Wb/nia/Mareko/5
Famofanö bekhu[edit | edit source]
I. 1 Ba larugi zi tambai mbaŵa,[1] danö Gerasa. 2 Ba ha ihundragö danö, moroi ba nowo, ba i'anema'ö i'ondrasi ia niha, soroi lewatö, si so bekhu si ra'iö. 3 Ba lewatö soso ia, ba lö sangila mamöbö ya'ia, he rate wamöbö. 4 Noa sa asese teböbö ia böbö gahe ba rate danga, ba i'etu'ö rate danga ba irekha mböbö gahe andrö, ba lö sangila molaŵa ya'ia. 5 Ba ba lewatö soso ia ba ba hili, lö mamalö-malö, bongi ma'ökhö, mu'ao-ao ia ba i'olobigö khönia gara.
6 Ba me i'ila Yesu, moroi ba zaröu, ba fagohi ia, ituhi danö fönania, 7 mu'ao ia, ebua sibai li, imane: Hadia niŵa'öu khögu, Yesu, Ono Lowalangi Fondrege Zalaŵa? Ube'e ba hölu ndra'ugö, khö Lowalangi, fa böi öfakao ndra'o![2]
8 Imane sa khönia: Beta'ögö bekhu si ra'iö, röi niha andrö! 9 Ba isofu khönia: Hadia döiu? Ba imane khönia: Liwu döigu; me no ato sibai ndra'aga. 10 Ba iforege wangandrö khönia, ena'ö lö ifofanö ira, lö iheta ira ba danö andrö.
11 Ba so ba da'ö ba gahe hili mbawi, sambawa, nikubaloi, oya sibai. 12 Ba la'andrö khönia, lamane: Fatenge ndra'aga ba mbawi andrö, ena'ö mabe'e nahiama ira.[3]
13 Ba itehe khöra. Ba laheta ira bekhu si ra'iö andrö, lasaŵa mbawi andrö. Ba latibo'ö ira ba mbaŵa bawi si sambawa andrö, moroi ba zanaere, mato dua ngahönö, ba alömö ba da'ö.
14 Ba moloi gubalora, la'ombakha'ö yaomo ba mbanua ba ba halama misa; ba möi ira mufaigi, he wisa.
15 Ba larugi Yesu ba la'ila zi so bekhu andrö, no dumadao, no monukha, no taya wa'owöhö, si so liwu andrö no mege, ba ata'u ira. 16 Ba sangila mege, ba la'ombakha'ö khöra, he wisa mege ba zobekhu andrö, ba hadia ia ba mbawi andrö. 17 Ba labörötaigö la'andrö khönia, ena'ö iheta ia ba danöra.
18 Ba me möi ia baowo, ba i'andrö khönia sobekhu andrö mege, ena'ö fao ia khönia. 19 Ba lö i'ohe, imane sa khönia: Fuli'ö yomo khömi, ba ombakha'ö khöra, ha wa'ebua wanolo Zo'aya ya'ugö ba fa'ahakhö dödönia ndra'ugö.
20 Ba möi ia, ibörötaigö i'ombakha'ö ba zi fulu banua, ha wa'ebua wanolo Yesu ya'ia ba oi ahöli-höli dödöra.
Famadöhö fökhö sendro talu[edit | edit source]
II. 21 Ba me no irugi si yefo Yesu,[4] ba nowo, ba owulo khönia niha, ato sibai; ba no so ia ba mbewe mbaŵa.
22 Ba so zamösa, satua zekola, Ya'iro döi, ba me i'ila ia, ba ituhi danö fönania, 23 iforege wangandrö khönia, imane: Torege khö nonogu alawe, ena'ö möi'ö ba ötufa ia tangau, ena'ö abe'e ba ena'ö auri.
24 Ba möi ia, fao ia khönia. Ba la'o'ö niha, ato sibai; fadege ira khönia.
25 Ba so ndra alawe, sendro talu,[5] no mewelendrua fakhe wa'ara, 26 no erege sibai dödönia ba zodalu-daluni, no ato, ba no ahori ibe'e gana'ania, ba lö si to'ila, no itugu abölö-bölö na i. 27 Ba me irongo da'ö khö Yesu, ba möi ia, ba hunö niha, moroi furi, ibabaya mbarunia. 28 Imane: He ha barunia ubabaya, ba aurido.[6] 29 Ba i'anema'ö otufo ndro andrö khönia, ba to'ila ba nösinia, wa no döhö wamakao andrö khönia.
30 Ba i'anema'ö i'ila Yesu, ba khönia, wa no aheta khönia wangabölö andrö, ba ibali'ö ia ba hunö niha, imane : Ha niha zombambaya barugu.[7]
31 Ba lamane khönia nifahaönia: Ö'ila wa fadege khöu niha, ba ömane: Ha niha zombambaya ya'o? 32 Ba ifakhölö ia, wamaigi solau da'ö.
33 Ba ata'u ndra alawe no mege, manizi-nizi, me no i'ila, hewisa khönia, ba möi ia, ituhi danö fönania, i'ombakha'ö he wisa zi ndruhunia fefu.
34 Ba imane khönia: He onogu, no i'orifi ndra'ugö famatimö andrö; fuli'ö, ya'ohahau dödöu ba yadöhö wamakao andrö khöu![8]
Fanusugi ono Ya'iro[edit | edit source]
III. 35 Ba me muhede ia na, ba so, zinenge zatua zekola no mege, lamane: No mate nonou; hadia wa öfakao na zamahaö andrö?
36 Ba i'osilömurongogö Yesu niwa'öra andrö, imane khö zatua zekola andrö: Böi ata'ufi, amati manö. 37 Ba lö itehe fao khönia niha, ha Fetero ba Yakobo ba Yohane, talifusö Yakobo.
38 Ba larugi yomo ba nomo zatua zekola andrö, ba i'ila wagua-guasa andrö, awö ze'e, awö zange'esi, wa'abölö-bölö. 39 Ba möi ia yomo, imane khöra: Hadia wa fagua-gua ami ba hadia wa mege-ege? Tenga si mate nono andrö, si mörö.[9]
40 Ba la'igi-igi'ö ia.
Ba ifofanö ira tou, fefu, ba i'ohe nama nono no mege ba inania ba awönia andrö, möi ia si bakha, ba zi so ono andrö.
41 Ba ira'u danga nono, imane khönia: Talita kumi! Faoso ono alawe, uŵa'ö khöu! geluahania.[10]
42 Ba i'anema'ö maoso nono alawe andrö ba mowaö-waö; so sa mewelendrua fakhe wa'ebuania. Ba i'anema'ö tobali sibai dödöra.
43 Ba i'abe'e'ö linia wanguma'ö khöra, ena'ö lö irongo da'ö niha, ha niha ia; ba iŵa'ö, ena'ö labe'e gö nono andrö.[11]
Famotokhi ba gahe[edit | edit source]
- ↑ Ayati 1–20: Mat 8:28–34; Luk 8:26–39
- ↑ Faigi 1:24
- ↑ Luk 8:31
- ↑ Ayati 21–43: Mat 9:1,18–26; Luk 8:40–56
- ↑ Sendro talu no sambua wökhö si göna ndra'alawe na aduwa ndro moroi ba wa'alawe tenga ha ba ginötö alua mbaŵa khöra (li Indonesia menstruasi). Oya mbörö aduwa ndro andre, ba gotaluania fökhö nifotöi fibroids ma ba li Indonesia tumor rahim. So fibroids sabölö sikho nifotöi kanker rahim, bahiza fökhö nifadöhö Yesu andre te tumor rahim börö me no ara sibai lö ebua zikhonia (felendrua fakhe). Moguna tetöngöni niŵa'ö Yesu ba ayati 34, wa samadöhö fökhö ndra'alawe andrö famati ndra'alawe andrö samösa.
- ↑ Faigi 6:56
- ↑ Luk 6:19
- ↑ Faigi 10:52
- ↑ Yoh 11:11
- ↑ Luk 7:14
- ↑ Faigi 1:44; 7:36
Fabaliŵa lala[edit source]
Olayama Zura Mareko: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö