Wb/nia/Yosua/2

From Wikimedia Incubator
< Wb‎ | nia‎ | Yosua
Wb > nia > Yosua > 2

I. Tefatenge zamauze andrö ba mörö ira khö Rakhaba[edit | edit source]

1 Ba darua ifatenga Yosua, ono Nuni andrö, niha, si möi mamauze, moroi ba Ziti, lö ifarongogö, ba imane: Mi'ae mifaigi danö andrö ba banua Yerikho! Ba möi ira ba larugi yomo khö zohorö, ira alawe, Rakhaba döi, ba mörö ira ba da'ö.[1]

2 Ba te'ombakha'ö khö razo Yerikho, lamane: Hiza, no so niha, bongi, Iraono Gizeraeli, ba wamauze tanö.

3 Ba ifatenge khö Rakhaba razo Yerikho, imane khönia: Ohe tou niha andrö, si no möi khöu, baomou, me no ba wamauze tanö fefu möi ira.

4 Ba ihalö niha andrö si darua ira alawe andrö, ibini'ö, ba imane: Duhu, no möi khögu niha, ba lö u'ila, he moroi ira. 5 Ba me inötö lakusi mbawa göli, me bongi, ba möi baero niha andrö; lö u'ila, heza lasaŵa. Mita'i-ta'i migohi ira, ena'ö mikhamö!

6 Ba no i'ohe yaŵa ira ba dete nomo ba no ibini'ö barö döla daliö, nifa'anönia ba dete nomo yaŵa.

7 Ba lagohi ira banuara andrö, ba lala ba Yoridano, ba götöna andrö; ba lakusi mbawa göli, me no latörö solohi andrö.

II. I'orifi zamauze andrö Rakhaba ba amabu'ula khönia[edit | edit source]

8 Ba lö si mörö ira na, ba möi yaŵa ndra alawe andrö ba dete nomo khöra.

9 Ba imane ba niha andrö: U'ila, wa no ibe'e khömi danö andre Yehowa, awö wa no ihawui ndra'aga fa'ata'uma ami, awö wa no atalö dödö niha ba danö fefu, ba khömi andrö. 10 Noa sa marongo, he wisa Yehowa wangogo'öisi asi zukhu andrö fönami, me aheta ami ba danö Miserayi, ba hadia nilaumi ba razo Ndraono Gamori andrö, si darua, yefo Yoridano, Sihona ba Ogi, nifakikomi.[2] 11 Me marongo da'ö, ba atalö dödöma, ba samösa lö'ö sa'ae sabe'e tödö, ba khömi andrö, me no Lowalangi ba mbanua si yaŵa ba ba guli danö si tou Lowalangimi andrö, Yehowa.[3] 12 Ba mi'ae ba hölu sa'ae khögu, ba khö Yehowa, wa mihakhösi tödö zoroiyomo namagu fefu, si mane fa'ahakhö dödögu ami, ba mibe'e khögu dandra, wa tenga si falimo ami. 13 Mi'orifi namagu ba inagu ba talifusögu matua ba talifusögu alawe, awö dozi zi faböbö khöra, böi mibe'e mate ndra'aga.

14 Ba lamane khönia niha andrö: Alakha aetu nosoma salahimi! Na lö mi'ombakha'ö we'amöima andre, ba lö zi lö mahakhösi tödö ndra'ugö, na ibe'e khöma danö andre Yehowa, lö malimo'ö.

15 Awena idada ira ba zandrela sinali, me no fasinga ba göli mbanua nomonia; ba dete göli so nahiania. 16 Ba imane khöra: Misaŵa hili, fa böi lakhamö ami solohi andrö, ba mibini'ö ami, ba da'ö tölu bongi, irege mangawuli zolohi andrö, ba awena dania mofanö ami.

17 Ba lamane khönia niha andrö: Ba aefa ndra'aga ba hölu andrö, ni'andröu khöma [na lö ö'o'ö niŵa'öma khöu]. 18 Hiza, na marugi danö, ba ötaŵi zinali soyo andre ba zandrela, ba nidadamö ya'aga, ba ö'owuloi yomo khöu ndra amau inau ba ira talifusöu, awö zoroiyomo namau fefu. 19 Ba ha niha zanörö ora, we'amöi tou baolayama, ba bali-balinia nosonia ba lö horöma, ba dozi sorudu yomo khöu, ba ya'aga zolu'i noso, na so zombambaya ya'ira. 20 Ba na ö'ombakha'ö we'amöima andre, ba aefa göi ndra'aga ba hölu andrö, ni'andröu khöma.

21 Ba imane: Ya'itörö niŵa'ömi! Ba i'efa'ö ira, ba mofanö ira. Ba itaŵi ba zandrela zinali soyo andrö.

III. Mangawuli khö Yosua zamauze andrö[edit | edit source]

22 Ba mofanö ira, larugi hili ba la'iagö ba da'ö, tölu bongi, irege no mangawuli zolohi andrö; ba la'alui ira solohi, ma'asara lala andrö, ba lö lasöndra. 23 Ba mangawuli niha andrö, si darua, latueli hili, möi ira miyefo khö Yosua, ono Nuni, ba ladunö-dunö khönia fefu zi no falukha ira. 24 Ba lamane khö Yosua: No ibe'e ba dangada danö andrö ma'afefu Yehowa ba noa göi atalö dödö niha ba danö fefu ba khöda andre.

Famotokhi ba gahe[edit | edit source]

  1. Mat 1:7; Heb 11:31; Yak 2:25
  2. MozII 14:21; MozIV 21:24
  3. MozV 4:39

Fabaliŵa lala[edit source]

Olayama Yosua: 123456789101112131415161718192021222324

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö