Wb/nia/Moze I/4

I. Ka'ino ba Habeli ba sumange nibe'era

1 Ba orudu niha khö wo'omonia, ba manabina ba madono, Ka'ino döi nononia, ba imane: No usöndra niha, itolo Lowalangi. 2 Ba ifuli mo'ono, Habeli döi, akhi Ga'ino.

Ba sanguri biri-biri Habeli ba sangahalö Ga'ino.

3 Ba ara ma'ifu, ba ibe'e zumange Yehowa Ka'ino bua nowi khönia.

4 Ba ibe'e göi Habeli, ono gurifönia si a'a, tawö ibe'e. Ba omasi Yehowa Habeli ba sumange khönia; 5 ba Ka'ino ba sumange andrö khönia, ba lö omasi ia.

Ba mofönu sibai Ga'ino ba abao mbawania.

6 Ba imane Yehowa khö Ga'ino: Hana wa mofönu ndra'ugö, ba hana wa abao mbawau? 7 Tenga si manö: na satulö ölau, ba tola öfaöga mbawau; ba na tenga satulö nilaumö, ba no so moroi tou horö, itarogö ndra'ugö ba i'isö'ö; ba ya'ugö ba höndrögö ia.

II. Ibunu Habeli Ka'ino ba itegu ia Lowalangi

8 Ba imane Ka'ino khö nakhinia: Tabu ba mbenua! ba me no larugi mbenua, ba maoso Ga'ino khö nakhinia Habeli, ibunu.

9 Ba imane Yehowa khö Ga'ino: Heza so nakhiu Habeli?

Ba imane: Lö u'ila; hadia, samaigi-maigi akhigu andrö ndra'odo?

10 Ba imane: Hadia nilaumö? Hiza, mu'ao khögu ndro nakhiu andrö moroi ba danö tou. 11 Ba iada'e, ba ni'elifi ndra'ugö, nifofanö ba danö andrö, si no mamokai bawania, ba wamadu do nakhiu andrö, moroi ba dangau. 12 Na monowi ndra'ugö ba danö, ba lö'ö sa'ae ibe'e khöu mbuania; si lö hinaoma ndra'ugö ba guli danö!

13 Ba imane Ka'ino khö Yehowa: Si tebai utaha lua-lua horögu andrö. 14 Öfofanö ndra'o ma'ökhö, moroi ba danö, ba samini'ö ya'ia fönau ndra'odo ba si lö hinaoma ba guli danö, ba ha niha zi falukha khögu, ba ibunudo.

15 Ba imane khönia Yehowa: Hiza, mewitu lalau mbalö ba zamunu Ka'ino.

Ba ifotandra Ga'ino Yehowa, fa böi ibunu si falukha khönia.

16 Ba mofanö Ga'ino, i'erogö Yehowa; ba danö Nodi soso ia dania, tanö ba gatumbukha luo, i'otarai Gedena.

Na monowi ndra'ugö ba danö, ba lö'ö sa'ae ibe'e khöu mbuania; si lö hinaoma ndra'ugö ba guli danö!

III. Nga'ötö Ga'ino

17 Ba orudu Ga'ino khö wo'omonia, ba manabina ba madono, Khanoki döi nononia. Ba itaru'ö mbanua ba ibe'e töi mbanua andrö döi nononia andrö, Khanoki.

18 Ba ono Khanoki, ba Iradi. Ba ono Giradi ba Mehuya'eli, ba ono Mehuya'eli, ba Metuza'eli, ba ono Metuza'eli ba Lameki.

19 Ba samodombua dongania Lameki andrö, Ada döi zi sambua ba Sila döi zi sambua. 20 Ba mo'ono Gada, Yabalo döi nononia, tua zi so baosi, sanguri hadia ia da'ö. 21 Ba akhinia Yubalo, tua zolau biola ba sigu. 22 Ba mo'ono göi Zila, Tubaka'ino nononia, tua ziambu da'ö, ba talifusönia alawe, ba Na'ama.

23 Ba imane Lameki khö wo'omonia andrö si darua: Ya'ugö Ada ba ya'ugö Sila, mifondrongondrongo wehedegu andre! Ya'ami fo'omo Lameki, ya'aboto ba dödömi niŵa'ögu! Ubunu niha, balö zokho andre khögu ba ono niha balö zelezitö andre. 24 Na fitu winaeta wolau balö Ga'ino, ba fitu ngafulu a fitu winaeta mbalö Lameki andre.

IV. Seti awö Enosi ba böröta we'angaröfi li töi Lowalangi

25 Ba ifuli orudu Gadamo khö wo'omonia, ba mo'ono ia ono matua, ba ibe'e töinia Zeti (Te'ali). [Imane]: Noa sa ibe'e khögu nga'ötö bö'ö Lowalangi, fangali Habeli andrö, nibunu Ga'ino.

26 Ba mo'ono göi Zeti andrö, ba ibe'e töi nononia Genosi.

Ba me luo da'ö, ba labörötaigö we'angaröfi li döi Yehowa.

Famotokhi ba gahe

Fabaliŵa lala

Olayama Moze I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö