Wb/nia/Moze I/27
I. Ifahowu'ö Yakobo ba Ezau Iza'aki[edit | edit source]
1 Ba me no atua Giza'aki ba me no abösi hörönia, fa lö'ö sa'ae i'ila niha, ba humede ia khö nononia si a'a Ezau, imane khönia: He onogu!
Ba imane: Ya'e ndra'odo!
2 Ba imane [Iza'aki]: Atua sa'ae ndra'odo, ba lö u'ila, ha wa'ara matedo. 3 Ba halö wangönau ba wealu, naha nono wana, awö wana, ae ba mbenua ba halö khögu gahulua; 4 ba haogö ögu, somasido ba ohe khögu si bakha andre, ena'ö u'a, ba ufahowu'ö ndra'ugö, gasa-gasa wa'amategu.
5 Ba no ifondrongo-ndrongo Rebeka, me iŵa'ö da'ö Iza'aki khö nononia Ezau.
Ba me no möi ba mbenua Gezau fafana, ba wangai ahulua, 6 ba imane Rebeka khö nononia Yakobo: Faefa urongo, me humede namau khö ga'au Ezau, me imane khönia: 7 Halö khögu gahulua ba haögö ögu, ena'ö u'a, ba ufahowu'ö ndra'ugö, ba zanehe Yehowa, gasa-gasa wa'amategu. 8 Ba iya'e, ya'ugö onogu, ba o'ö niŵa'ögu, wamobawa lala khöu! 9 Ae ba nambi ba halö khögu ba da'ö zi matua nono nambi si sökhi, dua rozi, ena'ö uhaogö, ö namau, somasi ia. 10 Ba ö'ohe dania khö namau si bakha, ena'ö i'a, ba ifahowu'ö dania ndra'ugö, gasa-gasa wa'amatenia.
11 Ba imane Yakobo khö ninania Rebeka: Hiza, ba no mobu sibai ga'agu Ezau, ba ya'o, ba si lö bu.[1] 12 Ma dania ibayaisi ndra'o amagu, ba tobali sango'aya ya'ia ndra'odo, ba tohare khögu wangelifi ube'e, ba tenga howu-howu!
13 Ba imane khönia inania: Khögu yatohare wangelifi andrö, si göna ndra'ugö ena'ö, onogu; o'ö manö niŵa'ögu, ae halö khögu.
14 Ba möi ia muhalö, ba i'ohe khö ninania; ba ihaogö inanania, ö namania, somasi ia.
15 Ba ihalö nukha nononia si a'a Rebeka, nukha si sökhi khönia, si so khönia si bakha, ba ibe'e nukha nononia si akhi, Yakobo. 16 Ba uli nono nambi andrö, ba ibe'e ba dangania ba ba mbaginia, si no alösö-lösö. 17 Ba ibe'e ba danga nononia Yakobo gö no mege, fabaya roti nibogönia.
18 Ba möi ia si bakha khö namania, imane: He ama! Imane: Ya'e ndra'odo!
Ha niha ndra'ugö onogu?
19 Ba imane Yakobo khö namania: Ezau ndra'odo, onou si a'a; no'u'o'ö niŵaöu khögu. Ba dadao ba a gahulua andre khögu, ena'ö öfahowu'ö ndra'o dania!
20 Ba imane Iza'aki khö nononia: Ha lö alio ösöndra, onogu!
Imane: Ya'ia, Lowalangiu Yehowa zamatörö khögu.
21 Ba imane Iza'aki khö Yakobo: Hatö'ögö we, onogu, ena'ö u'ila ubabaya nösiu, na si ndruhu onogu Ezau ndra'ugö, ba na tenga!
22 Ba ihatö'ö ia khö namania Iza'aki Yakobo, ba me no ibayaisi, ba imane: Li andrö, ba no li Yakobo, ba ta'io, ba no ta'io Gezau.
23 Ba lö i'ila, wa ya'ia, me no mobu da'ionia, si mane ta'io ga'ania Ezau; ba ifahowu'ö ia.
Tenga sa faya, wa no labe'e töinia Yakobo; noa sa mendrua ilimodo: fa'asia'a andrö khögu, ba no ihalö, ba no itagö göi howu-howu andrö khögu!
24 Ba imane: Hadia, onogu Ezau ndra'ugö?
Imane: E, Ezau ndra'odo.
25 Ba imane: Ba ohe khögu, ena'ö u'a gahulua andrö, khö nonogu, ba ufahowu'ö dania ndra'ugö!
Ba i'ohe khönia, ba i'a; ba ibe'e khönia nagu ba ibadu.
26 Aefa da'ö, ba imane khönia amania Iza'aki: Ae ba da'e, ago mbawagu, onogu!
27 Ba me ihatö'ö ia, me fa'ago bawa ya khönia, ba i'ago hua nukhania; ba ifahowu'ö ia, imane: Sindruhu, hua nonogu andrö, ba no hulö hua mbenua, nifahowu'ö Yehowa! 28 Yamube'e khöu Lowalangi namo moroi ba mbanua si yaŵa, ba tanö satabö sinanö, ba yamuhöna khöu mbua nowi, awö nagu.[2] 29 Ndramöi sawuyumö soi niha ba yamangalulu khöu ngawalö mado. Samatörö talifusöu fefu dania ndra'ugö, ba ya mangalulu khöu ndraono ninau. Ha niha zangelifi ya'ugö, ba ni'elifi da'ö; ba samahowu'ö ya'ugö, ba nifahowu'ö?[3]
30 Ba me no i'o'ozui Iza'aki wamahowu'ö Yakobo ba me ha si'aikö iröi namania Iza'aki Yakobo, we'amöi baero, ba so ga'ania Ezau, moroi fafana.
31 Ba i'asiwai göi gö, i'ohe si bakha khö namania, ba imane khö namania: Faoso, ama, ba a gahulua andre khö nonou, ena'ö öfahowu'ö ndra'o dania.
32 Ba imane khönia amania Iza'aki: Ha niha ndra'ugö?
Imane: Onou si a'a, Ezau, ndra'odo!
33 Ba tokea sibai Giza'aki ba imane: Ba ha niha atö zi no ahulu, solohe khögu si bakha, tobali no ahori u'a, me lö ya'ugö na, ba no ufahawu'ö ia. Ba lö'ö sa tebulö nifahowu'ö ia!
34 Ba me irongo Ezau niŵa'ö namania andrö, ba mege-ege sibai ia, mu'ira-ira, ba imane khö namania: Fohowu'ö ndra'odo göi, ama![4]
35 Ba imane: Noa sa i'onekhesi akhiu, ba no itagö howu-howu andrö khöu.
36 Ba imane: Tenga sa faya, wa no labe'e töinia Yakobo; noa sa mendrua ilimodo: fa'asia'a andrö khögu, ba no ihalö, ba no itagö göi howu-howu andrö khögu!
Ba imane na: Ba hadia, lö nitenagöu howu-howu khögu?[5]
37 Ba itema li Iza'aki, imane khö Gezau: Noa sa atö ufataro samatörö ya'ugö ia, ba no ube'e barö mbawania, sawuyunia, dalifusönia fefu, ba no uhöna khönia mbua nowi, awö nagu; ba hadia atö nibe'egu khöu, onogu?
38 Ba imane Ezau khö namania: Ba hadia sa, ha da'ö howu-howu khöu, ya'ugö amagu? Fahowu'ö ndra'o göi, ama! ba mege-ege Gezau.
39 Ba itema linia amania Iza'aki, imane khönia: Hiza, si lö atabö sinanö danö, ba zi so'ö ba lö tana khönia namo mbanua moroi yaŵa. 40 Si'öli wangalui mbalazo khöu, ba sawuyu nakhiu ndra'ugö. Ba tobali, na ö'anösö'ö, ba ö'eŵegö galo mbagi andrö khönia, aheta ba mbagiu.
II. Edöna ibunu Yakobo Ezau ba itolo Yakobo inania Rebeka[edit | edit source]
41 Ba fatiu dödö Gezau khö Yakobo, ba howu-howu andrö nifa'ema namania khönia; imane dödönia Ezau: Na irugi baŵa wange'esi amagu dania, ba ubunu nakhigu Yakobo![6]
42 Ba me te'ombakha'ö khö Rebeka wehede nononia si a'a Ezau, ba ifakaoni'ö nononia si akhi, Yakobo, imane khönia: Hiza, edöna ilau mbalönia khöu ga'au Ezau, wamunu ya'ugö. 43 Ba o'ö niŵa'ögu khöu, onogu! Faoso, oloi, saŵa ga'agu Labano, ba Harana, 44 khönia iagö maiifu, irege alö wa'abao dödö ga'au — 45 irege döhö wönu ga'au andrö khöu ba irege olifu ia nilaumö khönia; awena dania ufatenge, ufahalö'ö ndra'ugö ba da'ö. Hana wa faoma taya ami khögu, ha ma'ö-ma'ökhö!
46 Ba imane Rebeka khö Giza'aki: Saföli fa'auri sa'ae ndra'o, börö Ndraono Kheti andrö. Na Yakobo göi dania zangai Iraono Kheti si manö, ono niha ba danö, ba hadia guna aurido na?
Famotokhi ba gahe[edit | edit source]
Fabaliŵa lala[edit source]
Olayama Moze I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö