Wb/nia/Yohane/5

Add links
From Wikimedia Incubator
< Wb‎ | nia‎ | Yohane
Wb > nia > Yohane > 5

Niha sofökhö ba mbaŵa Betesa[edit | edit source]

I. 1 Aefa da'ö, ba so gowasa niha Yehuda, ba möi misi yaŵa ba Yeruzalema Yesu.

2 Ba so ba Yeruzalema mbaŵa, ba zinga mbawa göli mbiri-biri, Betesa döinia ba li Heberaio, ba lima nose.[1]

3 Ba ato niha sofökhö ba nose andrö, awö zau'a, awö zombuyu-mbuyu, awö zofökhö baösi, (labalo-baloi wa'atekiba nidanö.[2] 4 Itaria möi tou mala'ika, ba mbaŵa andrö, ba ifakiba nidanö, ba döhö wökhö zi föföna möi si tou ba mbaŵa, na aefa tekiba nidanö, gofu hadia göi wökhönia).

5 Ba so ba da'ö niha, si no tölu ngafulu a ŵalu fakhe wa'ara fökhö.

6 Me i'ila da'ö Yesu, ba me oroma khönia, no ara sibai ia, ba imane khönia: Omasi'ö na döhö wökhöu?

7 Itema linia sofökhö andrö, imane: Lö khögu niha, Tua, solohe ya'o si tou ba mbaŵa na tekiba nidanö, ba na so ndra'o, ba no möi si tou danö bö'ö, fönagu.

8 Imane khönia Yesu: Faoso, fazaŵa gasomö ba owaö-waö![3]

9 Ba döhö wökhö niha andrö ifazaŵa gasonia ba mowaö-waö.

Ba luo sabato, me luo da'ö.

10 Ba lamane niha Yehuda khö nifadöhö fökhö andrö: Luo sabato, ba lö tola ö'ohe gaso.

11 Itema lira, imane: Samadöhö fökhögu andrö zanguma'ö khögu: Fazaŵa gasomö ba owaö-waö.

12 Ba lasofu khönia: Ha niha da'ö, zanguma'ö khöu: Fazaŵa ba owaö-waö?

13 Ba lö i'ila sofökhö andrö ha niha, noa sa iheta ia Yesu, me no ato niha ba da'ö.

14 Aefa da'ö, ba falukha khönia Yesu, ba gosali, ba imane khönia: Faigi, no döhö wökhöu, böi sa'ae fazökhi horö, fa lö göna ndra'ugö sabölö-bölö moroi andrö.[4]

15 Möi niha andrö, iŵa'ö ba niha Yehuda, Yesu zamadöhö fökhönia.[5]

16 Ba andrö lagohi Yesu niha Yehuda, me no ilau da'ö ba luo sabato.[6]

Ifaduhu'ö Yesu wa Lowalangi zamatenge ya'ia[edit | edit source]

II. 17 Ba humede ia khöra, imane: Mohalö-halöŵö Namagu, irugi da'e, ba ya'o göi, mohalöŵö.[7]

18 Andrö mendrua manö la'alui wamunu ya'ia niha Yehuda, me tenga ha fanaŵönia oroisa sabato, me iŵa'ö göi, Lowalangi Namania, ba me ifaomagö ia khö Lowalangi.[8]

19 Ba humede khöra Yesu, imane khöra: Si ndruhu-ndruhu niŵa'ögu khömi, lö i'ila ilau hadia ia Ono, na moroi khönia, na lö ni'ilania, ilau Ama; nilau da'ö sa ilau göi Ono, si manö göi.[9] 20 Noa sa i'omasi'ö Nono Ama, ba fefu nilaunia, ba i'oroma'ö khönia, ba i'oroma'ö khönia dania halöŵö, sebua moroi andrö, ena'ö ahöli-höli dödömi.[10] 21 Hulö si mane fanusugi Nama si mate, si mane fangorifinia ya'ira, si manö göi Nono, i'orifi zomasi ia. 22 Lö'ö sa göi ihuku niha Ama, noa sa ibe'e khö Nono wanguhuku andrö fefu,[11] 23 fa dozi lafosumange Nono, si mane famosumangera Ama. Si lö mamosumange Ono, ba lö'ö göi ifosumange Nama, samatenge Ono.[12] 24 Si ndruhu-ndruhu niŵa'ögu khömi, so wa'auri si lö aetu khö zamondrongo ligu, na mamati ia khö zamatenge ya'o, ba lö lahuku ia; noa sa isaŵa wa'auri, i'otarai wa'amate.[13] 25 Si ndruhu-ndruhu niŵa'ögu khömi, irugi baŵa dania, ba no irugi iya'e, ba larongo li Nono Lowalangi si mate, ba sauri zamondrongo andrö.[14] 26 Hulö si mane khö Nama sa, si so fa'auri ba dödönia si manö göi mbe'enia khö Nono, ena'ö so wa'auri ba dödönia.[15] 27 Ba no itehe khönia wanguhuku, börö me no Ono Niha ia.[16] 28 Böi ahöli-höli dödömi ba da'ö! Irugi baŵa dania, ba larongo linia dozi si so ba lewatö,[17] 29 ba möi ira yaŵa: samazökhi si sökhi, ba ba wemaoso ba wa'auri, ba solo'ö si lö sökhi, ba ba wemaoso ba huku.[18] 30 Lö u'ila ulau hadia ia, na moroi khögu, u'o'ö nirongogu, wanguhuku, ba no atulö wanguhuku andrö khögu. Lö u'alui zomasi ndra'o, somasi zamatenge ya'o u'alui.[19] 31 Na ya'o zamaduhu'ö ya'o, ba tenga si duhu wamaduhu'ögu.[20] 32 Tanö bö'ö zamaduhu'ö ya'o, ba mi'ila, wa no si duhu wamaduhu'önia, famaduhu'önia ya'o.[21] 33 No mifatenge khö Yohane, ba no ifaduhu'ö zi duhu.[22] 34 Ba ya'o, ba tenga ba niha utema wamaduhu'ö andrö, ba andrö uŵa'ö da'ö, ena'ö te'orifi ami. 35 Fandru sihola-hola da'ö no mege, sihaga, ba no omasi ami, mi'omusoi'ö, dödömi, si lö arara, ba haga andrö khönia. 36 Ba no so khögu wamaduhu'ö ba da'ö, sebua moroi khö Yohane. Halöŵö andrö sa, nibe'e Nama khögu, ba wangasiwai ya'ia, halöŵö andrö, nihalögu, da'ö zamaduhu'ö ya'o, wa no Ama zamatenge ya'o.[23] 37 Ba samatenge ya'o andrö, Ama da'ö zamaduhu'ö ya'o. Ba lö mirai mirongo linia, ba nga'eunia, ba lö ni'ilami.[24] 38 Ba lö ahono ba dödömi daroma linia, me lö mamati ami khö nifatengenia andrö.[25] 39 Mi'alu-alui ba zura, me miŵa'ö so khömi ba da'ö wa'auri si lö aetu; ba ya'ia zamaduhu'ö ya'o;[26] 40 ba lö edöna möi ami khögu, ena'ö so khömi wa'auri. 41 Lö utema zumange nibe'e niha. 42 Ba no u'ila ami, wa lö khömi fa'omasi Lowalangi ba dödömi. 43 Ba döi Namagu so ndra'o, ba lö mifonaha ndra'o. Na so dania danö bö'ö, ba döina manö, ba mifonaha.[27] 44 He miwisa mamati, me faoma mitema zumange khö nawömi, ba sumange andrö khö Lowalangi, si ha sambua, ba lö mi'alui?[28] 45 Böi miŵa'ö tödömi, ya'o zangadugö ya'ami khö Nama; so zangadugö ya'ami, Moze, ba zanötöna ami.[29] 46 Na mamati ami khö Moze, ba mamati ami khögu göi ena'ö, noa sa ibe'e ba zura da'ö hadia ia khögu.[30] 47 Ba na lö mamati ami ba zura da'ö, ba he miwisa mamati ba niŵa'ögu?

Famotokhi ba gahe[edit | edit source]

  1. ↑ Neh 3:1
  2. ↑ Fam 16:5
  3. ↑ Mat 9:6; HalZin 9:34
  4. ↑ Faigi 8:11; Mat 12:45
  5. ↑ Ayati 10
  6. ↑ Faigi 7:22 b.t.; 9:16
  7. ↑ Faigi 9:4
  8. ↑ Faigi 10:30–33
  9. ↑ Faigi 5:30
  10. ↑ Faigi 1:51
  11. ↑ Faigi 3:35; Sin 72:1; HalZin 17:31; Mat 25:32
  12. ↑ Faigi 14:13; Fil 2:10,11; YohI 2:23
  13. ↑ Faigi 3:18,37; 8:51
  14. ↑ Faigi 11:43; Mat 11:5; Efes 5:14
  15. ↑ Faigi 1:4; 11:25; YohI 5:20
  16. ↑ Dan 7:13.14; Mat 25:31
  17. ↑ TesI 4:16
  18. ↑ Faigi 9:40; Dan 12:2
  19. ↑ Faigi 5:19; 6:38
  20. ↑ Faigi 8:13; 14:54
  21. ↑ Mat 3:17
  22. ↑ Faigi 1:19 b.t.
  23. ↑ Faigi 10:25; 14:10,11
  24. ↑ Faigi 8:18; 1:18
  25. ↑ Faigi 10:26; KorII 3:15
  26. ↑ Yes 34:16; Sin 40:8; Luk 24:27
  27. ↑ Faigi 7:28
  28. ↑ Faigi 12:42,43
  29. ↑ MozV 31:26 b.t.
  30. ↑ MozI 3:15, 49:10; MozV 31:15 b.t.

Fabaliŵa lala[edit source]

Olayama Zura Yohane: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Yohane/5&oldid=6229717"