Wb/nia/Mareko/4

From Wikimedia Incubator
< Wb‎ | nia‎ | Mareko
Wb > nia > Mareko > 4

Samazaewe tanömö[edit | edit source]

I. 1 Ba ifuli ibörötaigö mamahaö,[1] ba zinga mbaŵa. Ba ato sibai zowulo khönia niha, tobali möi ia ba nowo, mudadao ia, ba nidanö yaŵa, ba ba mbewe nidanö so niha sato fefu, baene.

2 Ba ifahaö ira, oya ilau amaedola, ba imane khöra ba wamahaönia andrö:

3 Mifondrondrongo! Hiza, möi baero zamazaewe tanömö zinanö, ba wamazaewe tanömö andrö; 4 ba tobali, ba wamazaewe andrö, ba so ösa zi göna ba lala; ba so wofo, ba la'a. 5 Ba so ösa zi göna ba zokara, ba zi lö abölö tanö khönia, ba i'anema'ö motalinga, me lö awe'e-we'e danö khönia. 6 Ba me no tumbu luo, ba asoso ia ba aleu, börö wa lö ŵa'ania. 7 Ba so ösa zi göna ba gotalua ndroi, ba manöi ndroi ba ibunu, ba lö bua. 8 Ba so ösa zi göna ba danö si sökhi andrö, ba mowua, motalinga ba manöi, so zowua si önö, zamba yöu, so zi felendrua ba so zi dua wulu.

9 Ba imane: Si so tögi dalinga ba wamondrongo, ba yamufondrondrongo!

Niha samazaewe tanömö

10 Ba me no mofanö niha, ba lasofu khönia si fao khönia, awö zi felendrua, ba gamaedola andrö.

11 Ba imane khöra: Khömi no mube'e zi tobini andrö, he wisa mbanua Lowalangi, ba ba khöra si so baero andrö, ba oi ba gamaeldola larongo, ena'ö anehe höröra, 12 ba lö'ö zui la'ila, ba larongo tögi dalingara, ba lö'ö zui aboto ba dödöra, fa lö lafuli ira ba fa lö tebe'e aefa khöra horöra.[2]

13 Ba imane khöra: Lö mi'ila geluaha gamaedola andrö, ba he moroi aboto ba dödömi gamaedola soya?

14 Taroma li nifazaewe zamazaewe tanömö andrö. 15 Ba da'ö zi so ba lala andrö: tefazaewe daroma li, ba na larongo, ba i'anema'ö so Zatana andrö, ba iheta daroma li andrö, nifazaewe ba dödöra.

16 Ba si manö nifazaewe ba danö sokara andrö, da'ö ira: i'anema'ö lafonaha daroma li, na larongo, omuso dödöra, 17 ba lö wa'ania ba dödöra, niha samangörö li ira, dania, na so wamakao, ba ma folohi, ba daroma li andrö, ba i'anema'ö lafuli furi.

18 Ba bö'ö nifazaewe ba gotalua ndroi: da'ö ira, si no mamondrongo taroma li, 19 ba fatewu wa'abu dödö andrö ba gulidanö ba famaelungu andrö, ba gana'a, ba hadia ia gisö-isö bö'ö, ba ibunu daroma li andrö, ba tobali lö bua.[3]

20 Ba da'ö nifazaewe ba danö si sökhi andrö: samondrongo taroma li ba samonahia ya'ia ba sowua; so zi önö, zamba yöu, so zi felendrua ba so zi dua wulu.[4]

21 Ba imane khöra: Hadia, andrö so wandru, ena'ö tabe'e barö dumba yöu, ba ma barö warate? Tenga andrö so ia, ena'ö tabe'e ba naha wandru yaŵa?[5] 22 Lö'ö sa hadia ia zi tobini, na tenga ba wama'ele'ö ya'ia dania, ba lö hadia ia zi lö oroma, ha ba wangoroma'ö ya'ia dania.[6] 23 Na so zi so tögi dalinga ba wamondrongo, ba yamufondrondrongo!

24 Ba imane khöra: Mitöngöni nirongomi! Su'a-su'a ni'anu'a'ömi, la'anu'a'ö khömi, ba ladou'ö na khömi.[7] 25 Ba zi so, ba tebe'e na, ba ba zi lö'ö, ba teheta göi hadia zi so khönia.[8]

Famanöi zinanö[edit | edit source]

II. 26 Ba imane: Si mane mbanua Lowalangi andrö, hulö na itibo'ö ba danö danömö zinanö niha. 27 Ba mörö ia ba maoso, bongi ma'ökhö, ba motalinga danömö andrö ba manöi, lö'ö sa i'ila,[9] 28 mowua manö danö, ha ya'ia, öföna döla, awena ngalai, awena zi ndruhu nösi ba ngalai. 29 Ba na basitö, ba i'anema'ö ifatenge zamasi, me no irugi famasi.

Ira'alawe sananö famasua ba Provinsi Lao Cai, Vietnam

III. 30 Ba imane:[10] Hadia tabe'e famaedo mbanua Lowalangi andrö? Ba heza tahalö gamaedolania? 31 Hulö mbua lada,[11] si no fondrege zide-ide mbua zinanö, na tefazaewe ba danö. 32 Ba na no mufazaewe ia, ba manöi ba tobali ebua moroi ba ngawalö gule-gule fefu ba modaha sebua ia, tobali la'ila mangazuni ba lumönia fofo, si so ba dalu mbanua.

33 Ba oya ngawalö gamaedola si manö ilau khöra, wamahaö ya'ira; ifaigi zi tola lafondrondrongo. 34 Lö'ö sa huhuonia khöra, si tenga amaedola. Ba khö nifahaönia i'ombakha'ö geluaha fefu, ba zi ha ya'ira.

Famahono mbade[edit | edit source]

IV. 35 Ba me luo da'ö, me tanö owi, ba imane khöra:[12] Möi ita miyefo. 36 Ba me no lafofanö niha sato, ba la'ohe manö ia baowo; ba so zi fao khönia owo bö'ö.

37 Ba ilabu bade sabe'e ba ihawui nowo dulu, tobali abuso sa'ae idanö. 38 Ba no so ia ba gi'o, mörö, no manandraya ia. Ba lasusugi ia, lamane khönia: He samahaö! hadia, lö ba dödöu, na tekiko ita?

Köfa ba dalu mbade sebua

39 Ba maoso ia ba itenaŵa nangi ba imane ba ndrulu: Böi hede-hede sa'ae, honogö'ö!

Ba tebato nangi, ba tobali ahono sibai.[13]

40 Ba imane khöra: Hadia wa ada'u-da'u ami si manö? Hana wa lö famati khömi? 41 Ba ata'u sibai ira, ba faoma lamane khö nawöra: Ha niha da'ö, wa lafondrondrongo göi linia angi ba dulu?

Famotokhi ba gahe[edit | edit source]

  1. Ayati 1–25: Mat 13:1–23; Luk 8:4–18
  2. Yes 6:9.10
  3. Faigi 10:23
  4. Yoh 18:57
  5. Mat 5:15; Luk 11:33
  6. Mat 1:6
  7. Mat 7:2; Luk 6:38
  8. Mat 13:12
  9. Sin 127:2
  10. Ayati 30–34: Mat 13:31,32,34; Luk 13:18,19
  11. "Lada": sinanö andre tumbu ba danö Timur Tengah ba lö ba Danö Niha andrö wa ifo'eluaha manö ia Sundermann "lada". Ba li Indonesia latötöi ia sesawi hitam (töi ilmiahnia Brassica nigra). Fa'alaŵania tola irugi 1,2 m.
  12. Ayati 35–41: Mat 8:18,23–27; Luk 8:22–25
  13. Faigi 6:51

Fabaliŵa lala[edit source]

Olayama Zura Mareko: 12345678910111213141516

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö