Wb/nia/Samueli I/24

I. Fa'ahakhö dödö Dawido Zaulo ba dögi narö hili andrö

1 Ba iheta ia ba da'ö Dawido, möi ia misi yaŵa, ba yaŵa ba hili ba Engedi i'iagö. 2 Ba me no mangawuli Zaulo, me i'otarai wasuwöta ba Ndrawa Wilisiti, ba lamane khönia: Ba danö si mate Engedi so Dawido iada'e. 3 Ba i'ohe zi 3000 sabölö, nitutuyu ba Ndraono Gizeraeli fefu, möi ia, ba wangalui ira Dawido ba gara nago andrö. 4 Ba irugi kandra nambi andrö, ba ngai lala. Ba so dögi narö hili ba da'ö. Ba möi bakha Zaulo, ba we'amöi ba nidanö, ba Dawido ba awönia andrö, ba no dumadao ba da'ö, ba wondrege dögi andrö. 5 Ba lamane khö Dawido ira awönia: Hiza, da'e mbaŵa andrö, niŵa'ö Yehowa khöu, me imane: Ube'e ba dangau dania nemaliu andrö, ena'ö ö'ila ölau khönia zomasi'ö! Ba maoso Dawido, ikumokumo wanaba watalinga mbaru Zaulo. 6 Ba dania, ba manutu dödö Dawido, me no itaba watalinga mbaru Zaulo andrö, 7 ba imane ba nawönia: Yamutegu ndra'o Lowalangi, na ulau zi mane da'ö khö zokhö ya'o, khö nibayoini Yehowa andrö, wombambaya ya'ia, me no nibayoini Yehowa ia. 8 Ba itegu sibai nawönia Dawido, lö itehe khöra lalau khö Zaulo. Ba maoso Zaulo, iheta ia ba dögi narö hili andrö, mofanö ia.

II. Ihaogö wehedenia khö Zaulo Dawido

9 Ba maoso göi Dawido, i'o'ö moroi ba dögi, ba mu'ao ia khö Zaulo, imane: He sokhö ya'o, razo! Ba ibali'o ia Saulo; ba ifalögu ia tou ba danö Dawido, mangalulu khönia. 10 Ba imane khö Zaulo: Hana wa öfondrondrongo deatea mbewe niha, na laŵa'ö: I'alui wamunumö Dawido? 11 Ma'ökhö andre, ba no höröu zangila, wa no ibe'e ba dangagu ndra'ugö Yehowa, ba dögi narö hili andrö, ma'ökhö. No laŵa'ö khögu: Bunu ia, ba salimagö ndra'ugö uŵa'ö, no umane: Lö ubabaya zokhö ya'o, me no nibayoini Yehowa! 12 Ba hiza, Ama, faigi ba dangagu watalinga mbarumö andrö! wa lö ubunu'ö, me utaba watalinga mbarumö andrö. Ya'aboto ba dödöu, ba ötöngöni, wa lö hadia ia zi lö sökhi ba dödögu, wa lö lalögu, wa lö horögu khöu. Ba ya'ugö, ba ö'alui wamunu ya'odo. 13 Yehowa zangasiwai huhuo andrö khöda, Yehowa dania zolau balögu khöu, ba lö uhalö tangagu wolau khöu. 14 Itörö niŵa'ö ba gamaedola andrö khö ndra tua: Ba zanao horö moroi horö — ba lö uhalö tangagu wolau khöu. 15 Ha niha ni'alui razo Ndraono Gizeraeli? Ha niha nigohimö? Asu si no mate, landrindri si ha sambu-sambua! 16 Ba yamu'asiwai huhuo andrö khöda Yehowa, yamufaigi, yamufatunö huhuogu khöu ba yamu'ohe ba lala.

III. Fa'ahakhö dödö Zaulo

17 Ba me no i'o'ozui wehedenia andrö khö Zaulo Dawido, ba imane Saulo: Hadia, tenga liu da'ö, ya'ugö, onogu Dawido? Ba mege-ege sibai Zaulo. 18 Ba imane khö Dawido: Satulö ndra'ugö moroi khögu: si sökhi nilaumö khögu, ba si lö sökhi nilaugu khöu. 19 Ba no önönö na ma'ökhö zi sökhi andrö nilaumö khögu, me lö öbunu ndra'o, he ŵa'ae no ibe'e ba dangau ndra'odo Yehowa. 20 Na so zi fakhamö khö nemalinia, ba hadia, ifofanö manö lö ilau khönia? Ba isulöni dania khöu si sökhi zi sökhi andrö, nilaumö khögu ma'ökhö andre. 21 Ba hiza aboto sa'ae ba dödögu wa razo dania ndra'ugö, awö wa ba dangau aro dania wa'arazo andrö ba Ndraono Gizeraeli. 22 Ba ae ba hölu khögu khö Yehowa, fa böi öhori nga'ötögu ba fa böi öse'e döigu ba niwama. 23 Ba fahölu Dawido khö Zaulo, ba ifuli ia ba khöra Saulo; ba Dawido ba awönia, ba möi miyawa ba zuzu hili.

Famotokhi ba gahe

Fabaliŵa lala

Olayama Samueli I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö