Jump to content

Wb/nia/Samueli I/18

From Wikimedia Incubator
< Wb‎ | nia‎ | Samueli I
Wb > nia > Samueli I > 18

I. Fahuwu ira Dawido Yonata

[edit | edit source]

1 Ba me no awai huhuo Dawido khö Zaulo, ba fahuwu ira Yonata Dawido, i'omasi'ö Dawido Yonata, si mane fa'omasinia ia. 2 Ba ihalö khönia Dawido Saulo, me luo da'ö; lö'ö sa'ae itehe khönia wangawuli khö ndra amania[1] 3 Ba fawu'u li khönia Yonata, me no i'omasi'ö ia, si mane fa'omasinia ia.[2] 4 Iheta mbarunia sebua Yonata ibe'e khö Dawido, fabaya barunia sabe'e ba si'ölinia ba fanania ba böbö talunia. 5 Ba na möi fasuwö Dawido, heza ifatenge ia Saulo, ba mofozu, ba tobali ibe'e högö zabölö ia Saulo. Ba oi la'omasi'ö ia niha sato, ba he awö Zaulo andrö.[3]

II. Lasuno Dawido niha sato, ba afökhö dödö Zaulo

[edit | edit source]

6 Ba me mangawuli ira, me ifuli ia Dawido, me no ibunu Ndrawa Wilisiti andrö, ba dozi banua Ndraono Gizeraeli, ba lafaondragö Dawido ira alawe, manari ba labözi rafa'i, owua-wua dödö, ba labözi waritia.[4] 7 Ba latema lamane ira alawe andrö: "Hönö ae nibunu Zaulo, ba fulu ngahönö Dawido!"[5] 8 Ba mofönu sibai Zaulo, abao dödönia ba niŵa'öra andrö, ba imane: Fulu ngahönö labe'e khö Dawido, ba khögu, ba ha hönö; hatö fa'arazo zi lö khönia na! 9 Ba afökhö dödö Zaulo khö Dawido, i'otarai luo da'ö ba si manö-manö dania. 10 Ba mahemolu ö, ba ira'u Zaulo bekhu si lö sökhi khö Lowalangi, ba hulö zowöhö ia ba gödonia. Ba Dawido, ba solau biola, halöŵönia sero ma'ökhö, ba sara doho ba danga Zaulo.[6] 11 Ba ihandrogö doho Saulo, imane dödönia: Da'utandro ba mbagolö Dawido. Ba mendrua ihole'ö ia khönia Dawido.[7] 12 Ba ata'u sibai Zaulo Dawido, me itolo-tolo ia Yehowa, ba khö Zaulo, ba no iböda ia. 13 Ba iheta yomo khönia Dawido Saulo, ifataro kumandra zi hönö; ya'ia zolohe sato andrö, heza möi. 14 Ba hadia nilau Dawido, ba mofozu, me itolo-tolo ia Yehowa.[8] 15 Ba me i'ila Saulo, si sökhi manö wozu hadia ia khönia, ba muhokha mbunia khönia. 16 Ba dozi Iraono Gizeraeli, ba he ma'uwu Yuda, ba la'omasi'ö Dawido, me ya'ia zolohe ya'ira, heza möi.

III. Ihalö nono Zaulo Dawido

[edit | edit source]

17 Ba imane Saulo khö Dawido: Hiza zi a'a nonogu alawe, Meraba, da'ö ube'e khöu — ba sabölö ndra'ugö khögu, ba wasuwöta andrö niŵa'ö Yehowa. Imane sa dödönia Saulo: Lö uhalö tangagu wamunu ya'ia, ba hana na labunu ia Dawa Wilisiti. 18 Ba itema li Zaulo Dawido, imane: Ha niha ndra'odo, ba ha niha zi sawu ya'aga, nga'ötö namagu andrö, ba Ndraono Gizeraeli, wa möido umönö razo? 19 Ba me irugi baŵa wame'e khö Dawido Meraba andrö, ono Zaulo, ba khö Gaderieli andrö, banua Mehola, labe'e ia.[9] 20 Ba somasi Dawido Mikhala andrö, si akhi nono Zaulo. Ba me lafarongogö da'ö khö Zaulo, ba atulö dödönia. 21 Imane sa dödönia Saulo: Da'ube'e khönia, ena'ö tandraŵa khönia, ba ena'ö labunu ia Dawa Wilisiti. Ba imane sa'ae Saulo khö Dawido: Dua balö uŵa'ö khöu, ba tola möi'ö umönögu ma'ökhö. 22 Ba ibe'e li ba ngoni-ngoninia Saulo, imane: Mifahuhuo khö Dawido, ba zi lö niha, mimane: Hiza, i'omasi'ö ndra'ugö razo, ba he awönia fefu, ba oi somasi ya'ugö, ba tola möi'ö umönö razo.[10] 23 Ba laŵa'ö da'ö khö Dawido ngoni-ngoni Zaulo andrö. Ba imane Dawido: Hadia, side-ide da'ö ba dödömi, na möi ita umönö razo? Ba ya'odo, ba no niha si numana, niha si lö töi. 24 Ba la'ombakha'ö khö Zaulo niŵa'ö Dawido andrö. 25 Ba imane Saulo: Mimane khö Dawido: Lö iŵa'ö khöu mböwö razo, ha otu botolö Ndrawa Wilisiti, ba wolau balö ba nemali razo andrö. Da'ö sa dödö Zaulo, ena'ö labunu Dawido Dawa Wilisiti. 26 Ba me la'ombakha'ö da'ö khö Dawido ngoni-ngoni Zaulo andrö, ba atulö dödö Dawido, möi ia umönö razo; ba lö'ö na sa irugi inötö. 27 Ba maoso Dawido, i'ohe nawönia andrö, ba otu labunu Dawa Wilisiti, ba i'ohe mbotolö andrö khöra ba i'erai khö razo, ena'ö tola möi ia umönö razo; ba ibe'e khönia nononia Mikhala Saulo. 28 Ba me itugu aboto na ba dödö Zaulo itolo-tolo Dawido Yehowa ba oi la'omasi'ö ia Iraono Gizeraeli fefu, 29 ba itugu manö na göi ata'u ia Dawido. Ba tobali fa'udu Zaulo khö Dawido, sagötö ya'ia.[11] 30 Ba so zui zalaŵa Ndrawa Wilisiti, möi manuwö. Ba abölö möna Dawido, moroi ba genoni Zaulo andrö, ero na möi ira; tobali teturia sibai döinia.

Famotokhi ba gahe

[edit | edit source]
  1. Faigi 16:22; 17:15
  2. Faigi 19:1; 20:17; 23:18; SamII 1:26; 21:7
  3. Ayati 14
  4. Sanguhuk 11:34
  5. Faigi 21:12; 29:5
  6. Faigi 16:14
  7. Faigi 19:10; 20:33
  8. Ayati 5
  9. Sanguhuk 15:2
  10. Faigi 22:14
  11. Ayati 12

Fabaliŵa lala

[edit source]

Olayama Samueli I: 12345678910111213141516171819202122232425262728293031

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö