Wb/nia/Moze I/44

I. Mofanö ndra ga'a Yosefo. Fa'abu dödöra, nifobörö Yosefo

1 Ba imane Yosefo ba zatua zangai halöŵö khönia: Fo'ösi fakhe zi'e niha andrö, ndrohu-ndrohu zi tola la'ohe; ba ana'a zamösana, ba öbe'e ba zuzu nösi zi'e khönia; ba mako firö andrö khögu, 2 ba öbe'e ba zuzu nösi zi'e zi akhi, awö mböli wakhe andrö khönia.

Ba i'o'ö niŵa'ö Yosefo.

3 Ba ha moluo sibai, ba lafofanö ira, awö galidera.

4 Ba ha si'aikö larugi ngai mbanua, ba imane Yosefo khö zatua zangai halöŵö khönia: Labu, gohi niha andrö, ba na ökhamö ira, ba ömane khöra: Hana wa misulöni si lö sökhi zi sökhi? Hana wa no mitagö mako firö andrö khögu? 5 Tenga ya'ia ni'amadugö zokhö ya'o, ba tenga ya'ia ba zi faeta ia? andrö wa si lö sökhi nilaumi!

6 Ba me no ikhamö ira, ba imanö khöra.

7 Ba lamane khönia: He Tua, hana wa ömanö wehede? Lö'ö manö möi ba dödö zawuyumö wolau si manö. 8 Hadia, tenga no mafuli ma'ohe khöu gana'a andrö, me ma'otarai danö Gana'ana, ana'a andrö nisöndra ba zuzu nösi zi'e khöma: ba he moroi, wa matagö mena'ö wirö, ba ma ana'a, yomo khö zokhö ya'ugö? 9 Nisöndra ya'ia, ba zawuyumö andre, ba ya mate, ba ya'aga tanö bö'ö, ba si möi sawuyumö.

10 Ba imane: Lau, ya'ia da'ö niwa'ömi. Nisöndra ya'ia, ba sawuyugu dania, ba saefa ami.

11 Ba dozi la'aliogö latou'ö tou nganu'i khöra, ba dozi latoto'ö mböbö.

12 Ba ibörötaigö i'alui, i'otarai ba zi a'a ba ba zi akhi ibato, ba ba zi'e khö Mbeniyami tesöndra mako.

13 Ba lasika nukhara, dozi lafuli lafonoro galidera ba lafuli ira miyomo. 14 Ba me irugi yomo ba nomo Yosefo Yuda, awö dalifusönia — no so na ba da'ö Yosefo — ba lafalögu tou ira ba zalo, fönania.

15 Ba imane khöra Yosefo: Hadia nilaumi andrö? Hadia, lö'ö sa itörö tödömi, i'ohe ba waetasa niha si mane ya'odo andre?

16 Ba imane Yuda: Hadia niŵa'öma khö zokhö ya'aga? Hadia huhuoma ba he mawisa wamu'a ba huluma, me no isöndra horö zawuyumö Lowalangi! Sawuyumö sa'ae ndra'aga, ya'aga andre, fabaya nisöndra mako andrö.

17 Ba imane Yosefo: ya aröu khögu wolau si manö: nisöndra mako andrö, da'ö zawuyugu; ba ya'ami andrö, ba hana na mifuli ami khö namami, lö mutenaŵa.

II. Huhuo Yuda: i'andrö aefa Mbeniyami

18 Ba ihatö'ö ia khönia Yuda, imane: He Tua! Hadia na lö ata'u zawuyumö muhede khöu, hadia, lö mofönu'ö khö zawuyumö ba da'ö? me no fagölö-gölö ami Wara'o! 19 No isofu khö zawuyunia sokhö ya'o, imane: Hadia, so na namami, so dalifusömi na? 20 Ba no mamane khöu: Lö si mate namama satua andrö ba so na nononia si akhi si tumbu moroi furi; si ndruhu ga'ania, ba no mate, ba tobali ha ya'ia zi tosai ono ninania, ba no omasiö namania. 21 Ba no öŵa'ö ba zawuyumö andre: Mi'ohe ia ba da'e khögu, ena'ö i'ila ia hörögu. 22 Ba no mamane khöu: Tebai iröi namania ono matua andrö; na iröi ena'ö namania, ba lö auri da'ö. 23 Ba ömane ba zawuyumö: Na lö mi'ohe nakhimi andrö, ba tebai ifuli fa'ila bawa ita. 24 Ba me no mangawuli ndra'aga khö zawuyumö amagu, ba ma'ombakha'ö khönia niŵa'öu. 25 Ba me iŵa'ö dania khöma amama: Mifuli mi'ae'e, ba wowöli fakhe khöda ma'ifu, 26 ba mamane khönia: Tebai möiga! Na fao khöma nakhima, awena möiga; tebai sa fa'ila bawa ndra'aga ba niha andrö, na lö fao khöma nakhima. 27 Ba imane khöma sawuyumö amagu: Mi'ila ya'ö, wa ha dombua nono wo'omogu khögu. 28 Si sambua, ba no iröi ndra'o, ba no umane dödögu: Si ndruhu, no tesasawi ia [ba gutu ndru'u]! ba irege ma'ökhö, ba lö ni'ila hörögu ya'ia mangawuli. 29 Ba na mihalö na da'e göi khögu, ba na göna ia hadia ia ena'ö, ba horömi, na u'ohe huwagu andre, we'amöi mitou, ba mbanua niha tou abu sibai dödö. 30 Ba si ndruhu, na mangawulido ena'ö dania khö zawuyumö amagu, ba lö fao khöma nono andrö, ba zi no molemba dödönia ma'asambua, 31 ba ha si'aikö ena'ö irongo, lö'ö sa'ae fao khöma nono andrö, ba lö auri ia, ba horö zawuyumö andre ena'ö, na i'ohe huwania andrö sawuyumö amama, wanaŵa banua niha tou abu dödö. 32 Noa sa möi ba wali zawuyumö andre, khö namagu, ba khö nono andre, no ifabu'u: Na lö ufuli ia khöu, ba ya'odo zolu'i horö andrö khö namagu, sagötö ya'o. 33 Ba ena'ö na tola toröi furi zawuyumö andre sawuyu zokhö ya'o salahi nono matua andrö, ba ena'ö na tola fao khö ndra ga'ania nono, wangawuli! 34 He uwisa sa'ae wangawuli khö namagu, na lö fao khögu nono andrö! Tebai ufaigi-faigi ena'ö wa'abu dödö andrö, si falukha namagu!

Famotokhi ba gahe

Fabaliŵa lala

Olayama Moze I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö