Jump to content

Wb/nia/Samueli I/23

From Wikimedia Incubator
< Wb‎ | nia‎ | Samueli I
Wb > nia > Samueli I > 23

I. Itolo mbanua Kegila Dawido

[edit | edit source]

1 Ba lamane khö Dawido: Lasuwö Kegila Dawa Wilisiti, laraburabu wakhe ba golayama mbasitö![1] 2 Ba isofu khö Yehowa Dawido, imane: Hadia, möido molau ba Ndrawa Wilisiti andrö? Ba imane Yehowa khö Dawido: Ae'e, ba lau ba Ndrawa Wilisiti andrö ba efa'ö Kegila. 3 Ba lamane khö Dawido ira awönia: Ba ba da'e sa'ae, ba danö mado Yuda, ba ata'u ita, ba hadia, möi ita na ba Kegila, fasuwö ba Ndrawa Wilisiti sato? 4 Ba ifuli isofu khö Yehowa Dawido, ba imane khönia Yehowa: Labu, ae misi tou ba Kegila, ube'e sa ba dangau Ndrawa Wilisiti. 5 Ba möi ba Kegila Dawido ba awönia andrö, lalau ba Ndrawa Wilisiti, larabu guriföra, ba abölö sibai te'ala Ndrawa Wilisiti labe'e, me fasöndra ira. Tobali i'orifi mbanua Kegila andrö Dawido.[2]

II. Igohi ia Saulo ba isaŵa Zifi. Möi mamaigi ya'ia Yonata

[edit | edit source]

6 Ba mege, me isaŵa Dawido Abiataro andrö, ba no i'ohe misi tou mbaru ba doto. 7 Ba me te'ombakha'ö khö Zaulo, ba Kegila so Dawido, ba imane Saulo: Noa sa ibe'e ba dangagu ia Lowalangi; me no möi ia ba mbanua si so bawa göli nifolazi, ba no ya'ia zokuru ya'ia. 8 Ba humede Zaulo ba zato fefu, ba wanuwö, ba we'amöi ba Kegila, ba wama'u'u Dawido ba awönia andrö. 9 Ba me irongo Dawido, so dödö Zaulo si lö sökhi khönia, ba imane khö Gabiataro ere andrö: Ohe ba da'e mbaru ba doto andrö![3] 10 Ba mangandrö Dawido, imane: He Yehowa, Lowalangi Ndraono Gizeraeli! No irongo sawuyumö andre, wa no tödö Zaulo möi ia ba Kegila, ba wamakiko banua andrö, börö ndra'odo: 11 hadia, labe'e ba dangania dania ndra'odo banua Kegila andrö? hadia, möi mitou Zaulo andrö, itörö nirongo zawuyumö andre? He Yehowa, Lowalangi Ndraono Gizeraeli! Ombakha'ö khö zawuyumö andre! Ba imane Yehowa: 12 Itörö! Ba imane Dawido: Hadia, labe'e dania ba danga Zaulo ndra'odo ba awögu andrö banua Kegila andrö? Imane Yehowa: Labe'e. 13 Ba maoso Dawido ba awönia andrö, mato 600 ira, laheta ira ba Kegila ba sate latöröi danö misa. Ba me te'ombakha'ö khö Zaulo, no aefa ba Kegila Dawido, ba lö alua möi ia. 14 Ba ba danö si mate soso Dawido, ba hili misa, ya'ia ba hili ba danö si mate Sifi andrö. Ba i'alu-alui ia Saulo, sagötö fa'ara, ba lö ibe'e ba dangania Lowalangi.[4] 15 Ba ata'u Dawido, me möi Zaulo mangalui famunu ya'ia. Ba ba Horesi so Dawido, ba danö si mate Sifi. 16 Ba maoso nono Zaulo, Yonata, möi ia khö Dawido ba Horesi, ifuli i'abe'e'ö dödönia ba Lowalangi, 17 imane khönia: Böi ata'ufi, lö'ö sa möi'ö ba danga namada Saulo; razo Ndraono Gizeraeli dania ndra'ugö, ba tambalinamö dania ndra'odo — ba he amada Saulo, ba i'ila göi da'ö. 18 Ba fawu'u li ira föna Yehowa. Ba lö ibulö'ö ia ba Horesi Dawido ba ifuli ia khöra Yonata.[5]

III. La'a mbölinia banua Zifi andrö. Fangefa Dawido ba danga Zaulo

[edit | edit source]

19 Ba möi misi yaŵa ba Gibea khö Zaulo mbanua Zifi andrö, lamane: Hadia, tenga ba khöma ibini'ö ia Dawido, ba hili misa, ba Horesi, ba Gibeata Hakhila, tanö miraya, i'otarai danö si mate andrö?[6] 20 Ba ha wa'ara zomasi'ö a'i, ya'ugö razo, möi'ö mitou, ba tabu, ba ya'aga saae zame'e ba danga razo ya'ia! 21 Ba imane Saulo: Ya'ahowu ami khö Yehowa, me no ahakhö dödömi ndra'odo. 22 Ba lau! ba mifaigi-faigi na, ba mita'i-ta'i misofu, heza so ia, heza tebato ia; noa sa la'ombakha'ö khögu, wa no sonekhe sibai. 23 Mizofu-zofu hadia mbini-mbini, nibini'önia ya'ia, ba mi'ombakha'ö khögu zi ndruhu-ndruhu, ena'ö möido awömi. Na so ia ba danö, ba u'alu-alui ia ba ngahönö ma'uwu Yuda. 24 Ba mowaö-waö ira föna Zaulo, ba danö si mate Sifi. Ba Dawido ba awönia, ba ba danö si mate Ma'ono so, ba zalo'o, raya danö si mate no mege. 25 Ba me möi Zaulo ba awönia andrö, ba wangalui Dawido; ba te'ombakha'ö khö Dawido, ba iheta ia ba gara andrö, ba danö si mate Ma'ono, möi ia mitou. Ba irongo Saulo ba i'o'ö Dawido ba danö si mate Ma'ono. 26 Ba ira Zaulo, ba ahe hili tanö andre latörö, ba ira Dawido, ba ahe hili ba zi tambai, ba ita'i-ta'i Dawido, fa böi ikhamö ia Saulo, ba Zaulo, ba i'alui wama'u'u ira Dawido. 27 Ba so zinenge, si lö mudöna-döna, möi ia khö Zaulo, imane: Ta'i-ta'i, fuli'ö! no larugi danöda sanuwö, Dawa Wilisiti. 28 Ba iböhöli wolohi Dawido Saulo, möi mufaondragö Ndrawa Wilisiti. Andrö wa labe'e töi naha andrö Zea Mahelekoto (kara wa'aefa).

Famotokhi ba gahe

[edit | edit source]
  1. Yos 15:44
  2. Faigi 19:8
  3. Faigi 30:7
  4. Ayati 19; Faigi 24:1
  5. Faigi 18:3
  6. Faigi 26:1; Sin 54:2

Fabaliŵa lala

[edit source]

Olayama Samueli I: 12345678910111213141516171819202122232425262728293031

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö