Wp/mag/गया

गयाजी
नगर
निर्देशाङ्क:
मण्डल	गया मण्डल
राज्य	बिहार
देस	भारत

बोधगयाके महाबोधि मन्दिर

गया भारतके बिहार राज्यके गया मण्डलमे स्थित एगो नगर हे । ई मण्डलके मुख्यालय आउ बिहार राज्यके दोसरा सबसे बड़का नगर हे । ई नगरके हिन्दु, बौद्ध आउ जैनधरममे गहरा ऐतिहासिक महत्व हे । नगरके उल्लेख रामायण आउ महाभारतमे मिलहे । गया तीन दन्नेसे छोट आउ पत्थरीला पहाड़से घिरल हे, जिनखर नाम मङ्गलागौरी, शृङ्गस्थान, रामसिला आउ ब्रह्मजोनि हे । नगरके पूरुदन्ने फल्गूनदी बहहे ।

बिवरण

बैदिक कीकटप्रदेशके धर्मारण्यक्षेत्रमे स्थापित नगरी हे गया । बनारस नियन गयाके प्रसिद्धि मुख्यरूपसे एगो धार्मिक नगरीके रूपमे हे । पितृपक्षके अवसर पर हियाँ हजारोसभ श्रद्धालु पिण्डदानला जुटहथिन । गया सड़क, रेल आउ वायुमार्ग द्वारा पूरा भारतसे जुड़ल हे । नवनिर्मित गया अन्तर्राष्ट्रिय बिमानस्थल द्वारा ई थाइलेण्डोसे सीधा जुड़ल हे । गयासे १३ किलोमीटरके दूरी पर बोधगया स्थित हे जे बौद्ध तीर्थस्थल हे आउ हियेँ बोधिवृक्ष तले भगवान् बुद्धके ज्ञान प्राप्ति होलैहल ।

गया बिहारके महत्वपूर्ण तीर्थस्थानमे से एक हे । ई नगर बिसेसकर हिन्दु तीर्थजातरी लागि बड्डी प्रसिद्ध हे । हियाँके विष्णुपद मन्दिर पर्यटकके बीच लोकप्रिय हे । पुराणके अनुसार भगवान् विष्णुके पाँवके निशानपर ई मन्दिरके निर्माण करावल गेलहे । हिन्दुधरममे ई मन्दिरके अहम स्थान प्राप्त हे । गया पितृदानो लागि प्रसिद्ध हे । कहल जाहे कि हिँया फल्गुनदी तटे पिण्डदान करेसे मृतव्यक्तिके बैकुण्ठके प्राप्ति होवहे ।

गया, मध्यबिहारके एगो महत्वपूर्ण नगर हे, जे फल्गुनदी तटे स्थित हे । ई बोधगयासे १३ किलोमीटर् उत्तर आउ राजधानी पटनासे १०० किलोमीटर् दक्खिनदन्ने स्थित हे । हिँयाके मौसम मिललजुलल हे । गरमी दिने हिँया बड्डी गरमी पड़हे आउ जाड़ा दिने औसत जाड़ा होवहे । मानसूनोके हिँयाके मौसमपर व्यापक असर होवहे । किन्तु बर्षाऋतुमे हिँयाके दृश्य बड्डी रोचक होवहे ।

कहल जाहे कि गयासुर नामक दैत्यके बध करित समय भगवान् विष्णुके पदचिन्ह हिँया पड़लहल जे आझो विष्णुपद मन्दिरमे देखल जा सकहे । मुक्तिधामके रूपमे प्रसिद्ध गया (तीर्थ) के खाली गया न कहके आदरपूर्वक 'गयाजी' कहल जाहे ।

इतिहास

गयाके उल्लेख महाकाव्य रामायणो मे मिलहे । गया मौर्यकालमे एगो महत्वपूर्ण नगर हल । खुदाईखनि सम्राट अशोकसे सम्बन्धित आदेशपत्र पाएल गेलीहे । मध्यकालमे बिहार मुगलसम्राटके अधीन हल । मुगलकालके पतन उपरान्त गयापर अङ्ग्रेज राज करकै । १७८७ मे होल्कर वन्शके ( बुन्देलखण्डके ) साम्राज्ञी महारानी अहिल्याबाई विष्णुपद मन्दिरके पुनर्निर्माण करवैलकैहल । मेगास्थनीज् के इण्डिका, फाह्यान् आउ ह्वेनसाङ्ग् के जतराबर्णनमे गयाके एगो समृद्ध धर्मक्षेत्रके रूपमे बर्णन हे ।

गम्यता

वायुमार्ग

बिहार आउ झारखण्डके एकमात्र अन्तर्राष्ट्रिय बिमानस्थल गया बिमानस्थल हे ।

रेलमार्ग

गया जङ्कशन बिहारके दोसरा बड़का रेलवे स्थानक हे । ई एगो बिशाल परिसरमे स्थित हे जेकरामे ९ प्लेटफार्म हे । गयासे पटना, राँची ,कलकता, धनबाद, पुरी, बनारस, चेन्नै, मुम्बई, नया दिल्ली, नागपुर, गुवाहाटी, जयपुर, अजमेरशरीफ्, हरिद्वार, ऋषिकेश, जम्मूतवी आदि लागि सीधा ट्रेन् हे ।

सड़कमार्ग

गयासे राजधानी पटना आउ राजगीर, राँची, धनबाद, बनारस आदि लागि बस जाहे । गयामे दुगो बस स्टेण्ड हे ।

शिक्षा

उच्चशिक्षाके उल्लेखनीय सन्स्थान

• अनुग्रह नारायण मगध मेडिकल कालेज आउ चिकित्सालय
• गया कालेज
• गया कालेज आफ इञ्जीनियरिङ्ग, गया
• दक्खिनबिहार केन्द्रीय बिश्वबिद्यालय
• बुद्ध इन्स्टिट्यूट आफ टेक्नोलॉजी
• मगध बिश्वबिद्यालय
• मिर्जा गालिब कालेज
• भारतीय प्रबन्धन संस्था बोधगया

उल्लेखनीय बिद्यालय

• क्रेन मेमोरियल उच्चबिद्यालय, कटारी हिल रोड, गया
• केन्द्रीय बिद्यालय नम्बर २, ओटीए, पहाड़पुर कैण्ट, गया
• ज्ञानभारती आवासीय परिसर, बोधगया
• डी॰ए॰वी॰ पब्लिक स्कूल, कैण्टक्षेत्र, गया
• डी॰ए॰वी॰ पब्लिक् स्कूल, मानपुर, कैया
• डी॰ए॰वी॰ पब्लिक स्कूल, सीआर आरसी, मेडिकल रोड, गया
• दिल्ली पब्लिक स्कूल, दुबहल, गया
• नाजरथ अकादमी, गया
• पीएम श्री केन्द्रीय बिद्यालय नम्बर १ , गया
• हंसराज पब्लिक स्कूल, कैण्टक्षेत्र, खराण्टी, गया

सम्बन्धित लेख

• जनसङ्ख्या अनुसार बिहारके नगरके सूची
• जनसङ्ख्या अनुसार भारतके नगरके सूची
• गया मण्डल
• बोधगया