Wb/nia/Razo I/10

Möi tome Zelomo razo Zaba, ira alawe

I. 1 Ba me irongo duria Zelomo razo Zaba, ira alawe, ba möi ia ba wanandraigö Selomo dahö-dahö. 2 Irugi Yeruzalema ba ato sibai nawönia fao, awö gondra, sonoro famasa gö ba dalu-dalu ba ana'a sebua sibai ba feremata. Ba i'ondrasi Zelomo ba i'ombakha'ö khönia fefu hadia ia zi so ba dödönia. 3 Ba itema linia Selomo ba ngawalö hadia ia fefu, nisofunia khönia; lö hadia ia zi lö aboto ba dödö razo, ba si tebai itema linia. 4 Ba me no irongo wa'atua-tua Zelomo andrö fefu razo Zaba, ba me no i'ila gödo andrö nilaunia, ba öra andrö, 5 ba omo genoni Zelomo, ba halöŵö ngoni-ngoni andrö khönia, awö nukhara, ba same'e yomo gö khönia ba sumange nitunu andrö, nibe'e-be'enia ba gosali Yehowa, ba tobali dödönia, 6 ba imane khö razo: Si ndruhu manö nirongogu ba danögu, he wisa ba khömö ba fa'atua-tuamö andrö. 7 Hulö zi tebai faduhu dödögu, irugi we'amöigu andre, ba irege i'ila hörögu; ba ambö matonga na'i ni'ombakha'ö khögu; ebua sibai na moroi ba duria andrö, nirongogu, wa'atua-tuamö andrö ba ana'amö. 8 Ya ahowu ndra alawemö andrö ba ya ahowu genonimö andre, si lö aefa-aefa khöu, wamondrongondrongo fa'atua-tuamö! 9 Nisuno Yehowa, Lowalangimö andrö, si no mangomasi'ö ya'ugö, wamedadao ya'ugö ba dadaoma razo Ndraono Gizeraeli; me no si lö mamalö-malö wa'omasi Yehowa Ndraono Gizeraeli, andrö wa ifataro razo ndra'ugö, ena'ö huku satulö öfatörö. 10 Ba 27.772 balaki ibe'e bualania khö razo, ana'a, ba oya sibai wamasa gö ba dalu-dalu ba feremata; lö'ö sa'ae dania si manö wa'oya wamasa gö ba dalu-dalu, si mane nibe'e razo Zaba andrö buala khö razo Selomo. 11 Ba soloyo andrö göi khö Hiramo, sangai ana'a ba Gofiri, ba oya göi lasao'ö eu zendrana ba feremata. 12 Ba eu zendrana andrö, ba ibali'ö daomadaoma Selomo, he ba gosali ba he ba gödonia, ba biola nitika, side-ide ba sebua, ba zanunö andrö; zendrana andrö, si manö wa'oya, ba lö'ö sa'ae muhalö, lö mu'ila, irugi ma'ökhö andre. 13 Ba Selomo, ba ibe'e khö razo Zaba fefu hadia ia zomasi ia, fefu hadia ia ni'andrönia, lö lai nibe'enia khönia fa'oböwö razo. Ba mofanö sa'ae ia, ifuli ia ba danönia, awö genoninia andrö.

Lakhömi Zelomo ba fa'ebua gana'ania

II. 14 Ba fa'ebua gana'a, nisöndra Zelomo, döfidöfi, ba no 153.846 balaki, 15 lö lai nisöndrania ba zanöröi tanö ba waniaga ba ba zolafo ba ba razo Gerebi andrö, ba ba gumandru ba danö. 16 Ba 200 ibago dange Selomo, ana'a niböbözi, 600 fondruyu zambua; 17 ba 300 mbaluse, ana'a niböbözi, 150 fondruyu zambua. Ba ibe'e ba nomo eu gatua Libano andrö razo. 18 Ba baero da'ö ba ifazökhi razo dadaoma sebua, ifö guaza, ba ifo'uli balaki. 19önö mbosi dadaoma andrö, ba högönia, tanö furi, ba ni'owuloi'ö; ba daomadaoma, ba no mufatambai latalata da'io, ba ba zinga latalata da'io andrö, ba dua geu zingo. 20 Ba felendrua nga eu zingo ba mbosi andrö, si önö, fatambai. Lö murai mufazökhi zi manö ba razo bö'ö, heza. 21 Ba fefu mako Zelomo, ba ana'a; fefu gama-gama ba nomo eu gatua Libano andrö, ba no balaki manö; lö hadia ia wirö, me si lö ba dödö wirö, ba götö Zelomo andrö. 22 Noa sa so ba nasi nowo Darisi khö razo, si fao-fao ba nowo Hiramo andrö; samuza zi medölu fakhe so nowo Darisi andrö ba lasao'ö mbalaki ba firö ba ifö guaza ba ba'e ba fofo mera. 23 Ba italu'i razo ba guli danö fefu razo Selomo, ba wa'ebua gana'a ba ba wa'atua-tua. 24 Ba dozi niha ba guli danö omasi mangila Selomo, ba wamondrondrongo fa'atua-tuania, nibe'e Lowalangi ba dödönia. 25 Ba ero rofi, ba dozi mamuala ira khönia, gama-gama firö ba gama-gama ana'a ba nukha ba fangöna, ba famasa gö ba dalu-dalu ba kudo ba kudo kalide. 26 Ba oya i'asogö kureta ba si fakudo Selomo; 1400 khönia gureta ba 12.000 zi fakudo; ba mbanua gureta andrö ifataro da'ö ba ba ngai razo, ba Yeruzalema. 27 Fagölö-gölö ira wa'oya wirö wa'oya gara ba Yeruzalema, ibe'e razo, ba fa'oya döla waringi ba mbewe nasi döla geresi. 28 Ba danö Miserayi lahalö kudo andrö khö Zelomo, sambasambawa lahalö saniaga andrö khö razo, la'öli. 29 Sambusambua kureta nihalö miyaŵa moroi ba danö Miserayi, ba önö ngaotu rufia, ba sagesageu kudo, ba otu a lima wulu. Ba si manö wama'emara ba razo Ndraono Kheti fefu, ba ba razo Ndrawa Garamo.

Famotokhi ba gahe

Fabaliŵa lala

Olayama Razo I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö