŵaö Zamueli

[edit | edit source]

10 Ba ahori i'ombakha'ö Samueli niŵa'ö Yehowa khönia, ba niha sato, sangandrö razo khönia, ba imane na:

11 Amaedola zugilö razo andrö, samatörö ya'ami, dania khömi, ba ihalö nonomi matua ba ibali'ö tuka gureta khönia ba tuka kudo, ena'ö latari-tari föna guretania, si fagohi, 12 ba ena'ö ibe'e kumandra zi hönö ba kumandra zi lima wulu, ba ba wamaku nowinia ba ba wamasi basitönia, ba ena'ö lafazökhi fangöna khönia ba fakake gureta.

13 Ba onomi alawe, ba ihalö, ba ibe'e samazökhi dalu-dalu ba same'e bawu gö ba sogore kue.

14 Ba ba nowimi ba ba kabu nagu khömi ba ba kabu falo, ba si sökhi, ba ihalö, ba ibe'e ba genoninia. 15 Ba bua nowimi ba bua nagu khömi, ba sambua ni'ofulu ihalö, ba ibe'e ba zawuyunia ba ba ngoni-ngoninia.

16 Sawuyumi, ira matua ba ira alawe, fabaya saŵimi fondrege zi sökhi ba kalidemi, ba ihalö, ba i'oguna'ö ba halöŵö andrö khönia. 17 Ba ba mbiri-birimi, ba sambua ni'ofulu i'okhögö.

Ba ya'ami, ba enoninia dania.

18 Ba na mangarö-ngarö ami dania, börö razomi andrö, nituyumi khömi, ba lö'ö sa ifondrondrongo khömi Yehowa.

19 Ba lö edöna niha sato lafondrondrongo niŵa'ö Zamueli, lamane: Böi, razo zomasiga! 20 Ena'ö fagölö-gölö ndra'aga ba niha baero andrö, fefu, ena'ö samatunö huhuoma razoma andrö ba solohe ya'aga ba wanuwö.

21 Ba ifondrongondrongo Samueli niŵa'ö zato, fefu, ba ifa'ema khö Yehowa.

22 Ba imane Yehowa khö Zamueli: O'ö ni'andröra ba fataro khöra razo! Ba imane Samueli ba Ndraono Gizeraeli: Mifuli ami, yamusaŵa mbanuara zamösana![5]

Famotokhi ba gahe

[edit | edit source]
  1. Nga'ötI 6:13
  2. MozV 16:19
  3. Faigi 7:17
  4. MozV 17:14; Hos 13:10; HalZin 13:21
  5. Ayati 7,9

Fabaliŵa lala

[edit source]

Olayama Samueli I: 12345678910111213141516171819202122232425262728293031

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö