Wb/nia/Yohane/15

From Wikimedia Incubator
< Wb‎ | nia‎ | Yohane
Wb > nia > Yohane > 15

Amaedola döla nagu[edit | edit source]

I. 1 Ya'odo döla nagu si ndruhu andrö, ba si so kabu nagu Namagu. 2 Fefu ndraha ba khögu, si lö mowua, ba iheta, ba fefu zowua, ba ihaogö, ena'ö tedou wa'oya mbuania.[1]

3 Si no muhaogö ami, börö daroma li andrö, niŵa'ögu khömi.[2]

4 Mi'iagö ndra'o, ba u'iagö ami. Hulö ndraha, si tebai mowua, ha ya'ia, na tenga sa'ae ba döla nagu so ia, si manö göi ami, na tenga sa'ae ba khögu so ami.

5 Ya'odo döla nagu andrö, daha ami. Sangiagö ya'o, na u'iagö ia göi, daö zoya bua, me tebai milau hadia ia, na lö ya'o.[3]

6 Nitibo'ö na so zi lö mangiagö ya'o, hulö ndraha, ba mate, ba la'ozaragö ba latibo'ö ba galitö ba akhozi.[4] 7 Na mi'iagö ndra'o, ba na lö aefa ba dödömi daroma ligu, ba mi'andrö hadia zomasi ami, ba tebe'e khömi.[5]

8 Ba da'ö tefosumange Namagu, ena'ö oya mbuami, ba ena'ö tobali nifahaögu ami. 9 Si mane fa'omasi Nama ndra'o, si manö göi wa'omasigu ami. Mi'iagö wa'omasigu andrö. 10 Na mi'o'ö goroisagu, ba da'ö mi'iagö wa'omasigu, si mane folo'ögu oroisa Namagu, be u'iagö wa'omasinia.[6]

11 Da'ö niŵa'ögu khömi, ena'ö so ba dödömi wa'omuso dödö andrö khögu, ba ena'ö a'oi so wa'omuso dödömi.[7]

Famarou ba wangomasi'ö awö[edit | edit source]

II. 12 Da'ö goroisagu, ena'ö faoma mi'omasi'ö nawömi, si mane fa'omasigu ami.[8] 13 Fondrege wa'ebua wangomasi'ö awö, na ibelegö nosonia niha föna zi fahuwu khönia.[9]

14 Si no fahuwu khögu ami, na mi'o'ö hadia niŵa'ögu khömi.[10] 15 Lö'ö sa'ae ube'e töimi genoni, enoni, ba lö i'ila, hadia nifazökhi zokhö ya'ia; ba no ube'e töimi zi fahuwu, noa sa u'ombakha'ö khömi fefu nirongogu khö Namagu.[11]

16 Tenga ya'ami zanuyu ya'o, ya'o sa zanutuyu ya'ami, ba no ufataro ami, ena'ö möi ami mowua, ba ena'ö lö tebulö mbuami, ena'ö ibe'e khömi Ama hadia ni'andrömi khönia ba döigu.[12]

17 Da'ö goroisagu khömi, ena'ö faoma mi'omasi'ö nawömi.

Fondrara tödö ba watiusa niha guli danö[edit | edit source]

III. 18 Na fatiu dödö niha guli danö khömi, ba ya'aboto ba dödömi, no oföna fatiu dödöra khögu.[13] 19 Na awö niha guli danö ami ena'ö, ba no omasi ena'ö niha guli danö dana khöra andrö; ba me no tenga awö niha guli danö ami, me no ututuyu ami ba niha guli danö, andrö wa fatiu dödö niha guli danö khömi.[14]

20 Mitörö-törö tödömi li andrö, niŵa'ögu khömi: Tenga sebua moroi khö zokhö ya'ia zawuyu. Na no lagohi ndra'o, ba lagohi göi ami; na no la'o'ö ligu, ba la'o'ö göi limi.[15]

21 Ba börö döigu, wa lalau khömi da'ö fefu, me lö saboto ba dödöra zamatenge ya'o.[16] 22 Na lö si möido mena'ö, muhede khöra, ba lö horöra. Ba iada'e, ba lö tahi khöra ba horöra andrö.[17] 23 Si fatiu tödö khögu, ba fatiu göi khö Namagu.[18]

24 Na lö nihalögu mena'ö ba khöra halöŵö andrö, si lö irai ihalö niha bö'ö, ba lö horöra ena'ö, ba iada'e, ba no la'ila, ba noa zui fatiu dödöra khögu ba khö Namagu.[19] 25 Ba ena'ö itörö li andrö, nisura ba zura goroisa khöra: "No fatiu dödöra khögu, ba lö börö-börö".[20]

26 Na so zanolo andrö, nifatengegu khömi dania, si oroi khö Nama, Eheha si duhu andrö, si otarai Nama, da'ö zamaduhu'ö ya'o.[21] 27 Ba ya'ami göi, ba samaduhu'ö, me no i'otarai mböröta fao-fao ami khögu.[22]

Famotokhi ba gahe[edit | edit source]

  1. Mat 15:13; Fil 1:9-11
  2. Faigi 13:10; Efes 5:26
  3. KorII 3:5
  4. Mat 3:10
  5. Faigi 14:13; Mar 11:24
  6. Faigi 14:15
  7. Faigi 16:24
  8. Faigi 13:34
  9. Rom 5:6 b.t.
  10. Luk 8:21
  11. Yak 2:23
  12. Faigi 16:23
  13. YohI 3:13
  14. Faigi 17:14
  15. Faigi 13:16; Mat 24:9
  16. Faigi 16:3
  17. Faigi 9:41
  18. Faigi 5:23
  19. Faigi 10:37-38
  20. Sin 35:19; 69:5
  21. Faigi 14:16,26
  22. HalZin 1:8-21 b.t.; 5:32

Fabaliŵa lala[edit source]

Olayama Zura Yohane: 123456789101112131415161718192021

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö