Wb/nia/Yosua/24
I. Falukhata safuria khö Yosua ba Zikhema
[edit | edit source]1 Ba ifalukha'ö mado Gizeraeli fefu Yosua ba Zikhema, ifakaoni'ö zatua Ndraono Gizeraeli ba salaŵara ba sanguhuku ba kumandru khöra, ba la'ondrasi Lowalangi.
2 Ba imane Yosua ba zato fefu: Da'ö niŵa'ö Yehowa, Lowalangi Ndraono Gizeraeli; "Ba götö föna sibai, ba yefo nidanö [Oiferati] so wurugömi, Tara andrö, ama ndra Aberahamo Nakhori, ba lafosumange Lowalangi bö'ö.[1]
3 Ba ufawu'a wurugömi Aberahamo, uheta ba danö yefo nidanö andrö ba ufatöröi'ö ba danö Gana'ana ma'asagörö, ba ato ma'uwunia ube'e, ube'e khönia Giza'aki andrö.[2] 4 Ba khö Giza'aki ba ube'e Yakobo andrö ba Ezau; ba khö Gezau andrö, ba utehe hili Ze'ira andrö, ena'ö ihalö khönia; ba Yakobo ba ononia, ba lasaŵa danö Miserayi.[3]
5 Ba ufatenge ndra Moze A'aroni, ufakao Ndrawa Miserayi, wolau nilaugu andrö ba khöra, ba aefa da'ö, ba ufawu'a ami.[4] 6 Uheta ndra amami ba danö Miserayi, ba mirugi nasi. Ba lagohi ndra amami Dawa Miserayi, la'ohe gureta ba wanuwö ba fao zi fakudo, irugi ba mbewe nasi zukhu andrö.[5] 7 Ba la'angöröfi li Yehowa ba ogömi-gömi ba gotaluami Ndrawa Miserayi ibe'e; ba ifatörö khöra nasi, tobali alömö ira. Ba i'ila hörömi, nifatörögu ba Ndrawa Miserayi andrö, ba ara dania ami ba danö si mate andrö.
8 Ba u'ohe ami ba danö Ndraono Gamori andrö, sowanua yefo Yoridano ba fasöndra ira khömi; ba ube'e ba dangami ira ba mihalö khömi danöra, ba uhori ira fönami.[6] 9 Ba maoso Mbalaki andrö, ono Zifora, razo Ndraono Moabi, ba wanuwö Iraono Gizeraeli. Ba ifatenge zinenge, ifakaoni'ö Mbileamo andrö, ono Mbeori, ba wangelifi ya'ami.[7] 10 Ba lö edöna ufondrondrongo li Mbileamo andrö. Ba ifahowu'ö ami ba tobali u'efa'ö ami ba dangania.
11 Ba mi'ötö Yoridano, ba mirugi Yerikho, ba fasöndra khömi mbanua Yerikho andrö, Iraono Gamori ba Dawa Weresi ba Dawa Gana'ana ba Iraono Kheti ba Iraono Girigasi ba Iraono Hewi ba Iraono Yebusi ba ube'e ba dangami ira.[8] 12 Ba ufowaö-waö fönami geto, ba moloi ira fönami labe'e, razo Ndraono Gamori andrö, si felendrua; tenga ba zi'ölimi ba tenga ba wanami![9]
13 Ba ube'e khömi danö ba zi lö erege dödömi, ba banua si tenga nitaru'ömi, ba mibali'ö nahiami, ba kabu nagu ba kabu nohi, si tenga nitanömi, ba mi'a mbua."[10]
14 Ba mi'ata'ufi sa'ae Yehowa ba mifosumange ia moroi si'aikö ba dödömi ba böi faröi ami, ba miheta nadu andrö, nifosumange ndra tuami yefo nidanö andrö ba ba danö Miserayi, ba mifosumange Yehowa.[11] 15 Ba na lö omasi ami wamosumange Yehowa, ba mihonogöi ma'ökhö, ha niha nifosumangemi, na Lowalangi andrö, nifosumange ndra tuami, si so yefo nidanö andrö, ba na Lowalangi Ndraono Gamori andrö, si so ami ba danö; ba ya'odo ba soroiyomogu fefu, ba Yehowa mafosumange!
II. Lafabu'u lira sato, ba wolo'ö khö Lowalangi
[edit | edit source]16 Ba latema li sato, lamane: Ya aröu khöma wangerogö Yehowa, ba wamosumange Lowalangi bö'ö! 17 Yehowa sa Lowalangima; ya'ia sa zolohe miyaŵa ya'ita ba ira amada moroi ba danö Miserayi, ba zi no möi sawuyu ita, ba solau sahöli-höli dödö andrö, ba zanehe ita, ba sondrorogö ya'ita ba lala andrö fefu, nitöröda, ba ba niha fefu, nitöröda tanö.[12] 18 Ba no ahori itimba fönada Yehowa soi andrö, awö Ndraono Gamori, si so ba danö. Ya'aga göi mamosumange Yehowa, me no ya'ia Lowalangima!
19 Ba imane Yosua ba zato: Tebai samosumange Yehowa ami, me no Lowalangi ni'amoni'ö ia; Lowalangi solohu ia: lö ibe'e aefa khömi lalömi ba horömi andrö![13] 20 Na mi'erogö Yehowa, wamosumange Lowalangi bö'ö, ba i'erogö göi ami ba ifatörö khömi zi lö sökhi ba ihori ami, lö lai wa no si sökhi ifatörö khömi mege.
21 Lamane sato khö Yosua: Böi, Yehowa mafosumange![14]
22 Ba imane Yosua ba zato: Ya'ami zi so ba mbörö khömi, wa no mihonogöi, Yehowa nifosumangemi.
Lamane: Ya'ia da'ö!
23 Ba miheta Lowalangi bö'ö andrö, si so ba khömi, ba ena'ö khö Lowalangi Ndraono Gizeraeli andrö, Yehowa, aolo dödömi![15]
24 Ba lamane sato khö Yosua; Lowalangima, Yehowa andrö, mafosumange ba linia mofondrondrongo!
25 Ba fawu'u li ira Yosua niha sato, me luo da'ö, ba ibe'e goroisa khöra Yosua ba ifakhoi lala, ba da'ö, ba Zikhema.[16] 26 Ba itanö ba zura goroisa Lowalangi huhuo andrö Yosua; ba ihalö gowe sebua, ifasindro ba da'ö ba mbörö manawa, si te'u'u ba ni'amoni'ö khö Yehowa andrö.
27 Ba imane Yosua ba niha sato fefu: Hiza, si so ba mbörö khöda gowe andre, noa sa irongo fefu daroma li andrö, huhuo Yehowa khöda; andrö si so ba mbörö ia, ba khömi andrö, fa böi mi'osilö'ögö Lowalangimi.[17] 28 Aefa da'ö, ba ifofanö ira Yosua, isaŵa dana khönia zamösana.
III. Fa'amate Yosua ba fa'amate Geleazari
[edit | edit source]29 Ba noa da'ö, ba mate Yosua andrö, ono Nuni, enoni Yehowa, fulu töra otu fakhe wa'arania ba guli danö. 30 Ba lako'o ia ba danö tana khönia, ba Dimenata Zera, ba hili mado Geferayi, yöu hili Gasi andrö. 31 Ba lafosumange Yehowa Iraono Gizeraeli, götö wa'ara Yosua andrö, ba he ba götö zatua andrö, sanau noso moroi khö Yosua, si no mangila folau Yehowa andrö, nilaunia ba Ndraono Gizeraeli.[18]
32 Ba boto Yosefo andrö, ni'ohe Ndraono Gizeraeli moroi ba danö Miserayi, ba lako'o ba Zikhema, ba mbenua andrö, ni'öli Yakobo no ba Ndraono Hemori, soböli si otu kesita, ba tebe'e tana ba ma'uwu Yosefo.[19]
33 Ba mate göi Geleazari andrö, ono Ga'aroni, ba lako'o ia ba Gibea, banua nononia Fineha andrö, nitehe khönia ba hili mado Geferayi andrö.
Famotokhi ba gahe
[edit | edit source]- ↑ MozI 11:31
- ↑ MozI 21:2
- ↑ MozI 25:24; 36:8; 46:5
- ↑ MozII 3:10
- ↑ MozII 14:5, b.t.
- ↑ MozIV 21:25
- ↑ MozIV 22:5
- ↑ Yos 6:1 b.t.
- ↑ MozII 23:28; Sin 44:4
- ↑ MozV 6:10 b.t.
- ↑ SamI 7:3
- ↑ MozII 20:2
- ↑ MozII 20:5; MozIII 19:2
- ↑ Sin 10:5 b.t.
- ↑ MozI 35:2
- ↑ RazII 23:3
- ↑ MozI 31:48
- ↑ Nga'ötII 34:33
- ↑ MozI 33:19; 50:25
Fabaliŵa lala
[edit source]Olayama Yosua: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö