Wb/nia/Moze I/28
I. Ifahowu'ö Yakobo Iza'aki ba ifatenge khö Labano[edit | edit source]
1 Ba humede Giza'aki khö Yakobo ba ifahowu'ö ia; ba ibe'e na li khönia, imane: Böi halö nono alawe Ndrawa Gana'ana.[1] 2 Faoso, ae ba Mezofotamia, ba nomo Mbetueli, ama ninau, ba da'ö halö khöu ndra alawe, ono zibayau Labano, sambua.[2] 3 Ba yamufahowu'ö ndra'ugö Lowalangi si lö ambö fa'abölö, ba yamufo'ono ndra'ugö yamu'oya'ögö, ena'ö ŵalo soi ndra'ugö! 4 Ba yamube'e khöu howu-howu andrö khö Gaberahamo, khöu ba ba ma'uwumö, awöu, ena'ö okhötau dania danö andre, ba zi so ndra'ugö si fatewu, nitehe Lowalangi khö Gaberahamo.[3]
5 Ba ifofanö Yakobo Iza'aki, ba isaŵa Mezofotamia, khö Labano, ono Mbetueli, Dawa Garamo, ga'a Rebeka, ina ndra Yakobo Ezau.
II. Ihalö nono Zima'eli Ezau[edit | edit source]
6 Ba me irongo Ezau, no ifahowu'ö Yakobo Iza'aki ba no ifatenge ba Mezofotamia, ena'ö ba da'ö ihalö khönia ndra alawe, wa no ifahowu'ö ia, awö wa no ibe'e li khönia, wanguma'ö: Böi halö nono alawe Ndrawa Gana'ana! 7 awö wa no ifondrondrongo Yakobo li ndra amania inania, we'amöi ba Mezofotamia, 8 ba aboto ba dödö Gezau, wa anuzu dödö namania ndra alawe Dawa Gana'ana.
9 Ba möi khö Zima'eli Gezau ba ihalö Mahalata, ono Zima'eli ono Gaberahamo andrö, talifusö Nebayoti, nönö-nönö ndrongania si tohöna.[4]
III. I'ila nora ba zorugo ba wangifi Yakobo ba itema gamabu'ula li Lowalangi[edit | edit source]
10 Ba mofanö Yakobo, iheta ia ba Mbereseba, isaŵa Harana: 11 Ba irugi zi mörö ia, noa sa'ae aekhu luo. Ba sambua ihalö kara, si so ba da'ö, ibe'e tandrayania, ba ifadölö ia tou mörö ba naha andrö.
12 Ba mangifi ia, ora nifasindro ba danö sirugi banua si yaŵa zuzu, ba mangörö-ngörö ba da'ö mala'ika Lowalangi.[5]
13 Ba so si yaŵa ba mbagi Yehowa, imane: Yehowa ndra'odo, Lowalangi duau Aberahamo, ba Lowalangi Giza'aki: tanö andre, si mörö ndra'ugö tou, ba khöu ube'e dania ba ba ma'uwumö.[6] 14 Ba ma'uwumö dania, ba si mane ngawua nene ba danö [wa'oya], ba mibologö dania ami tanö ba gaekhula ba tanö ba gatumbukha ba miyöu ba miraya, ba moroi khöu tefahowu'ö dania fefu soi ba guli danö, ba moroi ba ma'uwumö.
IV. I'andrö saoha gölö khö Lowalangi ba ifabu'u wolo'ö khönia[edit | edit source]
15 Ba fao-fao ndra'o khöu ba utimba khöu zi lö sökhi, fefu gofu heza möi'ö, ba u'ohe mangawuli ndra'ugö ba danö andre; lö'ö sa faröi ndra'o khöu, irege no ufalua nifabu'ugu khöu.[7]
16 Ba tokea Yakobo, ba imane: Si ndruhu, so Yehowa ba naha andre, ba no lö u'ila! 17 Ba ata'u ia ba imane: Sihokha mbuda naha da'e; si ndruhu nahia Lowalangi da'e, bawandruhö zorugo!
18 Ba me moluo, ba ihalö gowe andrö Yakobo, tandrayania mege, ifasindro harefa, ba ifaduwa wanikha ba detenia. 19 Ba ibe'e töi naha andrö Mbetieli; Lusi döinia föna. 20 Ba ifabu'u linia Yakobo, imane: Na itolodo Lowalangi, na itimba khögu zi lö sökhi ba lala andre, nitörögu iada'e, na ibe'e gögu, ni'a, ba nukhagu, ni'onukha, 21 ba na [ibe'e] mangawuli ndra'o ba nomo namagu, lö hadia ia, ba ya Lowalangigu Yehowa. 22 Ba gowe andre, nitaru'ögu harefa, ba ya osali Lowalangi, ba hadia ia fefu, nibe'eu khögu, ba lö zi lö ufuli khöu zambua ni'ofulu.
Famotokhi ba gahe[edit | edit source]
Fabaliŵa lala[edit source]
Olayama Moze I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö