Wb/nia/Mareko/9
Famolakhöminia[edit | edit source]
I. 1 Ba imane khöra: Si ndruhu niŵa'ögu khömi, so ösa ba zi so ba da'e, si lö manandra fa'amate dania, irege no la'ila abölö mbanua Lowalangi andrö.[1]
2 Ba önö bongi aefa da'ö,[2] ba i'ohe awönia Yesu Wetero ba Yakobo ba Yohane, i'ohe misa ira ba hili salaŵa, ba zi ha ya'ira manö; ba tobali ia fönara; 3 ba nukhania, ba tobali humaga, afusi sibai, tebai si manö wa'afusi nukha ba zamabago ba guli danö.[3] 4 Ba oroma khöra Geliya ba Moze fahuhuo ira khö Yesu.
5 Ba humede Wetero, imane khö Yesu: He samahaö, ba da'e zi sökhi nahada; ba damafazökhi nose, tölu, sambua khöu, ba sambua khö Moze ba sambua khö Geliya.
6 Lö'ö sa i'ila watahögö niŵa'önia; noa sa a'oi so wa'atobali dödöra.
7 Ba so moroi sa lawuo si lumö'ö ya'ira. Ba so zihede moroi ba lawuo andrö, imane: Onogu omasiö da'ö, mifondrondrongo linia![4]
8 Ba me lafakhölö ira, ba i'ozumagö lö'ö sa'ae oroma khöra niha, ha Yesu manö nawöra.
9 Ba me latueli hili, ba iŵa'ö khöra, böi la'ombakha'ö, gofu ha khö, ni'ilara, ha dania, na no maoso Nono Niha moroi ba ngai zi mate. 10 Ba lö olifu ira niŵa'önia andrö, ba fahuhuo ira, hadia ia wemaoso andrö, moroi ba ngai zi mate.
11 Ba lasofu khönia, lamane: Hadia wa laŵa'ö farizaio ba sangila amakhoita, lö tola lö möi Geliya ua?
12 Ba imane khöra: Ya'ia, so Geliya ua ba i'a'azökhi fefu hadia ia; ba he wisa ba zura ba khö Nono Niha andrö? Oya dania itaha famakao ba latibo'ö. 13 Ba uŵa'ö khömi, noa göi: möi Geliya, ba no lalau khönia hadia zomasi ira, no itörö zi so ba zura ba khönia andrö.[5]
Famadöhö fökhö zaniri[edit | edit source]
II. 14 Ba me larugi nifahaö,[6] ba ato niha samasui ya'ira, la'ila, awö zangila amakhoita, si fahuhuo khöra. 15 Ba i'anema'ö tobali dödö niha sato andrö fefu, me la'ila ia ba lahurufai ia, wangowai ya'ia.
16 Ba isofu khöra: Hadia huhuomi khöra?
17 Ba itema linia si samösa ba zato andrö, imane: He samahaö, no u'ohe khöu nonogu, si so bekhu si lö hede. 18 Ba na ira'u ia, ba idödöni ba fawukhö gilo ba ifatangi mboha ba ariri manö ia. Ba no uŵa'ö ba nifahaömö, ena'ö lafofanö, ba tebai.
19 Ba itema lira, imane: Alai ndra'o ami, niha si lö mamati! Ha wa'ara tö na sodo khömi? Ha wa'ara utaha ba khömi? Mi'ohe ia khögu.
20 Ba la'ohe khönia.
Ba me i'ila ia, ba i'anema'ö idödöni nösinia bekhu andrö, akandro, alau ia tou ba danö, ifagaölö ia ba fawukhö gilo.
21 Ba isofu khö namania Yesu: Ha wa'ara sa'ae göna-göna ia si manö?
22 Ba imane: I'otarai iraono ia. No asese itibo'ö ba galitö göi ba ba nidanö, ba wamunu ya'ia; ba na ö'ila hadia ia, ba hakhösi tödö ndra'aga, tologa.
23 Ba imane khönia Yesu: Ba niŵa'öu andrö: "Na ö'ila", — fefu hadia ia i'ila ilau samati.[7]
24 Ba i'anema'ö mu'ao nama nono andrö, imane: Mamati ndra'o, tolodo ba wa ambö famati andrö![8]
25 Ba me i'ila Yesu lahurufai niha sato andrö, ba itenaŵa mbekhu si ra'iö andrö, imane khönia: Uŵa'ö khöu, bekhu si lö hede, safiso, heta'ögö khönia ba böi sa'ae fuli'ö khönia.
26 Ba iheta ia, mu'ao-ao ia ba idödöni sibai nösinia. Ba tobali hulö zi mate, ba ato zanguma'ö: No mate ia. 27 Ba ira'u danga Yesu, ifazizio, ba maoso ia.
28 Ba me möi ia yomo, ba lasofu khönia nifahaönia, ba zi ha ya'ira: Hana wa tebai ndra'aga, ba wamofanö ya'ia? 29 Ba imane khöra: Lö famofanö zi sambalö andrö, na tenga fangandrö.
I'ombakha'ö wamakaonia dania[edit | edit source]
III. 30 Ba laheta ira ba da'ö,[9] latörö Galilaia, ba lö omasi ia, i'ila ira niha bö'ö. 31 Ifahaö sa nifahaönia, imane khöra: Tetou'ö dania Nono Niha ba danga niha, ba labunu, ba na no labunu, ba tölu ngaluo, ba ifuli auri.[10] 32 Ba lö aboto ba dödöra niŵa'önia andrö, ba ata'u ira, wanofu khönia.[11]
Famarou ba walöfayaŵa[edit | edit source]
IV. 33 Ba larugi Gafanauma,[12] ba me no möi ia yomo, ba isofu khöra: Hadia mege huhuomi ba lala?
34 Ba lö hede-hedera; noa sa mege fahuhuo ira ba lala, ha niha zebuara maö.
35 Ba mudadao ia ba humede ia ba zi felendrua ba imane khöra: Na so zomasi föna ia, ba yamöi furi sibai, yamöi enoni nawönia fefu.[13] 36 Ba ifa'aso tanö fönara ndraono, sambua, italagui, ba imane khöra:[14] 37 Na so zama'amöi yomo khönia ono si mane da'e, sambua, na börö döigu, ba ya'o nifa'amöinia yomo. Ba na so zama'amöi yomo ya'o, ba tenga ya'o nifa'amöinia yomo, samatenge ya'o andrö nifa'amöinia.[15]
Famarou ba ba wamologötödö[edit | edit source]
V. 38 Imane khönia Yohane:[16] He samahaö, no ma'ila zamösa, sanötöi töimö, wamofanö bekhu, si lö molo'ö ya'ita, ba no matenaŵa ia, me lö i'o'ö ita.
39 Ba imane Yesu: Böi mitenaŵa ia; tebai sa ilau hadia ia dandra, niha, ba döigu, ba i'anema'ö zui i'o'aya ndra'o. 40 Ha niha sa zi lö fa'udu khöda, ba no awöda.[17]
Famarou ba wangositengagö ya'ira samösa ba ba walöfa'udu-udu[edit | edit source]
VI. 41 Ha niha sa zame'e nibadu khömi zamba mako idanö, ba döigu andrö, me khö Keriso ami, ba si ndruhu niŵa'ögu khömi, lö aekhu luonia.[18]
42 Ba na so zangalani side-ide andrö samati,[19] samösa, ba ebua mohare ia mena'ö, na labe'e ba mbaginia gara sebua ba na latibo'ö ia ba nasi.[20]
43 Ba na i'alani ndra'ugö tangau, ba tema eŵa ia; mohare ndra'ugö, na ha tambai dangau, ba ökhamö wa'auri, moroi dua dangau, ba möi'ö ba narako, ba galitö andrö, si lö mate-mate 44 ba zi lö mate-mate gukuö andrö khöra, awö galitö andrö.[21]
45 Ba na i'alani ndra'ugö aheu, ba tema eŵa ia, mohare ndra'ugö, na sakela-kela ndra'ugö, ba ökhamö wa'auri, moroi dua gaheu, ba tetibo'ö ba narako, 46 ba zi lö mate-mate gukuö andrö khöra, awö galitö andrö.
47 Ba na i'alani ndra'ugö höröu, ba tema koe ia, mohare ndra'ugö, na bakole ndra'ugö, ba ökhamö mbanua Lowalangi, moroi dombua höröu, ba tetibo'ö ba narako, 48 ba zi lö mate-mate gukuö andrö khöra, awö galitö andrö.
49 Ni'asioni alitö sa dania ira fefu. 50 Si sökhi nasio andrö; ba na taya wa'asi-asi nasio andrö, ba ha mibe'e fangasi-ngasinia? Böi zi lö asio khömi ba dödömi, ba böi fa'udu-udu ami.[22]
Famotokhi ba gahe[edit | edit source]
- ↑ Mat 16:28; Luk 9:27
- ↑ Ayati 2–11: Mat 17:1–13; Luk 9:28–36
- ↑ Fam 1:14,17
- ↑ FetII 1:16,17; Yoh 12:28
- ↑ Fam 11:13 b.t.
- ↑ Ayati 14–29: Mat 17:14–21; Luk 9:37–43
- ↑ KorI 12:10
- ↑ Luk 17:5,6
- ↑ Ayati 30–32: Mat 17:22,23; Luk 9:43–45
- ↑ Faigi 8:31; 10:32 b.t.
- ↑ Luk 18:34
- ↑ Ayati 33–37: Mat 18:1–5; Luk 9:46–48
- ↑ Faigi 10:43; Mat 20:26 b.t.
- ↑ Faigi 10:16
- ↑ Yoh 13:20
- ↑ Ayati 38–40: Luk 9:49,50
- ↑ Mat 12:30
- ↑ Mat 10:42
- ↑ Ayati 42–48; Mat 18:6–9
- ↑ Luk 17:1,2
- ↑ Yes 66:24
- ↑ Mat 5:13; Luk 14:34; Kol 4:6; Rom 12:18; Yob 12:14
Fabaliŵa lala[edit source]
Olayama Zura Mareko: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö