Wb/nia/Moze I/17
I. Ifuli ifabu'u linia khö Gaberamo Lowalangi. Ifalalini döi Gaberamo[edit | edit source]
1 Ba me no 99 fakhe Gaberamo, ba i'oroma'ö ia Yehowa khö Gaberamo, imane khönia: Lowalangi si lö ambö fa'abölö ndra'o, fönagu törö lalau ba ya'atulö ndra'ugö,[1] 2 ba fawu'u li ita, ba oya sibai dania ma'uwumö ube'e.
3 Ba ifalögu tou ia Aberamo, ba humede khönia Lowalangi, imane: 4 Ya'odo zi no fawu'u li khöu, wa furugö ŵalo soi ndra'ugö dania. 5 Ba böi sa'ae Aberamo döimö, Aberahamo döiu sa'ae. Furugö ŵalo soi sa ube'e ndra'ugö. [2] 6 Ba ato sibai dania ma'uwumö ube'e, tobali mosoi dania ira, razo na'i dania ösa ma'uwumö.[3] 7 Ba fawu'u li ndra'o khöu ba ba ma'uwumö furiu, ba nga'ötöra andrö, fawu'usa li si lö tebulö, irugi zi lö aetu, fa Lowalangiu ndra'odo ba Lowalangi ma'uwumö furiu. 8 Ba khöu ba ba ma'uwumö furiu ube'e danö andre, ba zi so'ö si fatewu iada'e, tanö Gana'ana ma'asagörö, ube'e okhötami si lö tebulö, ba Lowalangira ndra'odo. 9 Ba imane Lowalangi khö Gaberahamo: Ba ya'ugö, böi böhöli wawu'usa li andrö khögu, ya'ugö andre ba ma'uwumö furiu, ba nga'ötöra andrö.
II. Tandra wawu'usa li wamoto andrö[edit | edit source]
10 Da'ö wawu'usa li si lö tola miböhöli, fawu'usa li khögu khömi ba ba ma'uwumö furiu: fefu motöi matua ba khömi, ba niboto. 11 uli khömi niboto ba ya da'ö dandra wawu'usa li khöda.[4] 12 Na no fitu bongi wa'ebua, ba niboto fefu motöi matua ba khömi, ha uga nga'ötömi, he si tumbu yomo ba he nihöli ba niha bö'ö, si tenga ya'ami.[5] 13 Niboto zi tumbu baomou ba he nihöliu ana'a, ena'ö tobali oroma ba nösimi wawu'usa li andrö khögu, fawu'usa li sirugi si lö aetu. 14 Ba niha si lö muboto, si lö muboto uli — ba nihori ba niwania zi manö, no adudu wawu'usa li andrö khögu, ibe'e.
III. Tefalalini göi döi Zara'i ba tefabu'u Giza'aki[edit | edit source]
15 Ba imane na Lowalangi khö Gaberahamo: Böi sa'ae be'e töi wo'omou Sara'i andrö Zara'i; Sara sa'ae döinia. 16 Ba ufahowu'ö ia ba ube'e bualagu khöu nono matua, khönia, ufahowu'ö ia ba ya awe soi ia dania; samatörö soi niha dania ma'uwunia ösa.
17 Ba ifalögu tou ia Aberahamo ba ma'iki, imane sa dödönia: Hadia, mo'ono maö zi zi no 100 fakhe fa'atua, ba mo'ono Zara, si no 90 fakhe?
18 Ba imane Aberahamo khö Lowalangi: Ena'ö na auri manö Zima'eli andrö fönau!
19 Ba imane Lowalangi: Böi! Fo'omou Sara andrö zo'ono khöu ono matua, ba öbe'e töi nono andrö Giza'aki, ba fawu'u li ndra'odo khönia, fawu'usa li sirugi si lö aetu, khö ma'uwuna furinia.[6] 20 Ba he ba khö Zima'eli andrö, ba ufondrondrongo göi wangandröu; ufahowu'ö ia ba ufonga'ötö ia, oya sibai ma'uwunia, ube'e. Felendrua zalaŵa nga'ötönia dania, ba soi sebua ma'uwunia ube'e. 21 Ba fawu'usa li andrö khögu, ba khö Giza'aki andrö utandrösaigö, si tumbu dania khöu, khö Zara, mane furi.
22 Ba me no awai huhuo Lowalangi khönia, ba numalö miyaŵa ia, iröi Gaberahamo.
IV. Famalua famoto[edit | edit source]
23 Ba ihalö nononia Sima'eli Aberahamo, awö dozi si no tumbu baomonia ba dozi nihölinia ana'a, fefu motöi matua ba zi so yomo khö Gaberahamo, ba iboto gulira, me luo da'ö, i'o'ö niŵa'ö Lowalangi khönia.
24 Ba no 99 fakhe Gaberahamo, me teboto gulinia. 25 Ba 13 fakhe Zima'eli, me teboto gulinia. 26 Ba me luo da'ö, ba teboto Gaberahamo ba ononia Sima'eli; ba si so yomo khönia fefu, 27 he si tumbu baomonia, ba he nihölinia ana'a ba niha bö'ö, ba teboto awönia.
Famotokhi ba gahe[edit | edit source]
Fabaliŵa lala[edit source]
Olayama Moze I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö