Wb/nia/Yosua/8

From Wikimedia Incubator
< Wb‎ | nia‎ | Yosua
Wb > nia > Yosua > 8

I. Fa'onekhe Yosua ba mbanua Ga'i andrö[edit | edit source]

1 Ba imane Yehowa khö Yosua: Böi ata'u ndra'ugö ba böi atalö dödöu. Ohe zabölö fefu ba labu, ae misi yaŵa ba Ga'i. Hiza, no ube'e ba dangau razo Ga'i andrö, awö mbanuania, awö danönia.[1] 2 Ba ölau ba mbanua Ga'i ba khö razora nilaumö ba Yerikho ba khö razora; ba hadia nisöndrami khöra ba uriföra, ba hana na mihalö khömi. Ba öfatenge ösa, niha, samini'ö ya'ira ba gero mbanua.[2]

3 Ba maoso Yosua, awö zabölö fefu, ba we'amöi misi yaŵa ba Ga'i. Ba itutuyu zi tölu ngafulu sabölö Yosua ba ifatenge, ba zi bongi. 4 Ba ibe'e li khöra, imane: Si tobini dania ami ba gero mbanua; böi aröu ami ba ngai mbanua ba si te'anö manö ami fefu. 5 Ba ya'odo, awö fefu zi fao khögu, ba mahatö'ö ndra'aga ba mbanua; ba na möi ira baero, si mane no, ba wangondrasi ya'aga, ba moloi ndra'aga. 6 Ba lagohi dania ndra'aga, irege no aefa ira ba mbanua mabe'e; lamane sa dania dödöra: moloi ira, si mane ba zi föföna mege. 7 Ba moloi manö ndra'aga. Ba so dania ami, moroi ba mbini-mbini andrö, ba atu'a ami ba mbanua mibe'e; Yehowa, Lowalangimi, zame'e ba dangami. 8 Ba na no atu'a ami mibe'e, ba migule'ö galitö ba mbanua andrö. Mi'o'ö niŵa'ö Yehowa. Hiza, no ube'e li khömi!

9 Ba i'efa'ö ira Yosua, ba lasaŵa mbini-mbini andrö, la'iagö gotaluara Mbetieli Ga'i, tanö ba gaekhula luo i'otarai Ga'i. Ba lö aefa Yosua ba zi möi manuwö, ba zi bongi andrö.

10 Ba ihulö wongi Yosua wamöfö'ö sanuwö, ba isaŵa misi yaŵa Ga'i, awö zatua Ndraono Gizeraeli, la'iagö föna zanuwö. 11 Ba dozi sabölö, awönia, ba fao misi yaŵa, lahatö'ö ira, larugi gamaudu mbanua, ba molombase ira tanö yöu, i'otarai Ga'i, daso ba gotaluara Ga'i. 12 Awena iföfö'ö niha, mato lima ngahönö, ba ifatenge ba mbini-mbini andrö, ba gotaluara Mbetieli Ga'i, tanö ba gaekhula luo, i'otarai mbanua. 13 Ba dozi sanuwö, sabölö fefu, yöu mbanua, awö zi so moroi furi, ba fafa'ese tanö ba gaekhula, i'otarai mbanua. Ba Yosua, ba isaŵa dalu ndraso, ba zi bongi andrö.

II. Atu'a ira ba Ga'i. Ladudugö mbanua Iraono Gizeraeli[edit | edit source]

14 Ba me i'ila da'ö razo Ga'i, ba la'aliogö banua Ga'i, lahulö wongi, wangondrasi Iraono Gizeraeli, ba wasöndrata ena'ö, razo awö zabölö khönia fefu ba naha nihonogöi, föna-föna zalo'o. Ba lö i'ila, wa no so zi tobini tanö ba gaekhula, i'otarai mbanua. 15 Ba labe'e ni'alani ira Yosua ba Iraono Gizeraeli fefu, moloi ira, lasaŵa danö si mate. 16 Ba la'oroi'ö fefu zi so yomo ba mbanua na, ba wolohi ya'ira, ba lagohi Yosua, ba aröu aefa ira ba mbanua. 17 Ba samösa lö si tosai ba Ga'i ba ba Mbetieli, si lö möi ba wolohi Iraono Gizeraeli, ba lö'ö sa mukusi mbawa göli mbanua furira, ba lagohi Ndraono Gizeraeli.

18 Ba imane Yehowa khö Yosua: Oro'ö doho, si so ba dangau, ba Ga'i andrö; ube'e sa'ae ba dangau! Ba i'oro'ö Yosua doho andrö si so ba dangania, ifaudugö Ga'i.

19 Ba la'aliogö ira si tobini andrö, laröi nahara, fulöi ira, me i'oro'ö danga Yosua, lasaŵa miyomo, atu'a ira; ba lada'i-da'i wogule'ö alitö. 20 Ba me labali'ö ira furi banua Ga'i no mege, ba la'ila miyaŵa zimbo mbanua andrö, ba atata dölara, tebai moloi ira, heza göi lasaŵa ena'ö. Ba si no moloi andrö, sanaŵa tanö si mate ba labali'ö ira furi ba zolohi andrö.

21 Ba la'ila ira Yosua ba Iraono Gizeraeli fefu wa no atu'a ba mbanua zi tobini andrö, awö zimbo mbanua miyaŵa, ba lafuli ira, ba fasöndra ba mbanua Ga'i andrö.

22 Ba lafaondragö ira si so yomo ba mbanua, tobali tolazi ira ba gotalua Ndraono Gizeraeli, so moroi föna ba so moroi furi. Ba la'ö'ötö tou, irege samösa lö si tosai, soloi ena'ö ba sauri.

23 Ba razo Ga'i andrö ba lara'u auri ba la'ohe khö Yosua. 24 Ba me no ahori labunu Iraono Gizeraeli mbanua Ga'i andrö, solohi ya'ira mege, baero ba mbenua, ba danö si mate, me no ahori mate ba mbawa zi'öli, irege samösa lö si tosai, ba mangawuli ba Ga'i Ndraono Gizeraeli fefu ba labunu zi so yomo ba mbanua. 25 Ba tobali felendrua ngahönö zi mate, me luo da'ö ira matua ba ira alawe, banua Ga'i andrö fefu.

26 Ba lö iböda dangania Yosua wangoro'ö toho no mege, irege no ahori tefakiko mbanua Ga'i andrö. 27 Ha uriföra ba hadia ia nisöndrara ba mbanua, ba lahalö khöra Iraono Gizeraeli, dali niŵa'ö Yehowa, oroisania khö Yosua.

28 Ba ifatunu'ö Ga'i Yosua, labali'ö adudula si lö mamalö-malö, tanö si mate, irugi ma'ökhö, andre. 29 Ba ifataŵi'ö ba döla geu razo Ga'i, irugi tanö owi. Ba me aekhu luo, ba iŵa'ö Yosua, laheta ba döla geu mbotonia, ba latibo'ö baero mbanua ba lahöna gara balu-balunia; irugi ma'ökhö andre.[3]

III. Naha wame'e sumange ba hili Gebala, famahowu'ö ba fangelifi[edit | edit source]

30 Ba ifazökhi naha wame'e sumange Yosua khö Yehowa, Lowalangi Ndraono Gizeraeli, ba hili Gebala, 31 i'o'ö niŵa'ö genoni Yehowa andrö, Moze ba Ndraono Gizeraeli, nitanö ba zura goroisa andrö khö Moze: naha wame'e sumange kara si lö mutoto, si lö mufatörö fakake si'öli, ba labe'e zumange nitunu khö Yehowa, ba detenia ba lataba zumange fangorifi.[4] 32 Ba isura ba da'ö ba dete gara goroisa Moze andrö, nisurania ba Ndraono Gizeraeli.

33 Ba dozi Iraono Gizeraeli ba satuara ba kumandru ba sanguhuku, ba no lafatambai dawöla gamabu'ula li, no fangai ba gere ono Lewi andrö, samabea tawöla gamabu'ula li khö Yehowa, he niha bö'ö, ba he madora, matonga tanö ba hili Garisi ba matonga tanö ba hili Gebala, la'o'ö niŵa'ö genoni Lowalangi andrö, Moze, föna, ba wamahowu'ö mado Gizeraeli.[5]

34 Ba noa da'ö, ba ibaso [Yosua] fefu daroma li oroisa andrö, famahowu'ö ba fangelifi, dali sibai zi so ba zura goroisa andrö. 35 Sambua li lö'ö, niŵa'ö Moze, si lö ibaso Yosua ba Ndraono Gizeraeli fefu, sorudu, ba he ba ndra alawe ba he ba ndraono ba he ba niha bö'ö, si no fao khöra.

Famotokhi ba gahe[edit | edit source]

  1. MozI 15:1 b.t.
  2. MozV 20:14
  3. MozV 21:23
  4. MozII 20:25; MozV 27:4
  5. MozV 27:12

Fabaliŵa lala[edit source]

Olayama Yosua: 123456789101112131415161718192021222324

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö