Wb/nia/Yohane/9
Famokai hörö zau'a
[edit | edit source]I. 1 Me itörö Yesu, ba i'ila niha, sau'a moroi ba dalu ninania.
2 Ba lasofu khönia nifahaönia, lamane: He samahaö, ha niha zamazökhi horö, da'e, ma ira amania, wa no au'a ia moroi ba dalu ninania?[1]
3 Itema lira Yesu, imane: Tenga da'e zamazökhi horö, ba tenga göi ira amania; ba ena'ö te'oroma'ö ba khönia wolau Lowalangi, andrö si manö.[2] 4 Lö tola lö tahalö halöŵö zamatenge ya'ita, fatua moluo. Bongi dania, ba lö sangila mohalöŵö.[3] 5 Fatua sodo ba guli danö, ba haga ba guli danö ndra'odo.[4]
6 Aefa iŵa'ö da'ö, ba idiloi danö ba ibali'ö tambu gilo andrö, ba igule'ö dambu andrö ba hörö andrö,[5] 7 ba imane khönia: Ae sasai mbawau ba mbaŵa Ziloa andrö, "nifatenge" geluahania.
Ba möi ia, isasai mbawania, ba me ifuli ia, ba no i'ila niha.
Lasekhegö za'ua andrö ira farizaio
[edit | edit source]II. 8 Me itörö Yesu, ba i'ila niha, sau'a moroi ba dalu ninania. Ba lamane banuara, awö zi no mangila ya'ia föna, me mangandrö-ngandrö böli gö ia: Tenga ya'ia da'ö, si dadao, mangandrö-ngandrö böli gö?[6]
9 Ba so zanguma'ö: ya'ia. Ba so göi zanguma'ö: Tenga, ba no fakhili-khili ia khönia. Ba ya'ia iŵa'ö: ya'odo da'ö.
10 Ba lamane khönia: He wisa, wa tebokai hörömö?
11 Itema lira, imane: Niha andrö, sotöi Yesu, ifazökhi dambu ba igule'ö ba hörögu, ba imane khögu: Ae ba Ziloa, sasai mbawau. Ba möido, ba me no usasaido, ba u'ila niha.
12 Lamane khönia: Heza so ia?
Imane: Lö u'ila.
13 Ba la'ohe ia ba warizaio, zau'a föna andrö.[7]
14 Ba luo sabato, me luo ifazökhi dambu andrö Yesu, me ibokai hörönia.[8]
15 Ba lafuli lasofu khönia farizaio göi, hewisa, wa i'ila niha. Ba imane khöra: Tambu ibe'e ba hörögu, ba no usasai mbawagu, ba u'ila niha.
16 Ba lamane farizaio ösa: Tenga si otarai Lowalangi niha andrö, me lö i'amoni'ö luo sabato. Ba lamane tanö bö'ö: He moroi i'ila ifazökhi dandra si manö niha si so horö? Ba lö faoma dödöra.[9]
17 Ba lafuli lamane khö zau'a andrö: Ba ya'ugö, hadia öŵa'ö ba khönia andrö, me no ibokai höröu?
Ba imane: Sama'ele'ö ia.[10]
18 Ba lö faduhu dödö niha Yehuda khönia, wa no au'a ia föna, awö wa i'ila niha iada'e, irege muhede ira khö ndra ama zi no teboka hörö andrö.
19 Ba lasofu khöra, lamane: Hadia, onomi da'ö, niŵa'ömi no au'a ia moroi ba dalu ninania? 20 Ba he wisa wa i'ila niha iada'e?
Ba latema lira ira amania, lamane: Ma'ila, wa onoma da'ö, ba no au'a ia, moroi ba dalu ninania; 21 ba he moroi wa i'ila niha iada'e, ba lö ma'ila, ba ha niha zamokai hörönia, ba lö ma'ila. Misofu khönia, noa sa'ae wa'ebuania, ba iŵa'ö dania hadia ia khönia.
22 Me ata'u ndra amania niha Yeduda, andrö laŵa'ö da'ö. Noa sa mamagölö niha Yehuda, na so ena'ö zanguma'ö Keriso Yesu andrö, ba latibo'ö ia banua.[11] 23 Andrö laŵa'ö ira amania: Noa sa'ae wa'ebuania, misofu khönia.
24 Awena muhede ira zamuza tö ba niha andrö, sau'a föna, ba lamane khönia: Fosumange Lowalangi, ya'aga, ba ma'ila, wa no si so horö niha andrö.[12]
25 Itema lira, imane: Lö u'ila, na si so horö ia, sambalö u'ila, sau'a ndra'o föna, ba u'ila niha iada'e.
26 Ba lamane khönia: He iwisa khöu? He iwisa wamokai höröu?
27 Itema lira, imane: Noa sa'ae uŵa'ö khömi, ba lö nifondrondrongomi. Hana wa omasi ami, mirongo zamuza tö? Ma edöna ami göi möi nifahaönia?
28 Mofönu ira khönia, lamane: ya'ugö nifahaönia, nifahaö Moze ndra'aga. 29 Ma'ila, wa no muhede Lowalangi khö Moze, ba da'ö, ba lö ma'ila, he moroi ia.[13]
30 Itema lira niha andrö, imane khöra: Ba da'ö so zahöli-höli dödöda, wa lö mi'ila, he moroi ia, ba no ibokai hörögu. 31 No ta'ila, lö ifondrondrongo li zi so horö Lowalangi ba na so zangata'ufi ya'ia, solo'ö somasi ia, khönia ifondrondrongo.[14] 32 I'otarai mböröta ba lö murongo, so niha samokai hörö zau'a moroi ba dalu ninania. 33 Na tenga si otarai Lowalangi da'ö, ba tebai ilau hadia ia mena'ö.
34 Latema linia, lamane khönia: Me tumbu ndra'ugö, ba no si so horö manö ndra'ugö, ba öfahaö ndra'aga? Ba latuli'ö ia baero.[15]
35 Irongo Yesu, wa no latuli'ö ia baero, ba me falukha ia khönia, ba imane khönia: Hadia, mamati ndra'ugö khö Nono Niha andrö?
36 Itema linia, imane: Ha niha ia, Tua, ena'ö mamati ndra'o khönia?
37 Imane khönia Yesu: Noa sa ö'ila ia, ba sihede khöu, da'ö ia.[16]
38 Ba imane: Mamati ndra'o, Tua! ba mangalulu ia khönia.
Huhuo ba warizaio
[edit | edit source]III. 39 Ba imane Yesu: Börö huku, wa möi ndra'o ba guli danö andre, ena'ö la'ila niha sau'a, ba ena'ö au'a zangila niha.[17]
40 Larongo farizaio ösa, si fao khönia ba da'ö, ba lamane khönia: Ba hadia, sau'a göi ndra'aga?
41 Imane khöra Yesu: Na sau'a ami, ba lö horömi ena'ö, ba iya'e, ba miŵa'ö: Ma'ila niha: ba lö tebulö horömi.[18]
Famotokhi ba gahe
[edit | edit source]- ↑ Luk 13:2
- ↑ Faigi 11:4
- ↑ Faigi 5:17-19
- ↑ Faigi 8:12
- ↑ Mar 8:23
- ↑ HalZin 3:10
- ↑ Faigi 7:32; 11:46
- ↑ Faigi 5:9 b.t.
- ↑ Faigi 7:43
- ↑ Faigi 4:19; Luk 24:19
- ↑ Faigi 7:13; 12:2
- ↑ Faigi 8:46
- ↑ Faigi 7:27; 8:14
- ↑ Yob 35:13; Sin 145:19; Amaed 15:8
- ↑ Faigi 9:2-3
- ↑ Faigi 4:26
- ↑ Mat 13:14-15
- ↑ Faigi 15:22; Hes 13:10-16
Fabaliŵa lala
[edit source]Olayama Zura Yohane: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö