Wb/nia/Moze I/47

FAZA 47

I. Falukha khö Wara'o dalifusö Yosefo ba amania. II. Famaigi Yosefo lala, ba lofo andrö. III. Ibe'e li Yakobo, ba wogo'o ya'ia dania ba danö Gana'ana.

1 I. Ba möi Yosefo, i'ombakha'ö khö Wara'o, imane: No so namagu ba ira ga'agu, moroi ba danö Gana'ana, no la'ohe mbiribirira ba saŵira, awö fefu hadia ia zi so khöra; ba danö Gozena so ira iada'e. 2 Ba lima i'ohe, ga'ania, ba ifalukha'ö da'ö khö Wara'o. 3 Ba isofu khö ndra ga'a Yosefo Fara'o, imane: Hadia halöhalöŵömi? Ba lamane khö Wara'o: Kubalo mbiribiri zawuyumö andre, he ya'aga, ba he ira tuama föna. 4 Ba lamane na khö Wara'o: Möiga ba da'e, ena'ö ma'iagö da'e ma'ifu, me no ambö du'u, ö mbiribiri khöma; noa sa afökhö lofo andrö ba danö Gana'ana. Ba ena'ö na ba danö Gozena so zawuyumö! 5 Ba imane Fara'o khö Yosefo: Hana na ba danö Gozena la'iagö, ba na ö'ila, so ba khöra niha si tola, ba fataro högö gubalo gurifögu ira. 6 Ba larugi danö Miserayi khö Yosefo Yakobo ba ononia. Ba me irongo Fara'o, razo Miserayi, ba imane Fara'o khö Yosefo: Ba no möi khöu namau ba talifusöu; hiza fönau danö Miserayi, ba zabölö atabö zinanö ba danö fa'aso namau ba talifusöu. 7 Ba i'ohe yomo namania Yakobo Yosefo, ifalukha'ö khö Wara'o. Ba fatabe Yakobo khö Wara'o, wamahowu'ö ya'ia. 8 Ba isofu khö Yakobo Fara'o, imane: Ha me uga fakhe ndra'ugö? 9 Imane Yakobo khö Wara'o: Fa'ara wekoligu andrö, ba no 130 fakhe. Lö anaunau ba si no fahöna famakao götögu andrö, ba lö ikhamö götö ndra amagu tuagu, töröŵara andrö. (Sin. 39, 13; 119, 19. Heb. 11, 13). 10 Ba i'angonasi Wara'o Yakobo, wamahowu'ö ya'ia zui, ba iröi Wara'o. 11 Ba ihonogöi nahia khö namania ba khö ndra talifusönia Yosefo, ifakhoi khöra dana khöra tanö ba danö Miserayi, ba zabölö atabö zinanö ba danö, ba danö Ramese, i'o'ö niŵa'ö Wara'o. 12 Ba ibalazoi namania ba talifusönia ba soroiyomo namania fefu Yosefo, fakhe, dali wa'oya ndraono.

13 II. Ba dozi tanö, ba lö ö fakhe, abölöbölö sibai lofo, he tanö Miserayi ba he tanö Gana'ana, ba erege dödö ba lofo andrö. 14 Ba owulo manö khö Yosefo gana'a fefu, he ana'a ba danö Miserayi, ba he ana'a ba danö Gana'ana, böli wakhe andrö, ni'ölira, ba ifa'ema ba nomo Wara'o gana'a andrö Yosefo. 15 Ba me no ahori gana'a ba danö Miserayi ba ba danö Gana'ana, ba dozi möi Ndrawa Miserayi khö Yosefo, lamane: Faigi khöma mbalazo! Ma tola matega ba zanehe ndra'ugö? ana'a sa, ba no ahori! 16 Imane Yosefo: Mibe'e gurifömi, ba ube'e khömi, böli gurifömi andrö, na no ahori gana'a. 17 Ba la'ohe khö Yosefo guriföra, ba ibe'e khöra wakhe Yosefo, böli kudo ba böli mbiribiri ba böli zaŵi ba böli galide. Itaha mbalazora fakhe, barö ndröfi andrö, böli guriföra fefu. 18 Ba alua ndröfi andrö; ba ba ndröfi dania, ba möi ira zui khönia, ba lamane: Tebai mabini'ö khöu, Tua: no ahori gana'a ba okhötama urifö, ba no möi khöu. Lö si tosai nihalöu ena'ö, hato botoma ba benuama. 19 Hadia, tola tekiko ndra'aga fönau, ya'aga andre ba benuama. Tema öli ndra'aga, fabaya benuama andrö, fakhe be'e böli, ba enoni Wara'o ndra'aga, fabaya benuama. Ba be'e khöma danömö, ena'ö auri ndra'aga ba böi mate, ba fa böi tobali sasai'ö mbenuama. 20 Ba ahori i'öli mbenua Ndrawa Miserayi andrö Yosefo, khö Wara'o. Dozi sa la'amawa mbenuara Dawa Miserayi, me no famakaora lofo andrö; ba tobali okhöta Wara'o danö. 21 Ba niha sato andrö, ba i'owuloi ba mbanua misa, i'otarai wondrege danö Miserayi, numalö ba wondregenia tanö sa. 22 Hato banua gere zi lö i'öli. Ere andrö sa, ba nibalazoi Wara'o, aurifara mbalazo andrö, nibe'e Wara'o khöra; da'ö mbörö, wa lö la'amawa mbenuara. 23 Ba imane Yosefo ba niha sato: Ba tobali, no u'öli ami, khö Wara'o sa'ae ami, fabaya benuami. ya'e khömi danömö, ena'ö tola manaru ami. 24 Ba buania dania, ba sambua ni'olima mibe'e khö Wara'o; ba si öfa ni'olima, ba khömi, tanömömi ba balazomi ba balazo zoroiyomomi ba ö ndraono sawuyu khömi. 25 Ba lamane: No ö'orifi ndra'aga! Asala falukhaga wa'ebua dödö khöu, Tua, ba sawuyu Wara'o sa'ae ndra'aga! 26 Ba tobali ifatö gömö Ndrawa Miserayi Yosefo, si lö tebulö, irege ma'ökho: sambua ni'olima labe'e khö Wara'o mbua nowira; hato nowi gere zi tenga khö Wara'o.

27 III. Ba Iraono Gizeraeli, ba sahono ba danö Miserayi, ba danö Gozena. Moŵa'a ira ba da'ö, ba itugu ato ira, tobali ato sibai dania. 28 Ba fa'anau noso Yakobo na, ba danö Miserayi, ba 17 fakhe, ba fa'anau noso Yakobo fefu, götönia, ba 147 fakhe. 29 Ba me no ahatö wa'amate Gizeraeli, ba ifakaoni'ö nononia Yosefo, imane khönia: Na sosó dödöu ndra'odo ma'ifu, ba tufa tanga narö zolagu [ba we'amöi ba hölu], ebua'ö dödöu khögu, böi limodo: böi ko'o ndra'o ba danö Miserayi! (F. 24, 2). 30 Omasido ba ngai ndra tuagu sodo; andrö ö'ohe ndra'o, öhetado ba danö Miserayi ba ba lewatöra ötanö ndra'o. Ba imane: u'o'ö zomasi'ö. (F. 23, 19). 31 Ba imane Yakobo: Ae ba hölu khögu! Ba möi ia ba hölu khönia; ba ifaöndrö ia Izeraeli ba lulu waratenia tanö ba högö.

Fabaliŵa lala

Olayama Moze I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö

Fabaliŵa lala

Fanolo ba wanura: Lala wanura • Fama'oli nösi • Ngawalö templat • Ngawalö kategori

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö