Wb/nia/Yosua/9

From Wikimedia Incubator
< Wb‎ | nia‎ | Yosua
Wb > nia > Yosua > 9

I. Lafaböbö ira razo Ndrawa Gana'ana, ba wanimba Yosua[edit | edit source]

1 Ba me larongo da'ö razo fefu, yefo Yoridano, ba hili ba ba zalo'o ba si hene asi sebua fefu irege tanö ba hili Libano, Dawa Kheti andrö ba Iraono Gamori ba Dawa Gana'ana ba Dawa Weresi ba Dawa Hewi ba Dawa Yebusi, 2 ba la'orudugö ira, ha sara dödö, ba wanimba Yosua ba Iraono Gizeraeli.

II. Fa'onekhe mbanua Gibeona andrö; fawu'usa li khö Yosua[edit | edit source]

3 Ba larongo banua Gibeona andrö hadia nilau Yosua ba Yerikho ba ba Ga'i. 4 Ba la'onekhe'ö göi, maoso ira, lafatö'ö göra ba lala, si'e satua labe'e ba hulu galidera, awö naha nagu satua, si no asika, niböbö. 5 Ba badagahe satua, si no mubalo labe'e ba gahera, la'onukha nukha satua ba fefu kue, nifatö'öra, ba no oköli, kiwo'ö sa'ae. 6 Ba möi ira khö Yosua ba golombaseŵa ba Giligala, ba lamane khönia ba ba Ndraono Gizeraeli: Ma'otarai danö saröu, ba datalau fawu'u li.

7 Ba lamane Iraono Gizeraeli ba Ndrawa Hewi andrö: Ma dania ba da'e khöda so mbanuada khömi, ba he mawisa fawu'u li khömi?

8 Ba lamane khö Yosua: Sawuyumö ndra'aga. Ba imane Yosua: Ha niha ami ba heza mi'otarai? 9 Ba lamane khönia: Tanö saröu sibai ma'otarai, ya'aga sawuyumö, börö duria Lowalangimö andrö, Yehowa; noa sa marongo duriania, he hadia ia fefu nilaunia ba danö Miserayi andrö, 10 ba he zui fefu nilaunia ba razo Ndraono Gamori andrö si darua, yefo Yoridano, Sihona, razo Hesibona ba Ogi, razo Mbazana ba Gasaroti.[1] 11 Ba lamane khöma satuama ba banuama fefu: Mifaigi gömi ba lala ba mifaondragö ira, ba mimane khöra: Sawuyumi ndra'aga, ba milau fawu'u li khöma. 12 Ya'e kue andre khöma; aukhu na, me mafa'anö ba khöma, öma ba lala, me mofanöga we'amöi khömi, ba hiza, no oköli ba kiwo'ö. 13 Ba ya'e naha nagu khöma: bohou me mafo'ösi, ba iada'e, ba no atika; ba ya'e nukhama ba badagahema: no ahakhö sibai, börö wa'arama ba lala.

14 Ba lahalö göra andrö ösa Iraono Gizeraeli, ba lö lasofu mbawa Yehowa. 15 Ba ilau fahuwu khöra Yosua, fawu'u li ira, ba wangorifi ya'ira. Ba möi ba hölu khöra zatua mbanua.

III. Teboka walimosa andrö; labe'e sawuyu mbanua Gibeona andrö[edit | edit source]

16 Ba ha tölu bongi aefa fawu'u li ira, ba larongo wa sahatö ira, wa ba da'ö khöra so mbanuara. 17 Ba maoso Ndraono Gizeraeli, ba ha dua wongi, ba larugi mbanua khöra. Ba töi mbanuara andrö, ba Gibeona ba Kafira ba Be'eroti ba Kiriati Yeari. 18 Ba la'orifi ira Iraono Gizeraeli, me no möi ba hölu khöra zatua mbanua ba khö Yehowa, Lowalangi Ndraono Gizeraeli.

Ba mukökö-kökö zato fefu ba zatua andrö.

19 Ba lamane salaŵa fefu ba zato: No möi ba hölu ndra'aga khöra ba khö Yehowa, Lowalangi Ndraono Gizeraeli, andrö wa lö tola tababaya ira. 20 Talau khöra zane ba ta'orifi ira, fa böi göna fönu [Lowalangi] ita, me no möi ita ba hölu khöra.

21 Ba lamane khöra salaŵa: Ni'orifi ira. Ba tobali sangai eu ba sana'u idanö ira ba mbanua fefu, si mane niŵa'ö zalaŵa andrö khöra.

22 Ba ifahede'ö khöra Yosua, ba imane khöra: Hana wa milimo ndra'aga, wanguma'ö: Banua saröu ndra'aga, ba no ba da'e khöda mbanuami? 23 Andrö ya ni'elifi ami ba böi yamalö-malö wa sawuyu ami, sangai eu ba sana'u idanö ba nomo Lowalangigu!

24 Ba latema li Yosua, lamane: No te'ombakha'ö khöma, ya'aga sawuyumö, hadia niŵa'ö Lowalangiu Yehowa ba genoninia Moze andrö, wa edöna ibe'e khömi danö ma'afefu, awö wa edöna ihori fönami fefu niha ba danö. Ba ata'u sibai ndra'aga mibunuga; andrö wa mamanö. 25 Ba iya'e, ba ba dangau so ndra'aga; satulö dödöu ba somasi'ö, ba fatörö khöma.

26 Ba ilau khöra zi manö, i'efa'ö ira ba danga Ndraono Gizeraeli, fa böi labunu. 27 Ba ibali'ö sangai eu ba sana'u idanö ba mbanua fefu ba ba naha wame'e sumange khö Yehowa ira Yosua, me luo da'ö, irugi ma'ökhö andre, ba nahia nituyu Yehowa dania.

Famotokhi ba gahe[edit | edit source]

  1. MozIV 21:24

Fabaliŵa lala[edit source]

Olayama Yosua: 123456789101112131415161718192021222324

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö