Wb/nia/Moze I/46

FAZA 46

I. Iheta ia ba danö Gana'ana Yakobo, awö zoroiyomonia fefu, me no i'abe'e'ö dödönia Lowalangi amabu'ula linia. II. Töi nga'ötö Yakobo andrö. III. Falukha ira Yakobo Yosefo.

1 I. Ba mangefa Gizeraeli, awö zoroiyomonia fefu, ba irugi Mbereseba, ba ibe'e zumange Lowalangi namania Iza'aki, ba da'ö. (yos. 24, 4. Sin. 105, 23. Hal. zin. 7, 15). 2 Ba mu'ao khö Gizeraeli Lowalangi, ba gangilata ba zi bongi, imane: He Yakobo! He Yakobo! Ba imane: urongo! 3 Ba imane: Lowalangi ndra'odo, Lowalangi namau. Böi mangiwa dödöu we'amöi ba danö Miserayi, ba da'ö sa ubali'ö soi sebua ndra'ugö. (F. 26, 24; 28, 13). 4 ya'odo zi fao khöu ba danö Miserayi ba ya'odo göi zolohe mangawuli ya'ugö, ba Yosefo zamakifu höröu dania. 5 Ba iheta ia ba Mbereseba Yakobo, ba lafazaŵa ba gureta namara Yakobo iraono Gizeraeli, awö ndraonora sawuyu, awö wo'omora, ba gureta andrö, nifaohe'ö Wara'o, lalara. 6 Ba la'ohe guriföra ba hadia ia zi so khöra, nisöndrara ba danö Gana'ana, ba larugi, danö Miserayi, Yakobo, awö nga'ötönia fefu; 7 ononia matua ba ma'uwunia matua ba ononia alawe ba ma'uwunia alawe, nga'ötönia ma'afefu i'ohe awönia ba danö Miserayi.

8 II. Ba da'e döi nga'ötö Gizeraeli andrö, si fao ba danö Miserayi, Yakobo, awö nga'ötönia: Si a'a nono Yakobo Rubeno. (Moz. II. 1, 1. Nga'öt. I. 5, 3). 9 Ba ono Rubeno, ba Hanokhi ba Falu ba Heseroni ba Karemi. 10 Ba ono Zimeoni, ba yemueli ba Yamino ba Ohada ba Yakhino ba Sohara; ba Saulo, ono mbene'ö Ndrawa Gana'ana andrö. 11 Ba ono Lewi, ba Gereso ba Kahati ba Merari. 12 Ba ono yuda, ba Geri ba Onani ba Sela ba Feresi ba Sera; ba si mate ba danö Gana'ana Geri ba Onani. Ba ono Weresi andrö, ba Heseroni ba Hamula. 13 Ba ono Isasari, ba Tola ba Fuwa ba yobi ba Simeroni. 14 Ba ono Zebuloni, ba Serede ba Elono ba yale'eli. 15 Da'ö nono Lea andrö, ononia khö Yakobo ba danö Mezofotamia, awö nono alawe andrö, Dina; 33 fefu, ono matua ba ono alawe. 16 Ba ono Gado, ba Safono ba Hagi ba Suni ba Esebono ba Eri ba Arodi ba Areli. 17 Ba ono Gaseri, ba yimena ba yisiwa ba yisiwi ba Beria ba talifusöra alawe Sera; ba ono Mberia andrö, ba Heberi ba Malekieli. 18 Da'ö nono Zilifa andrö, nifa'ohe'ö Labano khö nononia Lea, ononia khö Yakobo, 16 niha fefu. (F. 29, 24). 19 Ba ono Rakhela andrö, fo'omo Yakobo, ba Yosefo ba Beniyami. 20 Ba ono si tumbu khö Yosefo ba danö Miserayi, ononia khö Gasanata andrö, ono Wotifera, högö gere ba Gono, ba Manase ba Eferayi. (F. 41, 50). 21 Ba ono Mbeniyami, ba Bela ba Bekheri ba Asibeli; ba Gera ba Na'ama ba Ehi ba Rosi ba Mufi ba Hufi ba Aredi. 22 Da'ö nono Rakhela, ononia khö Yakobo, 14 niha fefu. 23 Ba ono Dano, ba Husimi, ba ono Nafetali, 24 ba yase'eli ba Guni ba Yeseri ba Silemi. 25 Da'ö nono Mbiliha andrö, nifa'ohe'ö Labano khö nononia Rakhela, ononia khö Yakobo, fitu niha fefu. (F. 29, 29). 26 Fa'ato nga'ötö Yakobo andrö, sanaŵa tanö Miserayi, lö lai numönönia andrö, ba 66 niha. 27 Ba ono Yosefo andrö, si tumbu khönia ba danö Miserayi, ba dombua. Tobali 70 fefu zoroiyomo Yakobo andrö, sanaŵa tanö Miserayi. (Moz. V. 10, 22. Nga'öt. I. 7, 14).

28 III. Ba ifowaöwaö yuda, khö Yosefo, ba wanofu lala ba Gozena, fönania. Ba me no larugi danö Gozena, 29 ba ifa'anö guretania Yosefo, fakureta ia, isaŵa Gozena, ba wamaondragö amania Izeraeli. Ba me falukha ia khönia, ba italagui mbagi, ba ara mege'ege ia ba mbaginia. 30 Ba imane Izeraeli khö Yosefo: Lö'ö sa'ae afökhö khögu wa'amate, me no ifuli falukha ita, wa lö si mate ndra'ugö! (F. 45, 28). 31 Ba imane Yosefo khö ndra ga'ania ba ba zoroiyomo namania: Damöido mangombakha khö Wara'o, umane dania khönia: No möi khögu ndra talifusögu ba tana khö namagu andrö, si so ba danö Gana'ana mege. 32 Ba no kubalo mbiribiri niha andrö — sanguri urifö niha sa ira — ba no la'ohe mbiribirira ba saŵira, awö fefu hadia ia zi so khöra. 33 Ba na ifakaoni'ö dania ami Fara'o, na isofu: Hadia halöhalöŵömi? 34 ba mimane: Sanguri urifö niha zawuyumö, i'otarai iraono ndra'aga, irege ma'ökho, he ya'aga andre, ba he ira tuama — ena'ö tola ba danö Gozena mi'iagö. Kubalo mbiribiri sa, ba no sogoro Ndrawa Miserayi.

Famotokhi ba gahe[edit source]

Fabaliŵa lala[edit source]

Olayama Moze I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50