Wb/nia/Razo I/7

Ilau gödo Selomo

I. 1 Ba gödonia andrö, ba meweledölu fakhe i'olau'ö Selomo, irege maulu wa'awai. 2 Eu gatua ba hili Libano nomo andrö, 100 hela wa'anau ba 50 hela wa'ebolo, ba 30 hela wa'alaŵa; tölu ngenoli gehomo eresi, moroi tou ba buatö eresi ba mbalö gehomo. 3 Ba sagö, ba eresi, yaŵa mbate'e ba hambo; si tohare ba gehomo andrö, ehomo si 45, felefelelima zangenoli. 4 Ba tölu winaeta mbuatö, ba sandrela, ba no fatahö, tölutölu ngenoli. 5 Ba bawandruhö ba sandrela fefu, ba no si öfa sagi, eu balo, ba si fatahö zandrela, tölutölu ngenoli. 6 Ba ilau zerambi, ni'otarunahe gehomonia, 50 hela wa'anau ba 30 hela wa'ebolo, ba sambua tö zerambi föna da'ö, nifo'ehomo si manö göi, ba nibosi mbalö. 7 Ba sambua zeri balai, naha dadaoma, ba nifatunö huhuo, seri balai wanguhuku, ilau, oi nibalugö bagolö eresi, tanö bakha; i'otarai zalo, numalö barö zagö. 8 Ba omonia, nahiania, ba golayama si sambua, misa, i'otarai zerambi no mege, ba si manö göi wolau. Ba khö nono Wara'o andrö nihalönia, ba ilau göi nomo Selomo, buata zerambi andrö? 9 Ba [omo] andrö fefu, ba kara sebua böli, nibana ba wanoto, nigaragazini, he tanö bakha ba he tanö baero, i'otarai doyo tou, numalö barö zagö, ba tanö baero, irugi golayama sebolo andrö. 10 Ba toyo tou, ba no kara sebua böli, kara sebua, so zi 10 hela ba so zi 8 hela. 11 Ba miyaŵa, ba kara sebua böli, nifatörö siku ba wanoto, ba eu, eresi. 12 Ba öli golayama sebolo andrö, fasui, ba tölu winaeta gara si öfa sagi ba sawinaeta geu balo, eresi, si mane olayama gosali Yehowa, tanö bakha, ba si mane olayama zerambi andrö ba gödo.

Taru nahe andrö si dua ba gosali

II. 13 Ba ifatenge ba Diro razo Selomo, ifakaoni'ö Hiramo andrö, banua Diro. 14 Ono lakha mbanua, mado Nafetali Hiramo andrö, ba amania, ba banua Diro; siambu ia, tuka döla, si fahöna fa'onekhe, awö wa'atua-tua, awö wa'aboto ba dödö, ba wolau hadia ia, töla. Ba möi ia khö razo, ilau nilau andrö khönia fefu. 15 Ifahele daru nahe andrö, si dua, töla, ba gewe'ewe andrö ba gosali. Feleŵalu hela wa'alaŵa daru nahe andrö ba daöfa manalagu wa'esolo, ni'okowu, öfa turu wa'awe'e-we'e; si fagölö-gölö manö zi dua andrö. 16 Ba dombua ilau högö, nifahele, töla, högö daru nahe andrö; faoma limalima hela wa'alaŵa högö andrö. 17 Ba ifazökhi zi hulö ni'otaraŵa, raeŵeraeŵe, amaedola mbalu-balu högö daru nahe andrö, faoma ma'adombua ibe'e ni'otaraŵa si manö. 18 Ba ifazökhi wamaedo mbua dalimo, töla, duadua winali wamaedo mbua dalimo zambua ni'otaraŵa. 19 Ba 200 wamaedo mbua dalima zambua ni'otaraŵa, fasui, ni'ofinaligö, ifagölö-gölö manö wolau ba högö daru nahe si dombua. 20 Ba högö daru nahe andrö, ba no famaedo mbunga zömasöma safusi, öfa hela. 21 Ba ifasindro daru nahe andrö ewe'ewe gosali; ifasindro zi sara ba gambölö, ba ibe'e töinia Yakhino, ba si sara, ba gabera, ba Boasi ibe'e töi da'ö. 22 Ba högö daru nahe andrö, ba no famaedo mbunga zömasöma safusi. Ba awai wolau taru nahe andrö.

Gala nidanö andrö, töla, ba ahenia

III. 23 Ba ifazökhi gala sebua andrö, nifahele, 10 hela wa'ebolo mbawa, no owulo, ba 5 hela wa'alaŵa, dafulu manalagu wa'ebua. 24 Ba tou mbewenia, ba famaedo la'izu ndru'u, fulu hela, fasui, dua winali, nidölö famahele mege. 25 Ba fa'awe'e-we'e gala, ba lalu'a, ba bewenia, ba si mane bewe mako, no famaedo mbunga zömasöma safusi; ba ösinia, ba 266 ngaso'e idanö. 26 Felendrua wamaedo zaŵi zolu'i, 3 tanö miyou, ba 3 tanö ba gaekhula luo ba 3 tanö miraya ba 3 tanö ba gatumbukha. Ba si tohare ba hulura gala andrö, ba oi mibakha doyora. 27 Ba ifazökhi göi dayadaya andrö, töla, fulu fefu, öfa hela wa'anau ba öfa hela wa'ebolo ba tölu hela wa'alaŵa. 28 Ba si mane wamazökhi dayadaya andrö: 29 Nifolesi ngai, ba ba ngai andrö, nifasui lesi, ba famaedo zingo ba famaedo zaŵi ba famaedo Kerubi; ba si manö göi ba lesi andrö. Ba he yaŵa zingo andrö ba yaŵa zaŵi ba he tanö tou, ba bunga ni'oraeŵeraeŵe nifanaŵanaŵa. 30 Ba öfa roda zambua dayadaya, ba döladöla roda, ba töla. Ba nifo'alisi watalinga si öfa. Amaedola galisi, nifahele, daomadaoma mbalanga andrö. 31 Ba sobawa daomadaoma andrö, ba sowulo mbawania, sahela a matonga wa'eŵaŵa; ba nisua göi da'ö; ba lesinia, ba si öfa sagi, tenga sowulo. 32 Ba tou lesi roda andrö, si öfa. Ba döladöla roda, ba no nifaböbö ba nösi dayadaya andrö. Ba fa'alaŵa roda, ba sahela a matonga. 33 Ba no nifolau roda gureta roda andrö. Ba he döladölania ba he ösinia ma'afefu, ba oi nifahele. 34 Ba watalinga si öfa, ba si hulö galisi, nidölö famahele ba nösi. 35 Ba ba dete dayadaya andrö, ba si hulö daomadaoma, 1/2 hela wa'alaŵa, fasui, ni'owuloi'ö: Ba dete dayadaya andrö so daomadaoma andrö, si so sekhesekhe mbalanga, nidölö famahele mege ba ngainia andrö ba ba lesinia. 36 Ba ba wolowolo ngainia andrö, ba isua Kerubi ba singo ba ohi, ha wa'oya zonaha ba zi sagösagörö; ba bunga ni'oraeŵeraeŵe, fasui. 37 Si manö wamazökhi dayadaya andrö, si fulu si faoma famahele ba si faoma fa'ebua ba si faoma nga'eu. 38 Ba fulu göi ifazökhi balanga töla; 5 zo'e nösi zi sambua balanga, öfa hela wa'eŵaŵa mbawa. Sambusambua mbalanga ba dayadaya si fulu andrö. 39 Ba lima ibe'e tanö raya gosali ba lima tanö yöu, dayadaya andrö; ba gala sebua andrö, ba tanö ba gambölö ibe'e, tanö föna, tanö miraya.

Fakake ba gosali

IV. 40 Ba ifazökhi mbowoa ba sundrusundru ba figa Hiramo andrö ba i'asiwai nilau andrö fefu, nilaunia khö Zelomo ba gosali Yehowa andrö: 41 Taru nahe andrö, si dua, ba högö daru nahe, ni'owuloi'ö, si dombua ba ni'otaraŵa andrö, balu-balu högö daru nahe andrö — 42 ba famaedo mbua dalimo andrö, si 400, ba ni'otaraŵa andrö, si dombua, si dua winali zambua ni'otaraŵa, balu-balu högö daru nahe andrö, si dombua; 43 awö dayadaya andrö, si fulu, fabaya balanga andrö si fulu ba dayadaya andrö; ba gala sebua andrö, 44 si ha sambua ba saŵi andrö, si felendrua, solu'i gala andrö; 45 ba bowoa andrö ba sundrusundru ba figa. Ba gama-gama andrö fefu, nifazökhi Hiramo andrö khö razo Selomo, ba gosali Yehowa andrö, ba no töla ni'alösöigö. 46 Ba ndraso Yoridano ifafahele'ö razo, ba golabuta tanö, ba gotaluara Zukota Zaretano. 47 Ba lö itulo gama-gama andrö fefu Selomo, börö me no oya sibai; lo muhonogöi wa'abua döla andrö. 48 Ba ifafazökhi'ö Selomo gama-gama andrö fefu, si so ba gosali Yehowa dania: naha wame'e sumange andrö, ana'a, awö meza andrö, ana'a, si so yaŵa roti nifaigi-faigi andrö, 49 awö naha wandru andrö, lima ga gambölö ba lima ba gabera, naha wandru ana'a, föna wondrege ni'amoni'ö, ba famaedo mbunga andrö ba fandru ba guti wandru, ana'a, 50 ba figa sebua ba rosö, ba figa side-ide ba mako ba gali, balaki. Ba izi lagö mbawandruhö andrö, si dua görö mibakha — ba wondrege ni'amoni'ö — ba izi mbawandruhö andrö ba gosali, si dua görö, bawandruhö ba zi hulö dalu zalo, ba ana'a göi. 51 Ba me no awai nilau andrö, fefu, nifalau'ö razo Selomo ba gosali Yehowa andrö, ba i'ohe bakha Selomo ni'amoni'ö namania Dawido, firö andrö ba ana'a andrö, ba gama-gama, ibe'e ba mbate'e girö-girö andrö ba gosali Yehowa.

Famotokhi ba gahe

Fabaliŵa lala

Olayama Razo I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö