Wb/nia/Mareko/14

From Wikimedia Incubator
< Wb‎ | nia‎ | Mareko
Wb > nia > Mareko > 14

Famagölö ba wamunu ya'ia[edit | edit source]

I. 1 Ba hatö dua wongi, ba fasa andrö ba baŵa roti si lö mu'aisöni.[1] Ba la'alui ere sebua ba sangila amakhoita he lawisa wangonekhesi fondra'u ya'ia, ba famunu ya'ia. 2 Lamane sa: Böi ba gowasa, fa böi aekhu niha.

Fombayoini ya'ia[edit | edit source]

II. 3 Ba me so ia ba Mbetania,[2] ba nomo Zimoni andrö, sobou auri, me manga ia, ba so ndra alawe, so khönia zamba buli-buli kara zi ndruhu wanikha naridu, sebua böli, ba iboto mbuli-buli, ba ifaduwa ba högö Yesu wanikha andrö.

4 Ba so ösa zikökö-kökö tödöra, lamane: Hadia wa la'alimagösi wanikha andrö. 5 Tola sa la'amawa mena'ö wanikha andrö, töra otu a lima wulu rufia, ba tola tebe'e ba zinumana. Ba kumökö-kökö ira khönia.

6 Ba imane Yesu: Böi mitegu ia; hadia wa mibusi dödönia? Si sökhi nilaunia khögu. 7 Lö tebulö awömi zi numana, ba tola mitolo ira, na edöna ami, ba ya'o, ba tenga si lö tebulö khömi. 8 No ilau ndrege zi tola ilau; no ihönagö ibayoini mbotogu, ba wogo'o ya'o. 9 Ba sindruhu niŵa'ögu khömi, heza misa teturiagö duria somuso dödö andrö, ba guli danö ma'asagörö, ba da'ö göi te'ombakha'ö nilau da'e, ba wanörö tödö ya'ia.

10 Ba möi khö gere sebua Yuda andrö, banua Kariota, awö zi felendrua, ba wemanga mbölinia khöra.[3] 11 Ba omuso dödöra, me larongo, ba lafabu'u khönia labe'e gana'a. Ba i'alui he wisa zenahöi, wangombakha ya'ia.

Fangombakha zimanga mbölinia[edit | edit source]

III. 12 Ba me baŵa roti si lö mu'aisöni,[4] si föföna, ba nitaba fasa andrö, ha lamane khönia nifahaönia: Heza zomasi'ö, heza möiga mangasiwai, ena'ö ö'a wasa andrö?

13 Ba ifatenge nifahaönia, darua, imane khöra: Mi'ae miyomo ba mbanua, ba falukha ami niha, solohe migö nidanö, mi'o'ö ia. 14 Ba ba zi möi ia yomo ba nomo, ba da'ö mimane khö zokhö omo: Da'ö niŵa'ö zamahaö khöu: Hezo nahagu andrö, heza u'a wasa andrö, awö nifahaögu? 15 Ba i'oroma'ö khömi dania mbate'e sebua, ba si sagötö, si no labe'e tufo, si no muhaogö; ba da'ö mi'asiwai khöda.

16 Ba möi nifahaö andrö, larugi yomo ba mhanua, ba itörö niŵa'önia khöra. Ba la'asiwai wasa no mege.

17 Ba me tänö owi, ba so ia, awö zi felendrua.[5]

18 Ba me no mudadao ira, me manga, ba imane Yesu: Si ndruhu niŵa'ögu khömi, samösa ba khömi sorudu manga khögu zi manga mböligu dania.

19 Ba ibörötaigö abu dödöra, ba oi zara lamane khönia: Hadia ya'odo?

20 Ba imane khöra: Samösa ba zi felendrua, si falulu manga khögu. 21 Itörö sa lalania Ono Niha, itörö zi so ba zura ba khönia, ba alai niha andrö, si manga mböli Nono Niha; sökhi ba niha andrö, lö tumbu ia mege.

Fangoroi'ö wemanga ni'amoni'ö[edit | edit source]

IV. 22 Ba me manga ira,[6] ba ihalö roti, ifahowu'ö ba iboboto, ibe'e khöra, imane: Mitema, mi'a, botogu da'e. 23 Ba ihalö mako, i'aohasi gölö Lowalangi, ibe'e khöra, ba labadu, dozi ira. 24 Ba imane khöra: Dogu da'e, do gamabu'ula li, saduwa salahi zato. 25 Si ndruhu niŵa'ögu khömi, lö'ö manö sa'ae ubadu nösi mbua nagu andrö, irugi luo wamadugu si bohounia, ba mbanua Lowalangi andrö.

26 Ba me no aefa manunö ira, ba möi ira baero, ba gahe hili wanikha andrö.[7]

27 Ba imane khöra Yesu: Dozi dania ami te'ala, si mane sa ba zura: "Ubago dania gubalo andrö, ba sumawili mbiri-biri andrö nikubaloi." 28 Ba na aefa maoso ndra'o, ba mowaö-waödo ba Galilaia, fönami.[8]

29 Ba imane khönia Fetero: He dozi te'ala ira, ba ya'o, ba lö te'ala.

30 Ba imane khönia Yesu: Si ndruhu niŵa'ögu khöu, iada'e bongi andre, lö fakhamö mendrua miwo zilatao, ba no medölu ö'osilö'ögö ndra'o.

31 Ba ihötöi fanguma'ö: Ba he matedo awöu, ba tebai u'osilö'ögö ndra'ugö. Ba si manö wanguma'ö ndra nifahaö fefu.

Fangandrö ba Gezemane[edit | edit source]

V. 32 Ba larugi halama, Gezemane döinia, ba imane ba nifahaönia:[9] Midadao ba da'e, irege no mangandrö ndra'o.

33 Ba i'ohe awönia ndra Fetero, Yakobo, Yohane, ibörötaigö manizi-nizi ba abu dödö.

34 Ba imane khöra: Abu sibai dödögu, irugi wa'amate; mi'iagö da'e ba böi miförö.[10]

35 Ba mofanö ia, lö aröu, ifalögu tou ia ba danö ba mangandrö, ena'ö italu'i ia inötö andrö, na böla.[11] 36 Imane: He Aba, Ama, lö hadia ia zi tebai ndra'ugö; heta khögu mako andrö; ba böi somasi ndra'o, somasi ndra'ugö sa.

37 Ba ifuli ia, ba no mörö ira, me irugi,

ba imane khö Wetero: He Simoni, si mörö ndra'ugö? Tebai si lö mörö ndra'ugö mato saza? 38 Böi miförö ba mi'angandrö, fa böi itörö ami fanandraigö. Aoha sa gölö dödö, ba si no ambö fa'ahölö nösi.

39 Ba ifuli möi mangandrö, si mane mege no linia. 40 Ba me ifuli ia, ba no mörö zui ira, me irugi, me no abua guli höröra, ba lö la'ila hadia niŵa'öra, wanema linia.

41 Ba so zui ia, me no medölu, ba imane khöra: Miförö sa'ae ba mi'olombase! No abönö. No inötö, hiza, tetou'ö ba danga niha si so horö Nono Niha. 42 Mifaoso! talabu; hiza, no ahatö zi manga mböligu andrö.

Lara'u ia[edit | edit source]

VI. 43 Ba i'anema'ö, me muhede ia na,[12] ba so Yuda, banua Kariota andrö, awö zi felendrua, ba ato zi fao khönia soföda ba sobago gama, nifatenge gere sebua ba sangila amakhoita ba satua mbanua andrö. 44 Ba no iŵa'ö khöra dandra si manga mböli andrö, no imane: Si fa'ago bawa ndra'o, da'ö ia, da'ö mira'u ba mi'ohe, mi'aro'ö.

45 Ba me so ia, ba i'anema'ö i'ondrasi Yesu, imane khönia: He samahaö! ba fa'ago bawa ia khönia.

46 Ba lababaya, lara'u.

47 Ba isöbi wöda si samösa, awö zi so ba ngai andrö, itema igukhui zawuyu gere sebua, i'eŵa dalinga.

48 Ba humede Yesu, imane khöra: Hulö na ba zorabu möi ami, moföda ami ba mobago gama, wondra'u ya'o. 49 Ero ma'ökhö so ndra'o khömi ba gosali, mamahaö ndra'o, ba lö nira'umi ya'o; ba ena'ö itörö zi so ba zura.

50 Ba laröi ia [awönia], oi zara moloi. 51 Ba so nono matua samösa, solo'ö ya'ia, ha sambua mbaru, baru muko si sökhi; ba lara'u ia. 52 Ba iröi furi mbaru muko andrö ba moloi lö baru.

La'etu'ö hukunia[edit | edit source]

VII. 53 Ba la'ohe khö gere sebua Yesu;[13] ba falukha gere sebua fefu ba satua mbanua ba sangila amakhoita andrö.

54 Ba i'o'ö Fetero, aröu moroi furi, irugi baolayama gere sebua, ba mudadao ia, awö genoni andrö, moleu ia, ba zinga galitö.

55 Ba la'alui wamöbögö horö khö Yesu ere sebua, awö zalaŵa rafe sebua fefu, ba wamunu ya'ia, ba lö lasöndra. 56 Ato sa zamöbögö horö khönia, ba lö faoma wanguma'öra.[14] 57 Ba so ösa zamöbögö khönia, lamane: 58 No marongo me iŵa'ö: Ududugö dania gosali andre, nifazökhi danga niha, ba ha tölu ngaluo u'angotomosi'ö danö bö'ö, si tenga nifazökhi danga niha.[15] 59 Ba ba da'ö göi lö faoma wanguma'öra.

60 Ba maoso gere sebua, i'agö gotaluara, isofu khö Yesu, imane: Hadia, ma'ifu lö ötema li ba niböbögö da'ö khöu?

61 Ba lö hede-hedenia, ma'ifu lö itema li.

Ba manofu zui khönia gere sebua, imane khönia: Hadia, Keriso andrö ndra'ugö, ono Wondrege nisuno andrö?[16]

62 Ba imane Yesu: Ya'ia, ba mi'ila dania dumadao Nono Niha ba gambölö wa'abölö andrö, ba so ia, ba lawuo ba mbanua si yaŵa.[17]

63 Ba isika nukhania ere sebua, ba imane: Hadia sa'ae guna zi so ba mbörö? 64 No mirongo wangaoha-ngaoha andrö. He wisa ba dödömi? Ba oi zara la'etu'ö hukunia, huku famunu.

65 Ba labörötaigö ösa ladidiloi ia, labalugö mbawania ba lagukhui ia ba lamane khönia: Ama'ele'ö; ba latema lafalisi ia si'o enoni andrö.[18]

Fangosilö'ögö Wetero[edit | edit source]

VIII. 66 Ba me so tou Wetero baolayama,[19] ba so zawuyu gere sebua, ono alawe, samösa, 67 ba me i'ila Wetero, me moleu, ba inehegö, ba imane: Ya'ugö göi nawö mbanua Nazareta andrö, Yesu andrö.

68 Ba i'osilö'ögö, imane: Lö u'ila, hadia niŵa'öu, lö aboto ba dödögu. Ba möi ia baero, baolayama föna, ba miwo zilatao.

69 Ba i'ila ia sawuyu ono alawe no mege, ba ifuli ibörötaigö, imane ba zi so ba da'ö: Samösa da'e, awöra.

70 Ba ifuli i'osilö'ögö.

Ba lö ara, ba lamane zui si so ba da'ö khö Wetero: Sindruhu, awöra ndra'ugö; banua Galilaia sa ndra'ugö.

71 Ba ibörötaigö i'elifi ia ba fahölu, imane: Lö u'ila ha niha da'ö, niŵa'ömi.

72 Ba i'anema'ö ifuli miwo zilatao, no mendrua. Ba itörö tödö Wetero li Yesu, me imane khönia: Lö fakhamö mendrua miwo zilatao, ba medölu ö'osilö'ögö ndra'o. Ba me itörö tödönia, ba mege-ege ia.

Famotokhi ba gahe[edit | edit source]

  1. Ayati 1–2: Mat 26:2–5; Luk 22:1,2
  2. Ayati 3–9: Mat 26:6–13; Yoh 12:1–8
  3. Ayati 10–11: Mat 26:14–16; Luk 22:3–6
  4. Ayati 12–16: Mat 26:17–19; Luk 22:7–18
  5. Ayati 17–21: Mat 26:20–25; Luk 22:21–33
  6. Ayati 22–25: Mat 26:26–29; Luk 22:14–20
  7. Ayati 26–31: Mat 26:30–35
  8. Faigi 16:7
  9. Ayati 32–42: Mat 26:36–46; Luk 22:29–46; Yoh 18:1
  10. Heb 5:7
  11. Yoh 12:27
  12. Ayati 43–50: Mat 26:47–56; Luk 22:47–53; Yoh 18:2,3; 10:11
  13. Ayati 53–65: Mat 26:57–68; Luk 22:54. 63–65
  14. MozV 17:6
  15. Faigi 15:29
  16. Yes 53:7
  17. Faigi 13:26
  18. Faigi 10:34; Mar 15:19
  19. Ayati 66–72: Mat 26:69–75; Luk 22:55–62; Yoh 18:16–18,25–27

Fabaliŵa lala[edit source]

Olayama Zura Mareko: 12345678910111213141516

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö