Wb/nia/Mareko/2
Famadöhö zi mate dambai[edit | edit source]
I. 1 Ba lö ara si'ai,[1] ba ifuli möi ia ba Gafanauma, ba terongo, wa no so ia yomo. 2 Ba ato zowulo khönia niha, tobali ambö nahara, he baolayama, ba ituriagö khöra daroma li.
3 Ba la'ohe khönia zi mate dambai; daöfa zangosa'ö. 4 Ba me lö lalara khönia, ba wa'ato niha, ba labokai zagö, ba zi so ia. Ba me no latöla'ö, ba ladada gaso andrö, naha zi mate dambai andrö.
5 Ba me i'ila wamatira Yesu, ba imane khö zi mate dambai andrö: No te'efa'ö khöu horöu, onogu.
6 Ba so zangila amakhoita ösa, sidadao ba da'ö, ba lamane dödöra: 7 Hadia, wa imanö da'ö? Mangaoha-ngaoha! Ha niha zangila mangefa'ö horö, baero zi ha samösa andrö, Lowalangi?[2]
8 Ba i'anema'ö i'ila Yesu tödönia, wa no si manö gera-era dödöra, ba imane khöra: Hadia wa si manö gera-era dödömi?[3] 9 He zaoha ira, fanguma'ö khö zi mate dambai andrö: No te'efa'ö khöu horöu? ba ma fanguma'ö: Faoso, fazaŵa gasomö ba ofanö? 10 Ba ena'ö mi'ila, tola i'efa'ö horö ba guli danö Ono Niha, ba imane khö zi mate dambai andrö: 11 Da'ö niŵa'ögu khöu: faoso, fazaŵa gasomö ba fuli'ö khömi!
12 Ba maoso ia, i'anema'ö ifazaŵa gasonia ba möi baero, oi anehe ira; tobali ahöli-höli dödöra fefu, lasuno Lowalangi, lamane: Lö irai ta'ila zi manö!
13 Ba ifuli möi ia baero ba zinga mbaŵa, ba la'ondrasi ia niha sato fefu, ba ifahaö ira.[4]
Ba maoso ia, i'anema'ö ifazaŵa gasonia ba möi baero, oi anehe ira; tobali ahöli-höli dödöra fefu, lasuno Lowalangi, lamane: Lö irai ta'ila zi manö!
Fogaoni Mataio andrö[edit | edit source]
II. 14 Ba me itörö, ba i'ila Lewi, ono Galifaio, si dadao ba naha wanema beo. Ba imane khönia: O'ö ndra'o. Ba maoso ia, i'o'ö.
15 Ba me manga ia ba nomo da'ö, ba ato zanema beo ba sebua horö, si manga awö Yesu ba awö nifahaönia; ato sa ira zolo'ö ya'ia.
16 Ba me la'ila sangila amakhoita, farizaio, manga ia awö zanema beo ba awö zebua horö, ba lamane ba nifahaönia: Hadia, awö zanema beo ba awö zebua horö manga ia?
17 Ba me irongo Yesu, ba imane khöra: Tenga ba zabölö moguna zame'e dalu-dalu, ba zofökhö moguna ia. Tenga ba wogaoni satulö möi ndra'o, no ba wogaoni si so horö möido.[5]
Ha wa lö mamoni ndra nifahaönia[edit | edit source]
III. 18 Ba no samoni ba gö nifahaö Yohane ba nifahaö warizaio,[6] ba möi ira khönia, lamane: Hana wa mamoni ba gö nifahaö Yohane, awö nifahaö warizaio, ba lö mamoni ba gö nifahaömö?
Lö sangai balö nukha si bohou tobali balo-balo nukha satua, börö isika dania nukha satua balö nukha si bohou andrö, irege itugu abölö wa'asikania.
19 Ba imane khöra Yesu: Hadia, la'ila mamoni ba gö si möi ba walöŵa, fatua awöra zangowalu? Tebai mamoni ba gö ira, fatua so zangowalu, awöra. 20 Ba irugi baŵa dania, ba aheta khöra zangowalu, ba awena mamoni ba gö ira, na baŵa da'ö.
21 Lö sombalo baru satua balo-balo si bohou, ba na imanö, ba atika mbaru satua andrö, ba zinga mbalo-balo, ba abölö-bölö zatikania. 22 Ba lö solau agu si bohou ba naha satua, ba na lalau, ba itika'ö naha andrö agu, ba tekiko nagu, fabaya naha.
Ladödöni lai wakhe ba luo sabato ira nifahaö[edit | edit source]
IV. 23 Ba me itörö nowi,[7] me luo sabato, ba labörötaigö nifahaönia ladödöni lai wakhe si fatimba ba lala.
24 Ba lamane khönia farizaio, Hiza, hana wa lalau ba luo sabato zi lö tola?
25 Ba imane khöra: Hadia, lö mirai mibaso nilau Dawido, me moguna khönia ba me olofo ia, ba awönia fao?[8] 26 Me möi ia ba nomo Lowalangi, me ere sebua Gabiataro, me i'a roti nifaigi-faigi andrö, si lö tola i'a niha bö'ö, baero gere, ba me ibe'e göi ba nawönia fao.[9]
27 Ba imane khöra: Börö niha, wa so zabato, ba tenga börö zabato, wa so niha.[10] 28 Tobali So'aya sabato göi Nono Niha.[11]
Famotokhi ba gahe[edit | edit source]
- ↑ Ayati 1–12: Mt 9:1–8; Luk 5:17–26
- ↑ Sin 32:5; 130:4; Yes 43:25; 44:22
- ↑ Yoh 2:25
- ↑ Ayati 13–17: Mat 9:9–13; Luk 5:27–32
- ↑ 1Kor 1:26 b.t.; Hes 33:11
- ↑ Ayati 18–22: Mat 9:13–17; Luk 5:33–39
- ↑ Ayati 23–28: Mat 12:1–8; Luk 6:1–5
- ↑ SamI 21:6.
- ↑ MozII 29:32.
- ↑ MozV 5:14.
- ↑ So'aya zabato Nono Niha eluahania mofa'abölö Yesu andrö (bakha ba Injil Ono Niha no töi Yesu) irege tola ifataro hadia zi tola ba hadia zi tebai mu'ohalöŵögöigö ba luo sabato.
Fabaliŵa lala[edit source]
Olayama Zura Mareko: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö