Jump to content

Wb/nia/Yohane/12

From Wikimedia Incubator
< Wb‎ | nia‎ | Yohane
Wb > nia > Yohane > 12

Tebayoini Yesu ba Mbetania[edit | edit source]

I. 1 Önö bongi lö fasa, ba möi ba Mbetania Yesu, ba zi so Lazaro andrö, nisusuginia moroi ba ngai zi mate.[1] 2 Ba labe'e gönia ba da'ö, ba sangai halöŵö Marata. Ba samösa Lazaro, awönia ba wemanga.[2]

3 Ba ihalö Maria zakati zi ndruhu wanikha narawasu, samohua, sebua böli, ibayoini gahe Yesu ba i'osi bunia; ba afönu nomo hua wanikha andrö.

4 Ba imane Yuda andrö, banua Kariota, nifahaönia si samösa, si manga mbölinia dania:[3] 5 Hana wa lö la'amawa wanikha andrö, otu a lima wulu rufia mbölinia mena'ö, ba labe'e ba zi numana?

6 Ba tenga me so ba dödönia zi numana iŵa'ö da'ö, me no sanagö-nagö ia, me khönia so naha gefe, me ihalö-halö game'ela andrö.[4]

7 Ba imane Yesu: Böi tegu ia; no i'irö'ö da'ö, irege luo wogo'o ya'o. 8 Si lö mamalö-malö awömi zi numana, ba ya'o, ba tenga si lö mamalö-malö khömi.

Famagölö ndra farizaio ba khö Lazaro[edit | edit source]

II. 9 Ba ato zamondrongo niha Yehuda, no so ia ba da'ö, ba möi ira, tenga ha Yesu mbörö, ba wamaigi Lazaro göi, nisusuginia moroi ba ngai zi mate.

10 Ba mamagölö gere sebua, ena'ö labunu göi Lazaro andrö; 11 börö sa ia, wa ato zi so niha Yehuda, samati khö Yesu.

Fe'amöi Yesu ba Yeruzalema[edit | edit source]

III. 12 Sara wongi aefa da'ö,[5] me larongo, niha sato, si no möi ba gowasa, no möi ba Yeruzalema Yesu, 13 ba lahalö mbulu nohi, möi ira mamaondragö ya'ia, mu'ao ira: Hosana, ya'ahowu zi so andrö, ba döi Zo'aya, razo Ndraono Gizeraeli andrö![6]

14 Ba me isöndra nono galide Yesu, ba i'okudo, itörö zi so ba zura andrö: 15 "Böi ata'ufi, ono Ziona alawe, hiza, so razomö, i'okudo nono galide".[7]

16 Lö'ö sa i'anema'ö aboto ba dödö ndra nifahaö da'ö ba me no tefolakhömi Yesu, awena itörö tödöra, wa ba khönia tesura da'ö, awö wa no lamanö khönia.

17 Ba lafaduhu'ö niha sato, si fao khönia, wa no humede ia khö Lazaro andrö ba lewatö, wa no isusugi ba ngai zi mate.[8] 18 Andrö göi la'ondrasi ia niha sato, me no larongo, no ifazökhi dandra andrö.

19 Ba faoma lamane farizaio khö nawöra: Mi'ila, lö'ö manö fakhai wolaumi. Hiza, ahori manö la'o'ö niha ba guli danö.[9]

Niŵa'ö Yesu me so ndra niha Heleni[edit | edit source]

IV. 20 Ba so Ndrawa Heleni ösa, awö zi no möi miyaŵa, mangalulu ba gowasa.[10] 21 Da'ö zi möi khö Wilifo andrö, banua Mbetisa'ida, ba Galilaia, la'andrö khönia, lamane: He Tua, omasiga ma'ila Yesu.[11]

22 Möi Wilifo, iŵa'ö khö Gandrea, ba möi ira, darua ira, Andrea Filifo, laŵa'ö khö Yesu.

23 Ba itema lira Yesu, imane: No irugi inötö andrö ba wamolakhömi Ono Niha.[12] 24 Si ndruhu-ndruhu niŵa'ögu khömi, na lö tetaru ba danö zi samba ngawua ulitö, ba na lö obou, ba ha ya'ia manö; ba na obou ia ua, ba oya mbuania.[13] 25 Khö zomasi nosonia aetu ia, ba si fa'udu ba nosonia ba guli danö andre, ba irorogö ba wa'auri si lö aetu.[14] 26 Na so zi möi enonigu, ba yamu'o'ö ndra'o, ba ba zi so ya'o, ba da'ö göi so genonigu dania. Na so zi möi enonigu, ba ifosumange Amagu [15] 27 Iada'e, ba abu dödögu, ba hadia niŵa'ögu? He Ama, efa'ö ndra'o ba ginötö andre! Ba andrö urugi ginötö andre.[16] 28 He Ama, folakhömi döimö!

Ba so li, si otarai zorugo, imane: No ufolakhömi, ba ufuli ufolakhömi dania![17]

29 Ba lamane niha sato, si so ba da'ö, me larongo da'ö: Mu'ugu mbanua! Ba so göi zanguma'ö: No muhede khönia mala'ika.[18]

30 Itema lira Yesu, imane: Tenga ya'o mbörö, wa so li andrö, ya'ami mbörö.[19] 31 Fanguhuku ösi guli danö andre iada'e, iada'e tetibo baero zalaŵa guli danö andre.[20] 32 Ba ya'o, na no te'alaŵa'ö yaŵa ndra'o, moroi ba danö, ba ahori udönisi ira khögu.[21]

33 Ba wangombakha he wisa wa'amatenia dania iŵa'ö da'ö.

34 Ba latema linia niha sato, lamane: No marongo ba zura goroisa, lö tebulö Keriso andrö irugi zi lö aetu; ba hana wa öŵa'ö ni'alaŵa'ö yaŵa Nono Niha? Ha niha Nono Niha andrö? [22]

35 Ba imane khöra Yesu: Ma'ifu tö na so ba khömi haga andrö. Mi'oguna'ö haga andrö, ba lalami, fa lö ikhamö ami fa'ogömi-gömi. Sowaö-waö ba zogömi-gömi, ba lö i'ila, heza isaŵa.[23] 36 Mi'oguna'ö haga andrö, wamati ba haga andrö, ena'ö tobali ono haga ami.

Da'ö niŵa'ö Yesu, ba mofanö ia, ibini'ö ia khöra.

Lö mamati niha Yehuda[edit | edit source]

V. 37 Ba he no si manö wa'oya dandra nifazökhinia ba zanehe ira, ba lö'ö zui mamati ira khönia.[24] 38 Ena'ö itörö niŵa'ö Yesaya andrö, sama'ele'ö, me imane: He So'aya, ha niha zi faduhu tödö ba wangombakha'öma andrö, ba tanga Zo'aya andrö, ba ha khö tefa'ele'ö?[25]

39 Andrö tebai mamati ira, iŵa'ö göi Yesaya:[26] 40 "No ifobalunö höröra ba no i'abe'e'ö dödöra, ena'ö lö la'ila höröra, ba ena'ö lö aboto ba dödöra, ba fa böi lafalalini gera-erara, ba fa böi u'orifi ira."

41 Da'ö niŵa'ö Yesaya, me no i'ila lakhöminia, ba me itörö linia ia.[27]

42 Ba ato sa zui zamati göi khönia salaŵa, ba börö warizaio, wa lö la'ombakha'ö, fa böi latibo'ö banua ira.[28] 43 Omasi sa ira zumange ba niha, moroi ba zumange ba Lowalangi.[29]

44 Ba mu'ao Yesu, imane: Samati khögu, ba tenga khögu mamati ia, khö samatenge ya'o mamati ia.[30] 45 Ba sangila ya'o, ba i'ila zamatenge ya'o andrö.[31] 46 Haga ndra'o, si no möi ba guli danö, ena'ö böi sa'ae so ba zogömi-gömi dozi samati khögu. [32] 47 Ba na so zamondrondrongo ligu, ba na lö i'o'ö, ba tenga ya'o zanguhuku ya'ia. Tenga sa ba da'ö möi ndra'o, ba wanguhuku ösi guli danö, ena'ö u'orifi nösi guli danö.[33]

48 Khö zangositengagö ya'o, si lö mamonaha taroma ligu, khönia so sa'ae zanguhuku ya'ia; taroma ligu andrö, niŵa'ögu, da'ö zanguhuku ya'ia, na luo safuria andrö.[34] 49 Tenga sa moroi khögu manö niŵa'ögu; samatenge ya'o, Amagu, ba no ibe'e goroisa khögu, hadia niŵa'ögu, hadia wehedegu.[35] 50 Ba u'ila, fa'auri si lö aetu goroisania andrö. Andrö u'o'ö niŵa'ö Namagu khögu, ba wehedegu andrö.

Famotokhi ba gahe[edit | edit source]

  1. Faigi 11:1–43 b.t.
  2. Luk 10:39–40
  3. Faigi 13:26 b.t.; 18:2
  4. Luk 8:3; Faigi 13:29
  5. Ayati 12–18; Mat 21:1–11; Mar 11:1–10; Luk 19:29–38
  6. MozIII 23:40
  7. Sakh 9:9
  8. Luk 19:37
  9. Faigi 3:26; 11:48
  10. Faigi 7:35
  11. Luk 19:3
  12. Faigi 17:1; 13:32
  13. KorI 15:36 b.t.
  14. Luk 17:33
  15. Luk 9:23; Faigi 14:3
  16. Mat 26:38,39
  17. Mat 3:17
  18. HalZin 23:9
  19. Faigi 11:42
  20. Faigi 16:11; 14:30
  21. Faigi 3:14; 8:28
  22. Sin 45:7; 72:7,17; 110:4; Yes 9:7; Hes 37:35; Dan 7:13,14
  23. Faigi 7:33; 11:9,10
  24. HalZin 2:22; Mat 26:1–5
  25. Yes 53:1
  26. Yes 6:9–10; Mat 13:14 b.t.
  27. Yes 6:1
  28. Faigi 7:48; 9:22
  29. Faigi 5:44
  30. Faigi 7:16
  31. Faigi 10:30–14;9
  32. Faigi 8:12
  33. Faigi 3:17
  34. Faigi 3:18; Mar 16:16
  35. Faigi 5:19 b.t.

Fabaliŵa lala[edit source]

Olayama Zura Yohane: 123456789101112131415161718192021

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö