Wb/nia/Razo I/17

I'ombakha'ö wa lö teu Eliya, ba la'uri ia gaga

I. 1 Ba imane Eliya andrö, banua Disebe, ba danö Gileadi, khö Gahabi: Faya wa no sauri Yehowa, Lowalangi Ndraono Gizeraeli, si no möido enoni, na so namo mbanua ba he teu ba ndröfi andre, ha me uga fakhe, na tenga ya'o zanguma'ö! 2 Ba humede khönia Yehowa, imane: 3 Ofanö, tanö ba gatumbukha luo saŵa ba bini'ö ndra'ugö ba mbewe mbombo Keriti andrö, si handro Yoridano. 4 Ba öu idanö mbombo andrö, ba no uŵa'ö ba gaga, ena'ö la'uri ndra'ugö ba da'ö. 5 Ba i'o'ö niŵa'ö Yehowa, möi ia ba i'iagö mbewe mbombo Keriti andrö, si handro Yoridano. 6 Ba la'ohe'ohe khönia gaga kue ba diwo, ba zanguhulö wongi ba na tanö owi, ba önia idanö mbombo andrö.

Tefatenge ba Zarefa ia ba i'orifi lakha mbanua, fabaya ononia

II. 7 Ba lö ara sibai, ba ogo'ö mbombo andrö, me lö'ö sa'ae teu ba danö. 8 Ba humede khönia Yehowa, imane: 9 Faoso, ae ba Zarefa, banua Zidona andrö, ba iagö da'ö; noa sa uŵa'ö ba ndra alawe ba da'ö, lakha mbanua, ena'ö i'uri ndra'ugö. 10 Ba maoso ia, isaŵa Zarefa, ba me irugi mbawa göli mbanua, ba hiza ndra alawe, lakha mbanua, sangozaragö tuturu geu. Ba humede ia khönia, imane: Ta'u khögu nidanö ma'ifu ba nahia, ubadu! 11 Ba me möi mana'u, ba mu'ao na khönia Geliya, imane: Ohe göi khögu mato sambawa roti! 12 Ba imane: Faya wa no sauri Lowalangiu, Yehowa, na so khögu hadia ia zasoso, ha mato tambai tanga hamo ba rumbi ba ha ma'ifu wanikha ba migö; ba awena u'ozaragö geu ma'ifu, ba ufulido, ba wangasiwai khöma onogu, ba na no ma'a, ba hatö fa'amate. 13 Ba imane khönia Eliya: Böi busi dödöu! Ae'e, ba lau niŵa'öu andrö; ba ö'asiwai khögu ua zagörö kue side-ide ba ohe khögu baero; ba ömi onou, ba dania ö'asiwai. 14 Imane sa Yehowa, Lowalangi Ndraono Gizeraeli: Lö ahori hamo ba rumbi ba lö alö wanikha ba migö, irugi luo ba nibe'e Yehowa teu ba guli danö. 15 Ba möi ia, i'o'ö niŵa'ö Geliya; ba ara lö ambö öra, datölu ira. 16 Lö ahori hamo ba rumbi ba lö alö wanikha ba migö, itörö niŵa'ö Yehowa andrö, nifa'ema Geliya.

Isusugi zi mate, ono lakha mbanua andrö

III. 17 Ba aefa da'ö, ba mofökhö nono ndra alawe andrö, sokhö omo, ba tedou-dou manö wökhönia, irege aetu nosonia. 18 Ba imane ira alawe andrö khö Geliya: Hadia niŵa'öu khögu, ya'ugö enoni Lowalangi? Fe'amöimö khögu, ba ena'ö tefasugi ba dödö [Lowalangi] lalögu, ba wamunu onogu! 19 Ba imane khönia: Da nonou! Ba ihalö ba gaheta ninania, i'ohe yaŵa ba mbate'e ba zi sagötö, ba nahiania andrö, ba ibe'e ba gasonia. 20 Ba i'angaröfi li Yehowa, imane: He Yehowa, Lowalangigu, hadia wa no öfakao lakha mbanua andrö, si no möido tome, wamunu ononia? 21 Ba medölu ifadölö ia yaŵa nono, i'angaröfi li Yehowa, imane: He Yehowa, Lowalangigu, be'e mangawuli noso nono matua andre! 22 Ba ifondrondrongo wangandrö Geliya Yehowa, ba mangawuli noso nono andrö, tobali ifuli auri. 23 Ba ihalö nono Eliya, i'ohe tou moroi ba mbate'e ba zi sagötö; i'ohe yomo ba ibe'e khö ninania. Imane Eliya: Hiza, no ifuli auri nonou! 24 Ba imane ira alawe andrö khö Geliya: Awena aboto ba dödögu, wa no enoni Lowalangi ndra'ugö, awö wa si duhu manö daroma li Yehowa, nifa'emamö!

Famotokhi ba gahe

Fabaliŵa lala

Olayama Razo I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö