Wb/nia/Yohane/8

From Wikimedia Incubator
< Wb‎ | nia‎ | Yohane
Wb > nia > Yohane > 8

Sohorö[edit | edit source]

I 1 Ba möi ba gahe hili wanikha Yesu. [1]

2 Ba me no moluo, ba ifuli ia ba gosali, ba oi la'ondrasi ia niha, ba mudadao ia mamahaö ya'ira.

3 Ba la'ohe khönia sangila amakhoita ba farizai'o ndra alawe, nira'u baewawö, lafa'aso ba gotaluara, lamane khönia:

4 He samahaö, nira'u baewawö ndra alawe andre.

5 Ba ba goroisa iŵa'ö khöda Moze, nibunu zi manö, nitebu kara, ha ya'ugö, ha öŵa'ö? [2]

6 Fanandraigö ya'ia, wa laŵa'ö da'ö, ena'ö la'ila mu'adugö ia. Ba ifaöndrö ia tou Yesu, isura danö turunia. [3]

7 Ba me lö labato wanofu khönia, ba ifuli ifaöga ia, ba imane khöra: Na so ba khömi zi lö horö, ba yamubörötaigö wanebu kara ya'ia. [4]

8 Ba ifuli ifaöndrö ia manura tanö.

9 Ba ya'ira, me larongo da'ö, ba me itegu ira tödöra, ba monizanizara wofanö, i'otarai zatua, numalö ba zafuria, ba toröi Yesu, ha ya'ia, awö ndra alawe andrö, ba gotaluara no mege. [5]

10 Ba me no ifaöga ia Yesu ba me lö ni'ilania niha, baero ndra alawe, andrö, ba imane khönia: He alawe, heza so da'ö, sangadugö ya'ugö? Lö sanguhuku ya'ugö?

11 Ba imane: Lö'ö, Tua. Imane khönia Yesu: Ba ya'odo göi, lö uhuku ndra'ugö. Ofanö, ba böi sa'ae fazökhi horö. [6]

Huhuo ba niha Yehuda[edit | edit source]

II. 12 Ba ifuli muhede khöra Yesu imane: ya'odo haga nösi guli danö andrö. Solo'ö ya'o, ba lö mowaö-waö ba zogömi-gömi, so sa'ae khönia haga ba wa'auri andrö. [7]

13 Ba lamane khönia farizai'o: ya'ugö nifaduhu'ö mö, lö duhu wamaduhu'ömö andrö.[8]

14 Itema lira Yesu, imane khöra: He ya'o samaduhu'ö ya'odo, ba duhu zui wamaduhu'ögu, me no u'ila, he moroi ndra'o, ba heza möido, ba ya'ami, ba lö mi'ila, he moroi ndra'o ba heza möido. [9]

15 ösi niha dali wanguhuku khömi, ya'o ba lö uhuku niha. [10] 16 Ba he manguhuku ndra'o, ba si ndruhu wanguhukugu, me no tenga ha ya'o, daruaga sa'ae samatenge ya'o. [11]

17 Ba noa göi so ba goroisa khömi, si duhu wamaduhu'ö zi darua. [12]

18 ya'odo zamaduhu'ö ya'o, ba ifaduhu'ö ndra'o samatenge ya'o, Amagu. [13]

19 Ba lamane khönia: Heza so Namau andrö? Itema lira Yesu, imane: Lö mi'ila ha niha ndra'o, ba lö'ö göi mi'ila ha niha Namagu andrö. Na mi'ila ena'ö ha niha ndra'o, ba mi'ila göi ha niha Namagu andrö. [14]

20 Ba zinga naha game'ela iŵa'ö da'ö, me mamahaö ia ba gosali. Ba lö sondra'u ya'ia, me lö'ö na irugi inötö andrö khönia. [15]

21 Ba imane zui Yesu khöra: Mofanö ndra'o, ba mi'alui ndra'o dania, ba mate ami ba horömi. Tebai möi ami ba zi möi ndra'o. [16]

22 Ba lamane niha Yehuda: Ta'ila na ibunu ia dania, wa iŵa'ö: Tebai möi ami ba zi möi ndra'o? [17]

23 Ba imane khöra: Moroi si tou ami, moroi si yaŵa ndra'odo; moroi ba guli danö andre ami, tenga moroi ba guli danö andre ndra'odo. [18]

24 Andrö no uŵa'ö khömi, si mate ami ba horömi. Na lö'ö sa mamati ami, wa ya'odo, ba si mate ami ba horömi. [19]

25 Ba lamane khönia: Ha niha ndra'ugö? Imane khöra Yesu: Niŵa'ögu khömi göi, i'otarai mböröta. [20]

26 Oya niŵa'ögu ba khömi andrö, ba oya nihukugu, ba samatenge ya'o, ba no si ndruhu, ba nirongogu khönia, da'ö niŵa'ögu ba niha ba guli danö. [21]

27 Ba lö aboto ba dödöra, wa Amania niŵa'önia khöra.

28 Ba imane Yesu: Na no mi'alaŵa'ö yaŵa dania Nono Niha, awena dania aboto ba dödömi, wa ya'odo, awö wa lö hadia ia zoroi ba khögu, nilaugu. u'o'ö wamahaö Namagu ya'o, da'ö huhuogu. [22]

29 Ba fao-fao khögu zamatenge ya'o. Lö iröi ndra'o, ha ya'o, me lö mamalö-malö ulau zomasi ia.

30 Me iŵa'ö da'ö, ba ato zamati khönia.

31 Ba imane Yesu ba niha Yehuda, si no mamati khönia: Na lö tebulö ami ba daroma ligu andrö, ba si ndruhu nifahaögu ami; [23]

32 ba aboto ba dödömi zi duhu, ba i'efa'ö ami si duhu andrö. [24]

33 Latema linia, lamane: Ma'uwu Gaberahamo ndra'aga, ba lö marai möi sawuyu niha bö'ö, hadia wa öŵa'ö: Ni'efa'ö ami? [25]

34 Itema lira Yesu, imane: Si ndruhu-ndruhu niŵa'ögu khömi, sawuyu horö zamazökhi horö. [26]

35 Ba tenga sa si lö mamalö-malö yomo zawuyu, si lö mamalö-malö nono. [27]

36 Ba na i'efa'ö ami Ono andrö, awena aefa sibai ami. [28]

37 u'ila, wa no ma'uwu Gaberahamo ami; ba mi'alui wamunu ya'o, me lö fakhai daroma ligu ba dödömi. [29]

38 uŵa'ö hadia ni'ilagu khö Namagu; ba ya'ami sa göi, mi'o'ö nirongomi khö namami andrö.

39 Latema linia, lamane khönia: Aberahamo duama. Imane khöra Yesu: Na ma'uwu Gaberahamo ami, ba mi'o'ö ena'ö mbua-bua Gaberahamo. [30]

40 Ba mi'alui sa wamunu ya'o, niha sanguma'ö khömi si duhu, nirongogu khö Lowalangi; tenga si manö Gaberahamo.

41 Bua-bua namami andrö mi'o'ö. Lamane khönia: Tenga ono horö ndra'aga, ha samosa namama, Lowalangi.

42 Imane khöra Yesu: Na amami Lowalangi mena'ö, ba mi'omasi'ö ndra'o. Moroi ba Lowalangi sa mbörötagu, ba da'ö u'otarai; tenga sa moroi ba khögu, wa no so ndra'o, Ya'ia sa zamatenge ya'o. [31]

43 Hana wa lö aboto ba dödömi wehedegu, wa tebai mifondro-ndrongo ligu? [32]

44 Moroi ba Gafökha ami, ba no edöna ami mi'o'ö wa'omasi namami andrö. No samunu niha da'ö, i'otarai mböröta, ba lö ni'agönia si duhu, lö'ö sa si duhu ba dödönia. Na iŵa'ö waya, ba moroi ba zi so khönia muhede ia, sofaya sa ia ba ama zofaya. [33]

45 Ba me no si duhu niŵa'ögu, andrö lö mamati ami.

46 Ha niha ba khömi zanegu horö ba khögu zambalö? Na uŵa'ö zi duhu, ba hana wa lö mamati ami khögu? [34]

47 Si otarai Lowalangi, ba ifondrondrongo li Lowalangi, andrö lö mamondrongo ami, me tenga moroi ba Lowalangi ami. [35]

48 Latema linia niha Yehuda, lamane khönia: Tenga si duhu niŵa'öma, wa Dawa Zamaria ndra'ugö, sobekhu? [36]

49 Itema lira Yesu, imane: Tenga sobekhu ndra'odo, ufosumange sa Namagu, ba ya'ami, ba mi'o'aya ndra'o.

50 Ba lö u'alui zumangegu, so zangalui ya'ia, sanguhuku. [37]

51 Si ndruhu-ndruhu niŵa'ögu khömi, na so zolo'ö ligu, ba lö'ö manö i'ila wa'amate, irugi zi lö aetu. [38]

52 Lamane khönia niha Yehuda; Awena aboto ba dödöma, wa sobekhu ndra'ugö. No mate Gaberahamo, awö zama'ele'ö andrö, ba öŵa'ö: Na so zolo'ö ligu, ba lö'ö manö itandra wa'amate, irugi zi lö aetu. [39]

53 Hadia, ebua ndra'ugö, moroi khö duada Aberahamo, si no mate? Ba sama'ele'ö andrö, ba no mate. Hadia öbali'ö ndra'ugö?

54 Itema lira Yesu imane: Na ufolakhömi ndra'o, ba faya lakhömigu andrö. Amagu zamolakhömi ya'ö, niŵa'ömi: Lowalangima ia. [40]

55 Ba lö aboto ba dödömi ia, ba ya'o, ba sangila ya'ia. Ba na uŵa'ö ena'ö, lö u'ila ia, ba sofaya ndra'o, si mane ya'ami. Ba no u'ila ia, ba u'o'ö linia. [41]

56 Owua-wua dödö duami Aberahamo, ena'ö i'ila mbaŵagu andrö, ba i'ila, ba omuso dödönia. [42]

57 Lamane khönia niha Yehuda: Ambö na lima wulu fakhe ndra'ugö, ba no ö'ila Gaberahamo? [43]

58 Imane khöra Yesu: Si ndruhu-ndruhu niŵa'ögu khömi lö Aberahamo na, ba so ndra'o, [44]

59 Ba latuyu gara, ba wanebu ya'ia. Ba ibini'ö ia Yesu, ba iheta ia ba gosali. [45]

Famotokhi ba gahe[edit | edit source]

  1. Luk 21:37-38
  2. Moz III 20:10
  3. Luk 11:53-54; 10:25 b. t.
  4. Moz V 17: 7; Rom 2:1
  5. Rom 2:15-22
  6. Faigi 3:17; 5:14
  7. Faigi 1:4-9 Yes 49:6
  8. Faigi 5:31
  9. Faigi 7:28-33
  10. Faigi 7:24; 8:11
  11. Faigi 8:29; 5:30 b. t.
  12. Moz V 17:6; 19:15
  13. Faigi 5:37
  14. Faigi 16:3;14:7
  15. Mar 12:41 Faigi 7:30 Luk 22:33
  16. Faigi 7:33;34
  17. Faigi 7:35
  18. Faigi 3:31
  19. Faigi 4:26
  20. Hes 12:25 Yes 52:6
  21. Faigi 3:33
  22. Faigi 12:32; 5:19;7:16
  23. Faigi 7:17
  24. Gal 5:1 Yak 1:25
  25. Mat 3:9 Neh 9:36
  26. Rom 6:16;20
  27. Moz I:29;10; Moz II 21:2 Sin 23:6
  28. Rom 6:18; 8:2
  29. Faigi 5:18
  30. Gal 3:7
  31. Faigi 5:43;16:27
  32. Faigi 6:60 Kor I 2:14
  33. Yoh I 3:8-10 Moz I 3; Fet II 2:4
  34. Fet I 2:22 Kor II 5:21
  35. Faigi 18:37 Yoh I 4:6
  36. Faigi 7:20
  37. Faigi 5:41
  38. Faigi 5:24; 11:25 b. t
  39. Sakh 1:5
  40. Faigi 5:31-32
  41. Faigi 7:28
  42. Heb 11:13
  43. Luk 3:23
  44. Faigi 1:1-2 Yes 43:13 Moz II 3:14
  45. Faigi 10:31; Moz III 24:16 Luk 4:30


Fabaliŵa lala[edit source]

Olayama Zura Yohane: 123456789101112131415161718192021

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö