Wb/nia/Razo I/6
Osali[edit | edit source]
I. 1 öfa ngaotu a ŵalu ngafulu fakhe i'otarai wa'aheta Ndraono Gizeraeli ba danö Miserayi ba no alua medölu fakhe razora Zelomo,[1] me ifobörö wolau osali andrö khö Yehowa, ba mbaŵa Sifi, baŵa si dua.[2] 2 Ba osali andrö, nilau razo Selomo, ba 60 hela wa'anau ba 20 hela wa'ebolo ba 30 hela wa'alaŵa. 3 Ba ewe'ewe andrö, föna zi ndruhu nomo, ba no 20 hela wa'anau, dali wa'ebolo gosali, ba 10 hela wa'ebolo, föna gosali.[3] 4 Ba ifosandrela gosali, nifotarali. 5 Ba baero mbagolö, ba isahe na, fasui, ifasui gosali, awö nifo'oto'oto andrö, tanö furi, ibali'ö bate'e baero, fasui. 6 Si sagötö zahesahe andrö, tanö tou, ba 5 hela wa'ebolo, ba si sagötö, fanete, ba 6 hela ba si sagötö tanö yaŵa, ba 7 hela; noa sa ibosi mbagolö tanö baero, fasui, fa böi tefa'a ba mbagolö. 7 Ba me la'otomosi gosali andrö, ba kara si no mudölö mutoto mege, me labo'ai, lafa'anö, tobali lö murongo li wakake si'öli ba wotomo andrö, he farökha ba he fahö. 8 Ba bawandruhö ba zi sagötö tanö tou, ba ngai, ba tanö raya so, ba ora miyaŵa ba zi tatalu, ba ba zi sagötö tanö yaŵa. 9 Ilau sa'ae gosali andrö ba i'asiwai; ba sagö gosali fafa, ba gasö matua, ba oi eresi. 10 Ba ilau zahesahe andrö, ba gosali ma'afefu (fasui), lima hela zagötö, wa'alaŵa, ba ifaböbö ba gosali buatö eresi.
Amabu'ula li Lowalangi[edit | edit source]
II. 11 Ba humede Yehowa khö Zelomo, 12 imane: Ba gosali andrö, nilaumö: Na ötörö nifakhoigu andrö ba na ö'o'ö huku khögu ba na ötöngöni goroisagu, ba wanörö ya'ia, ba utörö khöu niŵa'ögu, fehedegu khö namau Dawido, 13 ba ba hunö Ndraono Gizeraeli u'iagö, ba lö u'erogö mbanuagu, Iraono Gizeraeli.[4]
He wisa na wame'e osali andrö[edit | edit source]
III. 14 Ba ilau gosali andrö Selomo ba i'asiwai. 15 Ba bagolö tanö bakha ba gosali, ba bagolö eresi ibe'e, i'otarai zalo, irugi narö zagö ibalugö bagolö, tanö bakha. Ba fafa zalo tou, ba senobari. 16 Ba ibalugö fafa eresi zi 20 hela andrö, tanö ba hambo gosali (tanö bakha), i'otarai zalo, numalö barö zagö; ba da'ö ilau zi hulö mbate'e ba hambo, fondrege ni'amoni'ö andrö. 17 Ba 40 hela wa'anau zi hulö dalu zalo, föna wondrege ni'amoni'ö andrö. 18 Ba bagolö eresi tanö bakha, nisua, la'izu ndru'u ba bunga; oi eresi; lö oroma kara. 19 Ba tanö bakha ilau wondrege ni'amoni'ö andrö, ena'ö ba da'ö labe'e dawöla zura goroisa Yehowa. 20 Ba föna wondrege ni'amoni'ö andrö, si 20 hela fa'anau ba 20 hela fa'ebolo ba 20 hela fa'alaŵa, nifo'uli balaki, ifazökhi naha wame'e sumange, eresi. 21 Ba tanö bakha, ba ifo'uli balaki gosali Selomo, ba ifatörö rate balaki föna wondrege ni'amoni'ö andrö, nifo'uli balaki göi. 22 Osali ma'asambua ifo'uli balaki, fatutu; ba he naha wame'e sumange andrö föna wondrege ni'amoni'ö, ba ifo'uli balaki, ma'asambua. 23 Ba ba wondrege ni'amoni'ö andrö, ba dombua ifazökhi Kerubi, eu, töla zai, fulu hela wa'alaŵa. 24 Lima hela wa'anau gafi Kerubi si sambua, ba lima hela göi gafi zi sambua, tobali fulu hela, i'otarai mbalö gafinia si sara, numalö ba mbalö zi sara. 25 Ba fulu hela göi Kerubi si sambua; faoma manö Kerubi si dombua, he nga'eu, ba he fa'ebua. 26 Faoma fulufulu hela wa'alaŵa Kerubi andrö, si dombua. 27 Ba bakha ba wondrege ni'amoni'ö andrö ibe'e Kerubi andrö, ba no nibologö gafira, tobali irugi mbagolö ba zi tambai afi zi sambua, ba ba mbagolö ba zi tambai irugi afi zi sambua, ba ba dalu ba faondra gafi. 28 Ba ifo'uli balaki Kerubi andrö. 29 Ba ba mbagolö gosali, fasui, ba ifasua'ö Kerubi ba ohi ba bunga, bakha ba wondrege ni'amoni'ö ba baulu. 30 Ba salo gosali göi, ba ifo'uli balaki, bakha ba wondrege ni'amoni'ö ba baulu. 31 Ba bawandruhö wondrege ni'amoni'ö, ba ifolagö [eu] zai. Ba lesi mbawandruhö ba ehomo fatambai, ba no ni'olima sagi. 32 Ba ba lagö mbawandruhö zai andrö, si dua görö, ba ifasua'ö Kerubi ba ohi ba bunga, ba ifo'uli balaki Kerubi andrö ba ohi, balaki niböbözi, ni'anifi'ö. 33 Ba he ba mbawandruhö baulu, ba ifalau'ö gehomo zai, si öfa sagi, 34 ba dua görö lagö, senobari, ba faoma no mutaba dalu, tobali duadua görö nifuyu'ö. 35 Ba ifasua'ö Kerubi ba ohi ba bunga, ba ifo'uli balaki, si fatöfa ba nisua andrö. 36 Ba ikölini golayama fönaföna gosali, tölu winaeta kara si öfa sagi ba sawinaeta balo eresi. 37 Ba ndröfi si öfa, ba mbaŵa Sifi tebe'e tou doyo gosali Yehowa andrö, 38 ba ba ndröfi si felezara, ba mbaŵa buli, baŵa si ŵalu, ba te'asiwai gosali, fefu hadia ia zi faböbö khönia, he wisa wolau ya'ia, tobali mewitu fakhe i'olau'ö.
Famotokhi ba gahe[edit | edit source]
Fabaliŵa lala[edit source]
Olayama Razo I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö