Jump to content

Wb/nia/Yohane/20

Add links
From Wikimedia Incubator
< Wb | nia | Yohane
Wb > nia > Yohane > 20

Femaoso Yesu

[edit | edit source]

I. 1 Sara wongi aefa zabato, ba möi ba lewatö Maria andrö, banua Magadala, ihulö wongi, me ogömi-gömi na, ba i'ila, no laheta gowe andrö ba lewatö.[1] 2 Ba fagohi ia khö Zimoni Fetero ba khö nifahaö si samösa andrö, ni'omasi'ö Yesu, ba imane khöra: No lahalö Duada, ba lewatö, ba lö ta'ila heza labe'e ia.[2]

3 Ba möi Wetero, awö nifahaö si samösa andrö, lasaŵa lewatö. 4 Ba faoma fagohi ira, darua ira. Ba alio nifahaö si samösa andrö wagohisa, moroi khö Wetero, ya'ia zi föföna mondrugi lewatö, 5 ba me ifaigi bakha, ba i'ila muko andrö, nitou'ö tou; ba lö'ö sa möi ia bakha.

6 Ba so Zimoni Fetero, i'o'ö, möi ia tou ba lewatö, ba i'ila muko andrö, nitou'ö tou. 7 Ba lö mu'orudugö ba muko andrö zaembu, si so ba högö Yesu mege; no lagölugö, sambua nahania.[3]

8 Ba awena möi tou göi nifahaö si samösa andrö, si föföna mondrugi lewatö, ba i'ila, ba faduhu dödönia. 9 Lö'ö na sa aboto ba dödöra zi so ba zura, wa lö tola lö maoso Yesu moroi ba ngai zi mate.[4] 10 Ba lafuli ira khöra nifahaö andrö.

I'oroma'ö ia khö Maria Magadala

[edit | edit source]

II. 11 Ba no so ba zinga lewatö Maria andrö, mege-ege. Ba me mege-ege ia, ba ifaigi bakha ba lewatö, 12 ba i'ila mala'ika, darua, sobaru safusi, sidadao, samösa tanö ba högö, samösa tanö ba gahe, ba nibe'e boto Yesu mege.[5]

13 Lamane khönia: Hana wa mege-ege ndra'ugö, alawe? Imane khöra: No lahalö Zo'aya ya'o, ba lö u'ila, heza labe'e ia.

14 Me aefa iŵa'ö da'ö, ba ibali'ö ia furi ba i'ila Yesu; no so ba da'ö, ba lö i'ila, wa Yesu da'ö.[6]

15 Imane khönia Yesu: Hana wa mege-ege ndra'ugö, alawe? ha niha ni'aluimö?

Iwai sohalöŵö ba kabu, ba imane khönia: He Tua, na ya'ugö zangoloi'ö ya'ia, ba ombakha'ö khögu, heza öbe'e ia ba möido muhalö.[7]

16 Imane khönia Yesu: He Maria!

Ba ibali'ö ia, imane khönia, ba li Heberaio: Rabuni! he samahaö! geluahania.

17 Imane khönia Yesu: Böi babaya ndra'o, lö'ö na si möi ndra'o yaŵa khö Namagu. Ba ae ba dalifusögu andrö, ba ŵa'ö khöra: Möido yaŵa khö Namagu, ba khö Namami, khö Lowalangigu, ba khö Lowalangimi.[8]

18 Ba möi Maria andrö, banua Magadala, i'ombakha'ö ba nifahaö: No u'ila Duada, ba da'ö niŵa'önia khögu.[9]

I'oroma'ö ia khö ndra nifahaö

[edit | edit source]

III. 19 Ba me tanö owi, me luo migu, me no mulazi mbawandruhö, ba zi so ndra nifahaö, ba wa'ata'ura niha Yehuda, ba möi Yesu, so ia ba gotaluara, ba imane khöra: Ya'ohahau dödömi![10] 20 Ba me aefa iŵa'ö da'ö, ba i'oroma'ö khöra danga, awö ngai.

Awena omuso dödö ndra nifahaö, me la'ila Zo'aya.[11]

21 Ba ifuli imane khöra: Ya'ahahau dödömi! Hulö si mane famatenge Nama ya'o si manö göi wamatengegu ya'ami.[12]

22 Ba me no iŵa'ö da'ö ba ihehaini ira, ba imane khöra: Mitema Geheha ni'amoni'ö.[13] 23 Na so ni'efa'ömi horö, ba aefa khöra, ba ba zi lö mi'efa'ö ia, ba lö aefa.[14]

I'oroma'ö ia khö Doma

[edit | edit source]

IV. 24 Ba lö Toma, awö zi felendrua andrö, nifotöi si faero, me so Yesu.[15]

25 Ba la'ombakha'ö khönia nifahaö bö'ö andrö: No ma'ila Duada.

Ba imane khöra: Na lö u'ila ba dangania laheto gosö-osö andrö, ba na lö ube'e durugu ba laheto gosö-osö andrö, ba na lö utufa tangagu ngainia, ba lö faduhu dödögu.[16]

26 Ba fitu bongi aefa da'ö, ba so zui si bakha ndra nifahaönia, ba so göi Doma. So Yesu, me no mulazi mbawandruhö, so ia ba gotaluara, ba imane: Ya'ohahau dödömi! 27 Awena iŵa'ö khö Doma: Oro'ö durumö, ba da'e, ba faigi dangagu, ba oro'ö dangau, ba tufa ngaigu, ba böi zi lö faduhu dödöu, yafaduhu sa'ae.

28 Itema linia Toma, imane khönia: So'aya ya'o ba Lowalangigu![17]

29 Imane khönia Yesu: Me no ö'ilado, andrö wa no faduhu dödöu. Ya'ahowu zi faduhu tödö, he lö mangila höröra![18]

Tani wa tesura zura

[edit | edit source]

V. 30 Ba oya na sa dandra bö'ö, nifazökhi Yesu, ba zanahe ndra nifahaö, si lö musura ba zura andre.[19] 31 Ba no musura da'e, ena'ö faduhu dödömi, Keriso Yesu, Ono Lowalangi, ba ena'ö so khömi wa'auri si lö aetu, ba döinia andrö, na faduhu dödömi.[20]

Famotokhi ba gahe

[edit | edit source]
  1. ↑ Mat 28:1
  2. ↑ Faigi 13:23
  3. ↑ Faigi 11:44
  4. ↑ KorI 15:4; Sin 16:10; HalZin 2:25 b.t.
  5. ↑ Mat 28:5 b.t; Mar 16:5
  6. ↑ Mar 16:9
  7. ↑ Faigi 19:41
  8. ↑ Mat 28:9–10; Faigi 6:62; Heb 2:11–12; KorI 11:3
  9. ↑ Mat 16:10
  10. ↑ Luk 24:36
  11. ↑ Faigi 19:34; 16:32
  12. ↑ Faigi 14:27; 17:18
  13. ↑ Luk 24:49
  14. ↑ Mat 16:19; 18:18
  15. ↑ Faigi 11:16
  16. ↑ Sin 22:17
  17. ↑ Faigi 1:1; Rom 9:5
  18. ↑ Faigi 4:48; FetI 1:8; Heb 11:1–27
  19. ↑ Faigi 21:25; HalZin 1:3
  20. ↑ Faigi 3:16; YohI 5:13

Fabaliŵa lala

[edit source]

Olayama Zura Yohane: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Yohane/20&oldid=6458453"