Wb/nia/Yohane/4
Huhuo Yesu ba ndra alawe Zamaria
[edit | edit source]I. 1 Me no irongo Yesu, na larongo farizaio, ato nifahaö Yesu ba ato nibayagönia idanö, moroi khö Yohane[1] — 2 ba tenga sa Yesu zamayagö idanö, ha nifahaönia — 3 ba iröi Yudaia, ifuli isaŵa Galilaia. [2].
4 Ba ba Zamaria lalania. 5 Ba irugi mbanua Zamaria andrö, sotöi Sikhara, ba zi tambai mbenua andrö, nibe'e Yakobo khö nononia Yosefo. [3]
6 Ba so ba da'ö gumbu Yakobo. Ba me no erege dödö Yesu wekoli, ba mudadao ia ba zinga gumbu andrö Solaluo.
7 So moroi sa ndra alawe Zamaria ba wana'u idanö. Imane khönia Yesu: Be'e ögu ubadu.
8 Noa sa mofanö nifahaönia miyomo ba mbanua, ba wowöli gö.
9 Imane khönia ira alawe Zamaria andrö; Hadia wa ö'andrö khögu nidanö? niha Yehuda sa ndra'ugö, ba ira alawe Zamaria ndra'odo. [4]
10 Itema linia Yesu, imane khönia: Na ö'ila ena'ö mbuala Lowalangi andrö, ba na ö'ila, ha niha zanguma'ö khöu: Be'e ögu, ubadu; ba no mangandrö ndra'ugö khönia mena'ö, ba no ibe'e khöu nidanö gumbu. [5]
11 Imane khönia ira alawe andrö: Ba lö khöu fana'u Tua, ba no abakha mba'a, ba he moroi khöu nidanö gumbu andrö?
12 Hadia, ebua ndra'ugö moroi khö duada Yakobo, same'e ba'a andre khöda, samadu idanönia, awö nononia, awö gurifönia?
13 Itema linia Yesu, imane khönia: Ifuli awökhi dödö dozi samadu idanö andre, 14 ba irugi zi lo aetu, ba lö'ö manö owökhi dödö zamadu idanö nibe'egu khönia, tobali umbu ba dödönia nidanö andrö, nibe'egu khönia, sangumbungumbu, sanaŵa fa'auri si lö aetu. [6]
15 Imane khönia ira alawe andrö: He Tua! be'e ögu nidanö andrö, fa böi sa'ae owökhi dödögu, fa lö möido ba da'e, mana'u idanö. [7]
16 Imane khönia: Ae kaoni wo'omou, ba fuli'ö ba da'e. 17 Itema linia ira alawe andrö, imane: Lö fo'omogu. Imane khönia Yesu: Si ndruhu niŵa'öu andrö: Lö fo'omogu.
18 Dalima sa'ae zangai ya'ugö, ba tenga fo'omou zorudu khöu iada'e. Si ndruhu niŵa'öu andrö: 19 Imane: khönia ira alawe andrö: He Tua! oroma khögu, wa sama'ele'ö ndra'ugö. [8]
20 Ba hili andrö mangalulu ndra tuama föna, ba ya'ami miŵa'ö, ba Yeruzalema so naha wangalulu [9]
21 Imane khönia Yesu: Fati ligu, alawe, irugi baŵa dania, ba tenga ba hili andrö, ba tenga göi ba Yeruzalema mangalulu ami khö Nama. [10]
22 Ba zi lö mi'ila mangalulu ami; ya'aga, ma'ila, ha ökhö mangalulu ndra'aga, me moroi ba niha Yehuda i'otarai fangorifi andrö. [11]
23 Ba irugi baŵa dania ba no irugi iya'e, ba si ndruhu zangalulu, ba moroi ba Geheha ba moroi ba wa'aduhu mangalulu ira khö Nama. I'alui sa göi Ama zangalulu khönia si manö. [12]
24 Eheha Lowalangi, ba da'ö zi nangea fangalulu, ba zangalulu khönia, fangalulu moroi ba geheha ba fangalulu moroi ba wa'aduhu. [13]
25 Imane khönia ira alawe andrö! U'ila, so dania Mesia andrö, sotöi Keriso, na so da'ö, ba ya'ia zangombakha khöda fefu hadia ia.
26 Imane khönia Yesu: Ya'odo da'ö, si fahuhuo khöu. [14]
27 Ba ba da'ö so ndra nifahaönia, ba ahöli-höli dödöra, me fahuo-huo ia ba ndra alawe, ba lö'ö zui sanofu: Hadia ni'aluimö, ba ma: hadia huhuomö khönia?
28 Ba iröi sa'ae nasoa khönia ira alawe andrö, möi ia miyomo ba imane ba mbanuara: 29 Mi'ae mifaigi niha, si no mangombakha khögu fefu hadia ia nilaugu! Hadia, tenga Keriso andrö da'ö?
30 Ba möi ira moroi yomo, la'ondrasi. 31 Ba barö ö muhede khönia nifahaönia, lamane: A göu, samahaö.
32 Ba imane khöra: So gögu, ni'a, si lö mi'ila. 33 Ba faoma lamane nifahaönia khö nawöra: Hadia, so zi no molohe gö khönia?
34 Imane khöra Yesu: Ogu da'ö, na u'o'ö zomasi zamatenge ya'o, ba na u'asiwai halöŵö andrö khönia. [15]
35 Hadia, lö miŵa'ö: Hatö öfa waŵa, ba famasi sa'ae? Hiza, uŵa'ö khömi: Mifaöga hörömi, ba mifaigi nowi, noa sa'ae a'usö, tandra wa basitö. [16]
36 Itema sa'ae luo samasi, ba i'ozaragö mbua ba wa'auri si lö aetu, ena'ö faoma omuso dödöra, he sanaru, ba he samasi. [17]
37 Ba da'ö sa duhu niŵa'ö andrö: Samösa zanaru ba samösa zamasi.
38 No ufatenge ami ba wamasi, ba zi lö erege dödömi. No mohalöŵö niha bö'ö, ba ya'ami zanohugö holöŵöra andrö. [18]
Mamati mbanua Zamaria
[edit | edit source]II. 39 Ba ato zamati khönia banua Zamaria, banua da'ö no mege, ba niŵa'ö ndr alawe andrö, samaduhu'ö: No i'ömbakha'ö khögu fefu hadia ia nilaugu.
40 Ba me no la'ondrasi ia banua Zamaria andrö, ba la'andrö khönia, i'iagö khöra da'ö; ba dua wonginia ba da'ö.
41 Ba ato zamati ba wangombakhania, 42 ba lamane ba ndra alawe no mege: Tenga sa'ae ba ni'ombakha'ömö mamati ndra'aga, noa sa'ae marongo ba no ma'ila, wa si ndruhu sangorifi ösi guli danö da'ö. [19]
Latema ia banua Galilaia
[edit | edit source]III. 43 Ba aefa zi dua wongi, ba iheta ia ba da'ö, isaŵa Galilaia. 44 Ifaduhu'ö sa Yesu, te'ositengagö zama'ele'ö ba mbanuara. [20].
45 Ba me no irugi Galilaia, ba latema ia banua Galilaia, me no la'ila nilaunia ba Yeruzalema, ba gowasa fefu. Noa sa möi ira göi ba gowasa. [21]
Ifadöhö wökhö nono genoni zalaŵa
[edit | edit source]IV. 46 Ba irugi zui Kana ba Galilaia ba nibali'önia agu idanö. Ba so genoni razo, sofökhö ono, ba Gafanauma. [22]
47 Me irongo da'ö, so Yesu, si otarai Yudaia, si möi ba Galilaia, ba möi ia khönia, ena'ö möi ia misi tou, ba wamadöhö fökhö nononia, si onali mate.
48 Ba imane khönia Yesu: Na lö ni'ilami tandra ba ila-ila, ba lö mamati ami. [23]
49 Imane khönia enoni razo andrö: He Tua! ae mitou, fatua lö mate nonogu andrö.
50 Imane khönia Yesu: Ae'e, auri nonou. Faduhu dödö niha andrö ba li andrö, niŵa'ö Yesu khönia, ba möi.
51 Ba me no irugi si tou, ba falukha ia zawuyunia ba la'ombakha'ö khönia: Auri nonou.
52 Ba isofu khöra, ha wa'alaŵa luo, me abe'e ia. Ba lamane khönia: Menewi, manaere wa'alaŵa luo, ba tebato wa'aukhu.
53 Ba aboto sa'ae ba dödö nama nono andrö, da'ö wa'alaŵa luo, me iŵa'ö khönia Yesu: Auri nonou. Ba mamati ia, awö zoroiyomonia fefu. [24]
54 Me i'otarai Yudaia, me numalö ia ba Galilaia, ilau da'ö Yesu, dombua sa'ae ba da'ö dandra andrö. [25]
Famotokhi ba gahe
[edit | edit source]- ↑ Faigi 3:22-26
- ↑ Ayati 45
- ↑ MozI 33:19; 48:22
- ↑ Luk 9:53; Eser 4:1 b.t.
- ↑ Sin 36:10; Fam 21:6
- ↑ Faigi 7:38-39; Yes 12
- ↑ Yes 55:1
- ↑ Faigi 1:49-50; 2:25
- ↑ MozV 12:5 b.t.
- ↑ Mal 1:11
- ↑ SalII 17:27 b.t.; Yes 2:3; Luk 1:69
- ↑ Rom 12:1-2
- ↑ KorII 3:17
- ↑ Faigi 9:37
- ↑ Faigi 6:38; Sin 40:9
- ↑ Mat 9:37
- ↑ KorI 3:6 b.t.
- ↑ HalZin 8:5 b.t.
- ↑ Faigi 17:8
- ↑ Mat 13:57
- ↑ Faigi 2:23
- ↑ Faigi 2: 19
- ↑ Faigi 2:18; 20:29
- ↑ HalZin 16:15-31 b.t.
- ↑ Faigi 2:11
Fabaliŵa lala
[edit source]Olayama Zura Yohane: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö