Wb/nia/Razo I/19
Isaŵa danö si mate Eliya, me ifagohi'ö ia Izebela[edit | edit source]
I. 1 Ba i'ombakha'ö khö Gizebela Ahabi fefu nilau Geliya, awö wa no ahori ibunu si'öli zama'ele'ö andrö. 2 Ba ifatenge zinenge khö Geliya Izebela, imane khönia: Ndramulau khögu Lowalangi andrö zomasi ira, na tenga mane wa'alaŵa luo mahemolu ufatörö ba nosou nifatörö ba noso zama'ele'ö andrö fefu. 3 Ba ata'u ia, maoso ia, ilau mofanö, ba wangorifi ya'ia. Ba me no irugi Mbereseba andrö, ba mado Yuda, ba iröi ba da'ö ngoni-ngoninia andrö. 4 Ba ya'ia, ba isaŵa danö si mate, ma'ökhö fofanö, ba möi mudadao ba mbörö da'uli. Ba omasi ia mate, ba imane: Noa sa'ae, halö sa'ae nosogu, Yehowa; tenga si sökhi moroi khö ndra tuagu ndra'odo![1] 5 Ba ifadölö tou ia ba mbörö da'uli andrö ba mörö. Ba i'ogomuzaö ituko ia mala'ika, imane: Faoso, lau manga! 6 Ba me ifakhölö ia, ba hiza tanö ba högönia kue nibogö, sagörö, ba samba migö nidanö. Ba manga ia ba ibadu nidanö, ba ifuli ilau mörö. 7 Ba ifuli so mala'ika Yehowa, ituko, ba imane: Faoso, a göu, aröu sibai na sa döröŵau! 8 Ba maoso ia, manga ia ba ibadu nidanö, ba mowaö-waö ia ba wa'abölönia ba gö andrö, öfa wulu ngaluo ba öfa wulu mbongi irugi hili Lowalangi andrö, Horebi.[2]
I'oroma'ö ia khönia Yehowa ba hili Horebi ba ibe'e goroisa khönia[edit | edit source]
II. 9 Ba ba da'ö, ba möi ia ba dögi narö hili, ba mörö ia bakha ba da'ö. Ba humede khönia Yehowa, imane khönia: Hadia nihalöu ba da'e, Eliya? 10 Ba imane: No uforege wangombakha Yehowa, Lowalangi ngahönö; ba Iraono Gizeraeli, ba no la'erogö nifakhoimö andrö, naha wame'e sumange andrö khöu, ba no ladudugö, ba sama'ele'ö khöu, ba no labunu si'öli, tobali hatö ya'odo, ba la'alu-alui wamunu ya'o.[3] 11 Ba imane khönia Yehowa: Ae baero ba agö hili, föna Yehowa! Ba itörö Yehowa, ba fönania, ba angi sabölö sibai, fabali hili ibe'e ba arasa gara; ba Yehowa, ba tenga ba nangi andrö so. Ba me aefa nangi andrö, ba so ziheu; ba Yehowa, ba tenga ba ziheu andrö so. 12 Ba me aefa ziheu andrö, ba itörö alitö; ba Yehowa, ba tenga ba galitö andrö so. Ba me aefa galitö andrö, ba itörö angi si hohohoho manö. 13 Ba me irongo da'ö Eliya, ba ibalugö mbawania barunia sebua, ba möi ia baero, i'agö mbawa dögi andrö; ba so zihede khönia, imane: Hadia nihalöu ba da'e, Eliya? 14 Ba imane: No uforege wangombakha Yehowa, Lowalangi ngahönö, ba Iraono Gizeraeli, ba noa sa la'erogö nifakhoimö andrö, naha wame'e sumange andrö khöu, ba no ladudugö, ba sama'ele'ö khöu, ba no labunu si'öli, tobali hatö ya'odo: ba la'alu-alui wamunu ya'o. 15 Ba imane khönia Yehowa: Fuli'ö, ae ba danö si mate ba Ndramaseko, ba ae miyomo ba bayoini razo Ndrawa Garamo Hazaeli andrö.[4] 16 Ba Yehu andrö, ma'uwu Nimisi, ba bayoini razo Ndraono Gizeraeli, ba Elisa andrö, ono Zafati, banua Habeli Mehola, ba öbayoini sama'ele'ö, fangaliu dania.[5] 17 Ba tobali ha niha zaefa ba mbawa zi'öli Hazaeli, ba bunusö Yehu, ba ha niha zaefa ba mbawa zi'öli Yehu, ba bunusö Gelisa. 18 Ba fitu ngahönö zi tosai Iraono Gizeraeli ube'e, dozi balöduhi si lö irai aköi föna Mba'ali andrö, ba dozi bawa, si lö irai fa'ago khönia.
Tehonogöi fangalinia dania Gelisa[edit | edit source]
III. 19 Ba iheta ia ba da'ö, ba falukha ia Gelisa andrö, ono Zafati, samali'ö tanö ia: felendrua fasa zaŵi fönania, ba ya'ia zolohe fondrege tanö furi. Ba möi khönia Geliya, ihawui ia barunia sebua. 20 Ba iröi zaŵi no mege ba i'o'ö Geliya, imane: Tehe khögu möido fa'ago bawa khö namagu ba khö ninagu, awena dania u'o'ö ndra'ugö! Ba imane khönia: Ae'e, ba fuli'ö; böi olifugö'ö nilaugu khöu![6] 21 Ba iröi Geliya, möi ia, ihalö zaŵi andrö si safasa ba itaba; ba fakake zaŵi andrö, ba ibe'e eu, ba wangasosoi ösi, ba ibe'e ö niha andrö. Ba maoso ia, i'o'ö Geliya ba tobali ngoni-ngoninia.
Famotokhi ba gahe[edit | edit source]
Fabaliŵa lala[edit source]
Olayama Razo I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö