Wb/nia/Razo I/15
Abia, razo mado Yuda[edit | edit source]
I. 1 Ba me no alua mewelewitu fakhe razo Yerobeamo andrö, ono Nebati, ba tobali razo mado Yuda Gabia.[1] 2 Medölu fakhe razo ia ba Yeruzalema; ba töi ninania, ba Ma'akha, ono Gabisalomi. 3 Ba itörö lala si lö sökhi andrö khö namania, horö andrö fefu, nifazökhi da'ö, fönania, ba lö adölö dödönia khö Lowalanginia, Yehowa, tenga si mane tödö duania Dawido. 4 Börö sa Dawido, wa ibe'e khönia wandru ba Yeruzalema Lowalanginia, Yehowa, wa ibe'e auri nononia furinia, awö wa lö ibe'e adudu Yeruzalema,[2] 5 me no ilau zomasi Yehowa Dawido, lö hadia ia zi lö itörö ni'oroi'önia khönia, sagötö ya'ia, ha ba khö Guria andrö, Iraono Kheti.[3] 6 Ba fazuwözuwö manö ira Rehabeamo Yerobeamo, sagötö ya'ia. 7 Ba hadia nidunö-dunö na ena'ö ba khö Gabia andrö, fefu hadia ia nilaunia, ba noa sa mutanö ba zura hikaya razo mado Yuda. Ba fasuwö ira Gabia Yerobeamo. 8 Ba mate Gabia, itörö lala ndra amania, ba ba mbanua Dawido lako'o ia. Ba razo fangalinia, ba ononia Asa.[4]
Asa, razo mado Yuda satulö tödö. Fasuwöta khö Mbaesa ba famagölö khö Mbenihada. Fa'amate Asa[edit | edit source]
II. 9 Me no alua sara ambö dua wulu fakhe razo Ndraono Gizeraeli Yerobeamo tobali razo mado Yuda Asa andrö. 10 Ba 41 fakhe razo ia ba Yeruzalema. Ba töi ninania, ba Ma'akha ono Gabisalomi. 11 Ba somasi Yehowa ilau Asa, si mane tuania Dawido.[5] 12 Itibo'ö zohorö andrö ba ihori nadu andrö fefu, nifazökhi ndra tuania.[6] 13 Ba iheta göi ninania Ma'akha, fa böi sa'ae salaŵa ia, me no ifazökhi nadu khö Gasera andrö. I'eŵa nadu andrö khönia Asa ba itunu ba ndraso Kendrona. 14 Ba hili-hili andrö, ba lö'ö sa ibulö'ö. Ba tödö Asa andrö, ba noa sa adölö manö khö Yehowa, sagöto ya'ia. 15 Ba ifabe'e'ö ba gosali Yehowa ni'amoni'ö namania, awö ni'amoni'önia — firö ba ana'a ba gama-gama. 16 Ba fazuwözuwö ira Asa Mbaesa, razo Ndraono Gizeraeli, sagötö ya'ira.[7] 17 Möi musuwö mado Yuda Mbaesa, razo Ndraono Gizeraeli, i'aro'ö Rama, fa böi mangörö-ngörö niha khö Asa, razo mado Yuda.[8] 18 Ba ihalö Asa wirö ba ana'a fefu, si tosai na ba naha girö-girö ba gasali Yehowa, awö girö-girö ba gödo razo, ba ibe'e ba danga genoninia; ba ifatenge ira khö Mbenihada andrö, ono Dabirimo, ma'uwu Heziono, razo Ndrawa Garamo, ba Ndramaseko, imane khönia: 19 No fawu'u li ita, ba no fawu'u li ira namagu namamö. Hiza, ufa'ohe'ö khöu mbuala, firö ba ana'a; ba ae dudugö wawu'usa li andrö khönia Baesa, razo Ndraono Gizeraeli, ena'ö iböhöli wanuwö ya'odo. 20 Ba i'o'ö khö razo Asa Benihada ifatenge gumandra andrö khönia, ba wanuwö banua Ndraono Gizeraeli ba lafufu Iyono ba Dano ba Habeli Beti Ma'akha ba tanö Kineroti, ma'asagörö, fabaya tanö mado Nafetali ma'afefu. 21 Ba me irongo da'ö Baesa ba iböhöli wangaro'ö Rama, ifuli ia ba Dirisa. 22 Ba i'owuloi mado Yuda fefu razo Asa — samösa lö iröi furi. Ba lahalo gara andrö, awö geu balo, ni'oguna'ö Mbaesa ba wangaro'ö Rama ba ibe'e fangaro Geba ba mado Mbeniyami razo Asa, ba fangaro Misefa. 23 Ba hadia na ena'ö nidunö-dunö ba khö Asa andrö, ba fa'abölönia andrö fefu, ba hadia ia nilaunia, fefu, ba banua andrö, ni'aro'önia, ba noa sa mutanö ba zura hikaya razo mado Yuda. Ba ba wa'atuania, ba sofökhö ahe ia. 24 Ba mate Asa, itörö lala ndra amania, ba ba mbanua duania Dawido lako'o ia, ba ngai ndra tuania. Ba razo fangalinia, ba ononia Yozafati.[9]
Nadabi ba Baesa, razo Ndraono Gizeraeli. Fangohori nga'ötö Yerobeamo[edit | edit source]
III. 25 Ba Nadabi, ono Yerobeamo, zi tobali razo Ndraono Gizeraeli, me no arakha mendrua fakhe razo Asa, ba mado Yuda, ba mendrua fakhe razo Nadabi andrö, ba Ndraono Gizeraeli. 26 Ba si fatuwu khö Yehowa ilau, itörö lala namania andrö, horönia andrö, famaelungunia Iraono Gizeraeli. 27 Ba maoso udunia Mbaesa andrö, ono Gahia, mado Isasari, mamagölö ia ba niha bö'ö, ba ibunu Nadabi, ba Gibetono, banua Ndrawa Wilisiti; sanuwö Gibetono Nadabi ba Iraono Gizeraeli fefu, me luo da'ö. 28 Ba tobali ibunu Nadabi Baesa, me no arakha medölu fakhe razo mado Yuda Asa andrö, ba tobali razo Mbaesa, fangali Nadabi. 29 Ba me no razo ia, ba ibunu nga'ötö Yerobeamo, fefu, samösa lö isaigö motöi nga'ötö Yerobeamo, si so noso, ihori manö, dali niŵa'ö Yehowa, nifa'ema genoninia Ahia, banua Zilo,[10] 30 börö horö Yerobeamo andrö, nifazökhinia, famaelungunia Iraono Gizeraeli, wangandrö fönu Lowalangi Ndraono Gizeraeli, Yehowa. 31 Ba hadia na ena'ö nidunö-dunö ba khö Nadabi andrö, hadia ia fefu, nilaunia, ba no mutanö ba zura hikaya razo Ndraono Gizeraeli. 32 Ba fazuwözuwö ira Asa Mbaesa andrö, razo Ndraono Gizeraeli, sagötö ya'ira. 33 Ba me no arakha medölu fakhe razo mado yuda Asa, ba tobali razo Ndraono Gizeraeli fefu Mbaesa andrö, ono Gahia, ba 24 fakhe razo ia ba Dirisa. 34 Ba si fatuwu khö Yehowa ilau, itörö lala Yerobeamo andrö ba horö andrö ba nifaelungunia Iraono Gizeraeli.
Famotokhi ba gahe[edit | edit source]
Fabaliŵa lala[edit source]
Olayama Razo I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö