Jump to content

Wb/nia/Samueli I/16

From Wikimedia Incubator
< Wb‎ | nia‎ | Samueli I
Wb > nia > Samueli I > 16

I. Ibayoini razo Dawido Samueli

[edit | edit source]

1 Ba imane Yehowa khö Zamueli: Ha wa'ara döhö wa'abu dödöu khö Zaulo andrö, me noa sa atö tebai salaŵa Ndraono Gizeraeli ia, wamaigigu? Fo'ösi fanikha dandru andrö khöu ba labu: ufatenge ndra'ugö khö Giza'i andrö, banua Mbetilekhema, me no ba nononia ufaigi khögu zamösa, nibe'e razo.[1] 2 Ba imane Samueli: He uwisa we'amöi? Na irongo Saulo, ba ibunudo! Ba imane Yehowa: Ohe nono zaŵi ba ömane: Ba wame'e sumange Yehowa möido. 3 Ba kaoni Giza'i andrö, ba wemanga sumange; ba ya'o zangombakha khöu, he öwisa; nitötöigu khöu, ba öbayoini khögu. 4 Ba i'o'ö Samueli niŵa'ö Yehowa. Ba me irugi Mbetilekhema, ba lafaondragö ia satua mbanua, si no tobali tödö, ba lamane: Hadia, ba zi sökhi möi'ö?[2] 5 Ba imane: Ya'ia! Ba wame'e sumange Yehowa möido; mi'amoni ba mitabu ba wemanga zumange andrö! Ba ifamoni ndra Iza'i ononia ba ikaoni ira ba wemanga zumange andrö. 6 Ba me so ira, ba ifaigi Geliabi andrö, imane dödönia: Si ndruhu, ya'ia nibayoini khö Yehowa! 7 Ba imane Yehowa khö Zamueli: Böi faigi nga'eunia ba fa'alaŵania, tenga sa ya'ia nituyugu. Famaigi Lowalangi sa, ba no tenga si mane famaigi niha. Nga'eu nifaigi niha, ba tödö nifaigi Lowalangi![3] 8 Ba khö Gabinadabi muhede Giza'i, i'ohe khö Zamueli. Ba imane Samueli: Da'ö göi, ba tenga nituyu Yehowa. 9 Ba Sama i'ohe khönia Iza'i; ba imane: Da'ö göi, ba tenga mituyu Yehowa. 10 Ba fitu i'ohe khö Zamueli ononia Iza'i; ba imane Samueli khö Giza'i: Lö nituyu Yehowa ba da'ö![4] 11 Ba imane na Samueli khö Giza'i: Hadia, awai nonou matua? Ba imane: Hatö si akhi, no möi kubalo mbiri-biri. Ba imane Samueli khö Giza'i: Fatenge, fahalö'ö ia, lö'ö sa manga ita, na lö ya'ia.[5] 12 Ba ifatenge, ifahalö'ö; ba no soyo bu ba si sökhi hörö, ba si sökhi manö wamaigida. Ba imane Yehowa: Faoso, bayoini ia, da'ö ia. 13 Ba ituyu dandru wanikha Samueli, ibayoini [Dawido] ba zi so ira ga'ania. Ba so Geheha Yehowa khö Dawido, i'otarai luo da'ö, lö tebulö. Ba ifazaŵa ia Samueli, isaŵa Rama.[6]

II. Möi solau biola khö Zaulo Dawido

[edit | edit source]

14 Ba me no aheta Geheha Yehowa khö Zaulo, ba ifakao ia bekhu si lö sökhi, nifatenge Yehowa.[7] 15 Ba lamane khö Zaulo ira awönia: Hiza sa, ifakao ndra'ugö bekhu si lö sökhi khö Lowalangi, 16 ba yamuŵa'ö manö niŵa'önia sokhö ya'aga; ya'e ndra'aga, sawuyumö andre, ba ma'alui niha, sonekhe ba wolau biola: ba na so khöu mbekhu si lö sökhi andrö, khö Lowalangi, ba yamulau mbiola, ba aoha khöu.[8] 17 Ba imane Saulo ba ngoni-ngoninia andrö: Ba mifaigi khögu niha si no to'ölö ba wolau biola, ba mi'ohe khögu. 18 Ba imane si samösa: So ni'ilagu, ono Giza'i andrö, banua Mbetilekhema si no to'ölö ba wolau biola, niha sabölö ba sonekhe ba watelesa ba sabölö ba huhuo, niha si sökhi boto, ba itolo-tolo ia Yehowa. 19 Ba ifatenge zinenge Saulo, khö Giza'i, imane khönia: Fatenge khögu nonou Dawido andrö, kubalo mbiri-biri andrö. 20 Ba ihalö roti Iza'i, fulu, ba samba nahia nagu ba sara nono nambi, si matua, ifa'ohe'ö khö Zaulo, khö nononia Dawido andrö. 21 Ba möi khö Zaulo Dawido, möi ngoni-ngoninia, ba i'omasi'ö Saulo, ba tobali solohe fangöna Zaulo Dawido. 22 Ba ifatenge khö Giza'i Saulo, imane khönia: Akha so khögu Dawido, ngoni-ngonigu, me no omasido ia. 23 Ba ero na ira'u Zaulo bekhu si lö sökhi andrö, khö Lowalangi, ba ituyu mbiola Dawido ba ifoli; ba okafu khö Zaulo, aoha, ba aheta khönia mbekhu si lö sökhi andrö.[9]

Famotokhi ba gahe

[edit | edit source]
  1. Faigi 15:23,35
  2. RazII 9:18
  3. HalZin 10:34; Sin 7:10
  4. Nga'ötI 2:13–15
  5. Faigi 17:14
  6. SamII 2:4; 5:3
  7. Faigi 18:10
  8. RazII 3:15
  9. Ayati 14

Fabaliŵa lala

[edit source]

Olayama Samueli I: 12345678910111213141516171819202122232425262728293031

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö